តាកែវ៖ ព្រះរាជពិធីច្រត់ព្រះនង្គ័ល ឆ្នាំនេះការផ្សងប្រផ្នូល តាមរយៈគោឧសភរាជ ឬគោបារបស់ព្រះមហាក្សត្រ បានបង្ហាញថា ការបង្កបង្កើនផលក្នុងវិស័យកសិកម្ម ជាពិសេសស្រូវ ពោត និងសណ្តែក នឹងទទួលបានផលល្អប្រសើរ ។
ព្រះរាជពិធីបុណ្យច្រត់ព្រះន័ង្គល នៅឆ្នាំនេះ បានប្រារព្ធឡើង នៅទីលានតារាងបាល់ទាត់ គិរីវង់សុខសែនជ័យ ស្ថិតនៅភូមិត្រពាំងអង្គ សង្កាត់រកាក្រៅ ក្រុងដូនកែវ ខេត្តតាកែវ នាព្រឹកថ្ងៃទី២២ ខែឧសភានេះ ក្រោមរាជាធិបតីភាពដ៏ខ្ពង់ខ្ពស់ ព្រះកុរណា ព្រះមហាក្សត្រ សម្ដេចព្រះបរមនាថ នរោត្តម សីហមុនី។
ព្រះរាជច្រត់ព្រះនង្គ័លជាការផ្សងប្រផ្នូល អំពីផលដំណាំកសិកម្ម នៅក្នុងរយៈពេលពេញមួយឆ្នាំ តាមរយៈការបរិភោគអាហារ ៧មុខ របស់គោឧសភរាជ ឬគោបារបស់ព្រះមហាក្សត្រ ១ នឹម។ អាហារ ៧មុខ រួមមាន៖ ស្មៅ ស្រូវ ពោត សណ្តែក ល្ងរ ទឹក និងស្រា។
នៅឆ្នាំនេះ អភិបាលខេត្តតាកែវ លោក អ៊ុច ភា ធ្វើជាស្តេចមាឃ និងភរិយារបស់លោក គឺលោកស្រី ស្រី ប៊ុណ្ណាដាវី ជាព្រះមេហួ។
សូមបញ្ជាក់ថា ព្រះរាជពិធីច្រត់ព្រះនង្គ័ល នាថ្ងៃ៤រោច ខែពិសាខ ត្រូវបានប្រារព្ធឡើងជារៀងរាល់ឆ្នាំ ដើម្បីប្រកាសប្រាប់ប្រជាពលរដ្ឋ ដែលប្រកបរបរកសិកម្ម ធ្វើស្រែចម្ការ ថា រដូវវស្សា បានចូលមកដល់ហើយ ដូច្នេះការធ្វើស្រែចម្ការ ក៏ចាប់ផ្តើមផងដែរ។
ព្រះរាជពិធីបុណ្យច្រត់ព្រះនង្គ័ល ពីមុន បានប្រារព្ធឡើងរៀងរាល់ឆ្នាំ នៅវាលព្រះមេរុ ស្ថិតនៅខាងជើង ជាប់ព្រះបរមរាជវាំង ក្នុងរាជធានីភ្នំពេញ។ ប៉ុន្តែចាប់តាំងពីព្រះករុណា ព្រះមហាវីរក្សត្រ សម្តេចព្រះ នរោត្តម សីហនុ ចូលទិវង្គត កាលពីថ្ងៃទី១៥ ខែតុលា ឆ្នាំ២០១២ ព្រះរាជពិធីច្រត់ព្រះនង្គ័ល ត្រូវបានប្រារព្ធឡើង នៅតាមបណ្តាខេត្តនានា ឆ្លាស់ប្តូរវេនគ្នា មួយឆ្នាំខេត្តនេះ មួយឆ្នាំខេត្តនោះវិញ៕
