ភ្នំពេញ៖ ក្រុមហ៊ុន ជីប ម៉ុង លែន បានទទួលសិទ្ធិគ្រប់គ្រងពេញលេញលើគម្រោង ហ្គ្រេន ភ្នំពេញ អន្តរជាតិដែលស្ថិតនៅលើផ្ទៃដី២៦០ ហិកតា ក្នុងតំបន់សំខាន់នៃខណ្ឌសែនសុខ។
ការប្រកាសអបអរសាទររបស់ក្រុមហ៊ុន ជីប ម៉ុង លែន បានឲ្យដឹងនៅថ្ងៃទី២៦ ខែធ្នូឆ្នាំ២០១៩នេះ បានបញ្ជាក់ថា បន្ថែមលើគម្រោងដែលមានស្រាប់ ជីប ម៉ុង លែននឹងប្រើប្រាស់បទពិសោធន៍ និងជំនាញរបស់ខ្លួនក្នុងវិស័យអចលនទ្រព្យ ដើម្បីអភិវឌ្ឍន៍លំនៅដ្ឋានប្រណិតបន្ថែមទៀត ផ្សារទំនើប និងហេដ្ឋារចនាសម្ព័ន្ធផ្សេងទៀតក្នុងគម្រោង ប្រកបដោយគុណភាពខ្ពស់ ដើម្បីឆ្លើយតបទៅនឹងតម្រូវការរបស់អតិថិជន។
ក្រុមហ៊ុននេះ គឺជាបុត្រសម្ព័ន្ធរបស់ក្រុមហ៊ុន ជីប ម៉ុង គ្រុប ដែលជាអ្នកនាំមុខក្នុងអាជីវកម្មជាច្រើនវិស័យដូចជា ការអភិវឌ្ឍលំនៅឋាន បេតុងលាយស្រេច ការចែក ចាយ និងផលិត ស៊ីម៉ងត៍ ការចែកចាយ ផលិតផលបរិភោគ ការផលិតស្រាបៀរ និងភេសជ្ជៈ។ល។ តាមរយៈសមត្ថភាព ការប្រកួតប្រជែង និងការចែកចាយទាន់ពេលវេលា ជាមួយបទដ្ឋានគុណភាពខ្ពស់បំផុត។
សូមបញ្ជាក់ថា ក្រុមហ៊ុន ជីប ម៉ុង លែន ជាក្រុមហ៊ុនអភិវឌ្ឍន៍អចលនទ្រព្យឈានមុខគេ ដែលរចនាលំនៅឋានទំនើបទាន់សម័យ ស្រពតាមបទដ្ឋានអន្តរជាតិ ។ សព្វថ្ងៃក្រុមហ៊ុនដ៏ធំមួយនេះ មានគម្រោងអភិវឌ្ឍន៍លំនៅឋាន និងខុនដូ ធំៗចំនួន ១០ គម្រោង ដែលសុទ្ធតែស្ថិតនៅលើទីតាំងដែលសក្តានុពល ៕
