យន្តហោះដ្រូន ១គ្រឿងទំហំ៩,៧០ម៉ែត្របានប្រទះឃើញធ្លាក់នៅវាលស្មៅក្បែរផ្ទះប្រជាពលរដ្ឋរស់នៅភូមិកាយ ឃុំកោះស្តេច ស្រុកគិរីសាគរ ខេត្តកោះកុង កាលពីវេលាម៉ោង៦ ល្ងាចថ្ងៃទី១៦ ខែមករា ២០២០។
មន្រ្តីខេត្តបាននិយាយថា យន្តហោះដ្រូនធ្លាក់នៅមូលដ្ឋានរស់នៅប្រជាពលរដ្ឋប្រាកដមែន ដោយដ្រូន មានលក្ខណៈខ្នាតធំ ពណ៌ស លេខសម្គាល់ ១៧០១០០២ ប្រវែងបណ្តោយ៥ម៉ែត្រ និងទទឹងស្លាបប្រវែង៤,៨៥ម៉ែត្រ សរុបទំហំជិត១០ម៉ែត្រឯណោះ។
លោក ស្នងការនគរបាលខេត្តកោះកុងនៅមិនទាន់បកស្រាយថាតើ យន្តហោះមានប្រភពមកពីណាទេ ខណៈលោក បានរាយការណ៍ស្នើទៅអគ្គស្នងការនគរបាលជាចុះពិនិត្យស្រាវជ្រាវលម្អិត។
បច្ចុប្បន្ន សមត្ថកិច្ចកំពុងហ៊ុមព័ទ្ធការពារទីតាំងដែលធ្លាក់ដ្រូននោះ មិននរណាម្នាក់ចូលទៅជិតបានទេ ពោលគឺរង់ចាំសមត្ថកិច្ចខាងផ្នែកបច្ចេកទេសមកវិនិច្ឆ័យ ទើបអាចផ្តល់ព័ត៌មានលម្អិតបាន៕
