ណាននីង-ចិន៖ ចុងភៅកម្ពុជាចំនួន ២នាក់ទទួលបានមេដាយប្រាក់ និងសំរិទ្ធក្នុងការប្រកួតចម្អិនម្ហូបអាហារអាស៊ាន-ចិន ឆ្នាំ២០១៩ នៅខេត្តណាននីង សាធារណរដ្ឋប្រជាមានិតចិន។
ការចូលរួមប្រកួត ក្នុងកម្មវិធីប្រកួតចំអិនម្ហូបអាហារអាស៊ាន ចិន ឆ្នាំ២០១៩ (2019 China-ASEAN Culinary Skill Competition Students from Vocational Colleges) ធ្វើឡើងតាមរយៈការរៀបចំរបស់ក្រសួងទេសចរណ៍ មាននាយកដ្ឋានបណ្តុះបណ្តាលជំនាញវិជ្ជាជីវៈទេសចរណ៍ សហការជាមួយសាលាទេសចរណ៍ និងសណ្ឋារកិច្ចប៉ូលឌុយប្រ៊ូល។
កម្មវិធីនេះត្រូវបានប្រព្រឹត្តទៅចាប់ពីថ្ងៃ១៩-២១ ខែកញ្ញា ឆ្នាំ២០១៩ ចូលរួមពីសំណាក់សិស្សកម្ពុជា ថៃ វៀតណាម តៃវ៉ាន់ និងហុងកុង ដើម្បីប្រកួតជាក្រុមលើវិញ្ញាសារចំនួន ៣ រួមមាន៖ វិញ្ញាសារម្ហូបអាស៊ី វិញ្ញាសារម្ហូបអឺរ៉ុប និងវិញ្ញាសារម្ហូបកែច្នៃ សម្រាប់បេក្ខភាពជ្រើសរើសសម្រាប់ការប្រកួត។
បេក្ខជន ២នាក់ របស់កម្ពុជាបានជ្រើសរើសយកវិញ្ញាសារម្ហូបអឺរ៉ុបទទួលបានមេដាយចំនួន ២ ក្នុងនោះមាន លោក ង៉ៃ សុខហេង ទទួលបានមេដាយប្រាក់ និងលោក ឡាំ រិទ្ធី ទទួលបានមេដាយសំរឹទ្ធ។
ជ័យលាភីមេដាយនេះ គឺពិតជាបង្ហាញពីសមត្ថភាព និងជំនាញក្នុងចំអិនម្ហូបរបស់សិស្ស និងអ្នកជំនាញចុងភៅរបស់កម្ពុជា ក្នុងការជំរុញលើកកម្ពស់គុណភាព និងសេវាកម្មម្ហូបអាហារដែលជាការចូលរួមគាំទ្រដល់ការអភិវឌ្ឍវិស័យម្ហូបអាហារ (Gastronomy) សម្រាប់ទទួលភ្ញៀវទេសចរដែលមកកម្សាន្តនៅកម្ពុជា៕
