ភ្នំពេញ ៖ កម្លាំង ១២៩នាក់ និងរថយន្តពន្លត់អគ្គិភ័យ ២១គ្រឿង នៃការិយាល័យបង្ការពន្លត់អគ្គិភ័យ និងសង្គ្រោះនៃស្នងការដ្ឋាននគរបាល រាជធានីភ្នំពេញ ដើម្បីត្រៀមចេញអន្តរាគមន៍ ក្នុងឱកាសថ្ងៃបុណ្យចូលឆ្នាំប្រពៃណីជនជាតិចិន-វៀត ណាម។
កម្លាំងនិងមធ្យោបាយ ដើម្បីត្រៀមចេញប្រតិបត្តិការបង្ការពន្លត់អគ្គិ ភ័យពីសំណាក់កម្លាំងនគរបាល ការិយាល័យជំនាញ ខណៈដែលកម្លាំងនគរបាល តាមបណ្តាអធិការដ្ឋាននគរបាលខណ្ឌទាំង១៤ ក៏បានត្រៀមរួចជាស្រេចរួចហើយផងដែរ គឺឆ្លើយតបឲ្យបានលឿនឆាប់រហ័ស ការពារអាយុជីវិត និងទ្រព្យសម្បត្តិប្រជាពល រដ្ឋ។
ស្នងការនគរបាល រាជធានីភ្នំពេញ បានដាក់ចេញនូវបទបញ្ជាដល់កងកម្លាំងនគរបាលគ្រប់ផ្នែក គ្រប់ជំនាញ ត្រូវការពារសន្តិសុខរក្សាសណ្តាប់ធ្នាប់សុវត្ថិភាពជូនប្រជាពលរដ្ឋ។ ជាពិសេសបង្កលក្ខណៈងាយស្រួល ជូនប្រជាពលរដ្ឋ បានជួបជុំក្រុមគ្រួសារ និងធ្វើដំណើរកម្សាន្តឲ្យបានសប្បាយរីករាយ ក្នុងតំណាក់កាលប្រទេស កម្ពុជា មានសុខសន្តិភាព និងការអភិវឌ្ឍន៍រីកចម្រើន។
ក្នុងឱកាសបុណ្យចូលឆ្នាំប្រពៃណីជនជាតិចិននេះផងដែរ សូមអំពាវនាវប្រជាពលរដ្ឋ នៅក្នុងរាជធានីភ្នំពេញ ត្រូវមានការប្រុងប្រយ័ត្នចំពោះភ្លើងធូប ភ្លើង ទៀន និងការប្រើប្រាស់ឧបករណ៍អគ្គិសនីផ្សេងៗ។ ពីព្រោះបើមានការប្រើប្រាស់ធ្វេសប្រហែស វានឹងបង្កអាចគ្រោះថ្នាក់ជាយថាហេតុ នូវគ្រោះអគ្គិភ័យកើតឡើង ណាមួយនោះ ។
សូមបញ្ជាក់ថា របាយការណ៍របស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ បានបង្ហាញឲ្យដឹងថា ក្នងរយៈពេល ៣៨ថ្ងៃចុងក្រោយនេះ អគ្គិភ័យ បានកើតឡើងនៅក្នុងភូមិសាស្ត្ររាជធានីភ្នំពេញ សរុបចំនួន ១២លើក បង្កឲ្យខូចទ្រព្យសម្បត្តិរបស់ប្រជាពលរដ្ឋយ៉ាងសន្ធឹកសន្ធាប់៕
