លោក សោម សម្បត្តិ នាយកប្រតិបត្តិក្រុមហ៊ុនផលិតថ្នាំពណ៌ជាតិខាំផែនបានពន្យល់ពីគន្លឹះសំខាន់ៗចំនួន៥ យ៉ាងដល់សហគ្រិនវ័យក្មេងនៅកម្ពុជាដែលមានបំណងចង់ក្លាយខ្លួនជាអ្នកជំនួញ ដោយក្នុងនោះលោកថា« ចំណុចទី១ បង្កើតផលិតផលនិងសេវាឲ្យបានល្អជាមុនសិន ចំណុចទី២ ពេលមានផលិតផលល្អហើយត្រូវលក់ឲ្យដាច់ដើម្បីទទួលបានចំណូលច្រើន ចំណុចទី៣ ការគ្រប់គ្រងហិរញ្ញវត្ថុនិងបំណុលឲ្យបានជារឿងសំខាន់ ចំណុចទី៤ ការគ្រប់គ្រងធនធានមនុស្ស និងចំណុចទី៥ ត្រូវចេះបច្ចេកវិទ្យាក្នុងការគ្រប់គ្រងក្រុមហ៊ុន»។
លើសពីនេះលោកបានមានប្រសាសន៍ថា ការបង្កើតផលិតផលគឺនរណាៗក៏អាចបង្កើតបានដែរ ក៏ប៉ុន្តែការបង្កើតផលិតល្អហើយនិងលក់ដាច់ទៀតជារឿងសំខាន់ ហេតុដូច្នោះហើយ ការធ្វើទីផ្សារក៏មានតួនាទីសំខាន់ក្នុងការធ្វើឲ្យក្រុមហ៊ុនទទួលបានប្រាក់ចំណូលច្រើន ដែលទាមទារឲ្យផលិតផលមានគុណភាពល្អនិងមានទីតាំងលក់ល្អផ្តល់ភាពងាយស្រួលដល់អតិថិជន។
លោក សោម សម្បត្តិ រៀបរាប់ថា ការបើកអាជីវកម្មមួយជោគជ័យមិនអាស្រ័យលើផលិតផលនោះទេ គឺទាមទារឲ្យផលិតផលនោះល្អជាងគេ ទើបខ្លាំង និងមានទីតាំងល្អទៀត ដែលធ្វើឲ្យអតិថិជនងាយស្រួលក្នុងការទិញផលិតផល ហើយដូច្នោះ ការធ្វើអាជីវកម្មមានលក្ខណៈពិសេសដាច់ៗដោយឡែកពីគ្នាទន្ទឹមនោះទាមទារឲ្យមានការទំនាក់ទំនងល្អជាមួយអតិថិជន និងការចេះធ្វើទីផ្សារធ្វើឲ្យផលិតផលលក់ដាច់បានកាន់តែច្រើន។
អ្នកជំនួញខាងលើពន្យល់ថា អ្នកលក់ល្អគឺទាមទារឲ្យមានការបណ្តុះបណ្តាលច្រើនមុនអាចលក់ផលិតផលទទួលបានជោគជ័យ ហើយក្នុងនោះមិនអាចខ្វះបានទេ ចំពោះជំនាញទីផ្សារ។ ចំណុចទាំងនេះជាធាតុផ្សំមួយជំរុញឲ្យក្រុមហ៊ុនទទួលបានប្រាក់ចំនេញច្រើន ហើយហេតុដូច្នោះ រាល់ការធ្វើជំនួញមិនមែនមានន័យថា មានលុយគ្រប់គ្នាអាចរកស៊ីជោគជ័យទាំងអស់នោះទេ បើគ្មានបើគ្មានជំនឿ ចំណង់ ជំនាញនិងសេចក្តីក្លាហាននោះ។
អ្នកជំនួញខាងលើប្តេជ្ញាថា ចាប់ពីពេលនេះតទៅយើងគ្រប់គ្នាត្រូវតែកសាងកេរ្តិ៍ឈ្មោះអាជីវកម្មឲ្យល្បីនឹងបង្កើនការលក់ឲ្យដល់កម្រិតកំពូល សម្រាប់សតវត្តទី ២១ យើងនេះ ហើយនេះជាពេលវេលាមួយដ៏សមស្រប ដែលសហគ្រិនវ័យក្មេងកម្ពុជាអាចចាប់យកឱកាសនេះឲ្យបាននៅក្នុងដៃ។
