ប្រព័ន្ធផ្សព្វផ្សាយ Worldometer បានចុះផ្សាយថា ចំនួនអ្នកឆ្លងវីរុសCovid-19សរុបនៅជុំវិញពិភពលោក បានកើនឡើងដល់ជាង១៥លាននាក់ហើយ គឺចំនួន ១៥ ០៨២ ៨៨៣ នាក់ និងអ្នកស្លាប់សរុបដោយសារវីរុសនេះ បានកើនឡើងដល់ជិត៦២ម៉ឺននាក់ហើយដែរ គឺចំនួន ៦១៨ ៤២៧ នាក់ ខណៈដែលអ្នកជាសះស្បើយពីវីរុសនេះ បានកើនឡើងដល់ជិត១០លាននាក់ គឺចំនួន ៩ ១០២ ៩២៧ នាក់ គិតត្រឹមព្រឹកថ្ងៃពុធ ទី២២ ខែកក្កដានេះ។
បើគិតពីចំនួនមនុស្សស្លាប់ និងមនុស្សឆ្លងវីរុសCovid-19ប្រចាំថ្ងៃនៅជុំវិញពិភពលោក ក៏បានកើនឡើងក្នុងកម្រិតខ្ពស់ដែរ ដែលក្នុងរយៈពេល២៤ម៉ោងចុងក្រោយ គិតត្រឹមព្រឹកថ្ងៃពុធដដែលនេះ មនុស្សថ្មីចំនួន ៥៦១១ នាក់បានបាត់បង់ជីវិតដោយសារវីរុសនេះ និងមនុស្សថ្មីចំនួន២៣៧ ០៣៣ នាក់បានឆ្លងវីរុសផ្លូវដង្ហើមមួយនេះដែរ។
ក្នុងរយៈពេល២៤ម៉ោងចុងក្រោយនេះដែរ សហរដ្ឋអាមេរិក និងប្រទេសប្រេស៊ីល មានមនុស្សស្លាប់ថ្មី និងមនុស្សឆ្លងថ្មីនៃវីរុសCovid-19រហូតដល់ជាង១ពាន់នាក់ គឺសហរដ្ឋអាមេរិកមានមនុស្សស្លាប់ថ្មីចំនួន ១០៩២ នាក់ និងប្រទេសប្រេស៊ីលមានមនុស្សស្លាប់ថ្មីចំនួន ១៣៤៦ នាក់៕
