លោក ប៉ាត់ ចំណាន ប្រធានក្រុមប្រឹក្សាភិបាលក្រុមហ៊ុន វីខ្មែរអ៊ិចប្រេស បានមានប្រសាសន៍ថា ក្នុងនាមវិស័យឯកជននិងជាក្រុមហ៊ុនក្នុងស្រុកលោកចង់ឲ្យស្នើឲ្យរាជរដ្ឋាភិបាលបន្ធូរបន្ថយលក្ខ័ណ្ឌមួយចំនួនដល់សហក្រាសក្នុងស្រុក ដើម្បីឲ្យពួកគាត់មានលទ្ធភាពទទួលបានឥណទានពីធនាគារ SME ដែលគ្រោងនឹងបង្កើតថ្មីនាពេលខាងមុខនេះ។
លោកអះអាងទៀតថា«បច្ចុប្បន្ននេះសហគ្រាសខ្នាតតូចនិងមធ្យមនៅកម្ពុជាកំពុងតែជួបប្រទះធំគឺបញ្ហាទុនសម្រាប់រឿងយកទៅពង្រីកអាជីវកម្ម ហើយក្នុងនាំវិស័យឯកជនស្នើសុំឲ្យរាជរដ្ឋាភិបាលកម្ពុជាជួយសម្រួលលក្ខ័ណ្ឌស្មុកស្មាញមួយចំនួន ដើម្បីអាចឲ្យម្ចាស់អាជីវកម្មទទួលបានទុកពីធនាគារដែលគ្រោងនឹងបង្កើតថ្មីនៅពេលខាងមុខនេះ»។
លោកបានមានប្រសាសន៍ថា តាមពិតទៅក្រុមហ៊ុនក្នុងស្រុកមិនមែនគ្មានសមត្ថភាពនោះទេ សម្រាប់ការផលិតនិងការប្រគួតប្រជែងលើទីផ្សារនោះ ហើយបញ្ហាសំខាន់គឺពួកគាត់ពិបាកក្នុងការទទួលបានឥណទានយកទៅពង្រីកអាជីវកម្ម ហើយក្រុមហ៊ុន វីខ្មែរអ៊ិចប្រេស រំពឹងថា នឹងទទួលបានទុនបន្ថែម ដើម្បីយកវិនិយោគបន្ថែម។
សម្រាប់អ្នកវិនិយោគខាងលើបន្ថែមថាក្រុមហ៊ុននិងសហគ្រាសនៅក្នុងប្រទេសកម្ពុជាចាប់ពីពេលនេះទៅគឺត្រូវពង្រឹងខ្លួនឲ្យក្លាយជាក្រុមហ៊ុនស្តង់ដារ និងមានគណនេយ្យភាពត្រឹមត្រូវ ហើយបើធ្វើច្នោះបានគឺងាយស្រួលនឹងទទួលបានការគាំទ្រពីរាជរដ្ឋាភិបាល ហើយជាពិសេសការទទួលបានហិរញ្ញប្បទានពីធនាគារដែលគ្រោងនឹងបង្កើតថ្មីនេះផងដែរ។
សហគ្រាសធុនតូច និងមធ្យមបានចូលរួមអភិវឌ្ឍន៍សេដ្ឋកិច្ចជាតិ និងបានស្រូបកម្លាំងពលកម្មប្រមាណ ៧៣% ហើយធាតុសំខាន់របស់សហគ្រាសបានរំលេចចេញក្នុងយុទ្ធសាស្រ្តចតុកោណដំណាក់ទី៣របស់រាជរដ្ឋាភិបាល និងគោលយោបាយអភិវឌ្ឍន៍វិស័យឩស្សាហកម្មផងដែរ។
កន្លងទៅសហគ្រាសក្នុងស្រុកបានជួបការលំបាកជាច្រើន ដូចជា ការមិនទទួលបានហិរញ្ញប្បទាន ខ្វះខាតបច្ចេកវិទ្យាព័ត៌មាន ការភ្ជាប់ទំនាក់ទំនងជាមួយក្រុមហ៊ុនវិនិយោគ និងខ្វះសេវាគាំទ្រការអភិវឌ្ឍន៍អាជីវកម្មជាដើម។ ការទទួលហិរញ្ញប្បទានរបស់សហគ្រាសធុនតូច និងមធ្យមនៅមានកម្រិតនៅឡើយ ដូច្នោះទើបថ្មីនេះសហគ្រាសនៅកម្ពុជារំពឹងថា នឹងការទទួលបានហិរញ្ញប្បទានធនាគារSMEរបស់រដ្ឋាភិបាលឆាប់ៗខាងមុខ។
យោងតាមមន្រ្តីក្រសួងសេដ្ឋកិច្ចនិងហិរញ្ញវត្ថុធ្លាប់អះអាងថា ធនាគារSMEនឹងចេញជារូបរាងនៅពេលខាងមុខនេះ ដែលមានទុនប្រមាណ ១០០លានដុល្លារអាមេរិក ដើម្បីផ្តល់ជូនដល់សហក្រាសខ្នាតតូចនិងមធ្យមនៅក្នុងប្រទេស ដើម្បីអាចយកទៅពង្រីកដើមទុននិងពង្រឹងផលិតភាពរបស់ក្រុមហ៊ុន។
រាជរដ្ឋាភិបាលកម្ពុជាបានដាក់ចេញនូវគោលនយោបាយលើកកម្ពស់សហគ្រាសធុនតូចនិងមធ្យមដែលជាឆ្អឹងខ្នងនៃសេដ្ឋកិច្ចជាតិតាមរយៈនេះក្រសួងសេដ្ឋកិច្ច និងហិរិញ្ញវត្ថុបានអនុវត្តចេញនូវគោលនយោបាយនេះ ដោយគាំទ្រដល់ការអភិវឌ្ឍន៍ខ្លួនរបស់សហគ្រាសធុនតូចនិងមធ្យម ដោយជម្រុញចេញនូវយន្តការផ្តល់ហិរញ្ញប្បទានដល់សហគ្រាសធុនតូចនិងមធ្យមផងដែរ៕