ដូណាល់ ត្រាំ ត្រូវការ២៤សំឡេងទៀតប៉ុណ្ណោះ ដើម្បីឈ្នះ កាម៉ាឡា ហារីស ក្នុងការបោះឆ្នោតប្រធានាធិបតី

គិតត្រឹមវេលាម៉ោង១ និង៣០នាទីរសៀល ថ្ងៃទី៦ ខែវិច្ឆិកានេះ គេហទំព័រសារព័ត៌មាន abcnews​ បានបង្ហាញថា បេក្ខជនប្រធានាធិបតី មកពីគណបក្សសាធារណរដ្ឋ លោក ដូណាល់ ត្រាំ នៅតែបន្តនាំមុខលោកស្រី កាម៉ាឡា ហារីស ជាបេក្ខជនប្រធានាធិបតី នៃគណបក្សប្រជាធិបតេយ្យ ដោយទទួលបានអង្គបោះឆ្នោត ២៤៦ ទល់នឹង១៩៤។

ពោលគឺនៅសល់តែ២៤សំឡេងទៀតប៉ុណ្ណោះ ដែលលោក ដូណាល់ ត្រាំ ត្រូវការដើម្បីឈ្នះការបោះឆ្នោតប្រធានាធិបតីនេះ។

សូមបញ្ជាក់ជូនថា ដើម្បីអាចក្លាយជាប្រធានាធិបតីអាមេរិក លោកស្រី ហារីស ឬលោក ត្រាំ ត្រូវប្រមូលឱ្យបានអង្គបោះឆ្នោតយ៉ាងហោច​ ២៧០រូប ក្នុងចំណោមអង្គបោះឆ្នោតសរុប ៥៣៨រូប។

នៅក្នុងឆ្នាំ២០២៤នេះ មានរដ្ឋសំខាន់ៗចំនួន៧ ដែលនឹងសម្រេចអ្នកឈ្នះ-ចាញ់រវាងលោក ត្រាំ និងលោកស្រី ហារីស។ រដ្ឋទាំងនេះដែលគេហៅថា Swing States រួមមាន Georgia, North Carolina, Arizona, Michigan, Nevada, Pennsylvania និងរដ្ឋ Wisconsin៕ ដោយ៖ កន ចំណាន