កូរ៉េខាងត្បូងនិងសហរដ្ឋអាមេរិកនៅតែបន្តមានភាពតានតឹងជាមួយគ្នាដដែលរហូតដល់ថ្ងៃចន្ទ ទី២៥ ខែវិច្ឆិកានេះ ក្នុងសំណុំរឿងនៃការចំណាយលើការរក្សាវត្តមានកងទ័ពអាមេរិកនៅលើទឹកដីកូរ៉េខាងត្បូង ក្រោយពីអាមេរិកបានបង្កើនការចំណាយលើវត្តមានកងទ័ពរបស់ខ្លួននៅកូរ៉េខាងត្បូងរហូតដល់៤០០% ស្មើនឹងទឹកប្រាក់៥ពាន់លានដុល្លារក្នុងមួយឆ្នាំ ដែលនេះបើតាមការចុះផ្សាយរបស់ប្រព័ន្ធផ្សព្វផ្សាយ Yahoo News ។
ចាប់តាំងពីក្រោយសង្គ្រាមនៅឧបទ្វីបកូរ៉េក្នុងចន្លោះឆ្នាំ១៩៥០ដល់១៩៥៣ កូរ៉េខាងត្បូងបានចំណាយទឹកប្រាក់ក្នុងរង្វង់ជិតមួយពាន់លានដុល្លារក្នុងមួយឆ្នាំលើវត្តមានកងទ័ពអាមេរិកនៅលើទឹកដីរបស់ខ្លួន ដែលប្រហាក់ប្រហែលនឹង៤០%នៃការចំណាយសរុប ប៉ុន្តែនៅឆ្នាំ២០១៩នេះ អាមេរិកបានទាមទារអោយកូរ៉េខាងត្បូងបង្កើនការចំណាយរហូតដល់៥ ពាន់លានដុល្លារក្នុងមួយឆ្នាំដែលស្មើនឹងកំណើន៤០០% ។
ចំណុចនេះហើយ ដែលធ្វើអោយប្រទេសជាសម្ព័ន្ធមិត្តទាំងពីរមិនឯកភាពគ្នា ដោយកូរ៉េខាងត្បូងបានរអ៊ូររទាំថា អាមេរិកបានទាមទារទឹកប្រាក់ច្រើនហួសហេតុពេក ក្នុងការចំណាយលើវត្តមានកងទ័ពរបស់ខ្លួននៅកូរ៉េខាងត្បូង ដែលប្រទេសនេះមិនអាចចេញលុយដ៏ច្រើនសម្បើមនេះតាមការទាមទាររបស់អាមេរិកបានទេ ៕
