ថ្ងៃចន្ទ ទី២៨ ខែសីហា ឆ្នាំ២០១៧ ម៉ោង ១៨:១៨ (28-08-2017 18:18)
ខេត្តបន្ទាយមានជ័យ ៖ កម្លាំងយោធាកងពលតូចថ្មើជើងលេខ៥១ ឃាត់ជនសង្ស័យម្នាក់ចែកចាយគ្រឿងញៀន៥កូនថង់តូច បញ្ជូនឲ្យកងរាជអាវុធហត្ថខេត្តបន្ទាយមានជ័យចាត់ការតាមច្បាប់ កាលពីថ្ងៃទី២៧ ខែសីហា ឆ្នាំ២០១៧។ លោកឧត្តមសេនីយ៍ត្រី សេង ធារិន មេបញ្ជាការរងនាយសេនាធិការកងពលតូចថ្មើជើងលេខ៥១បានប្រាប់ថា ជនសង្ស័យដែលត្រូវឃាត់ខ្លួនមានឈ្មោះ លឹម ចិន្តា ភេទប្រុស អាយុ២៧ឆ្នាំ រស់នៅភូមិភ្នំជញ្ជាំង ឃុំជប់វ៉ារី ស្រុកព្រះនេត្រព្រះ។
លោកបានបន្តថា នៅពេលដែលកម្លាំងយោធាកងពលតូចថ្មើជើងលេខ៥១ឃាត់ខ្លួនជនសង្ស័យ គឺកម្លាំងបានឃើញជនសង្ស័យធ្វើសកម្មភាពចែកចាយគ្រឿងញៀនបានឃាត់ជនសង្ស័យរកឃើញវត្ថុតាងគ្រឿងញៀនប្រភេទមេតំហ្វេតាមីន(ហៅខេទឹកកកចំនួន៥កូនថង់តូច) និងម៉ូតូ១គ្រឿងដែលជាមធ្យោបាយធ្វើដំណើរចែកចាយឃាត់នៅកាលពីយប់ថ្ងៃទី២៥ ខែសីហា ឆ្នាំ២០១៧ នៅចំណុចផ្លូវមុខទីបញ្ជាការកងពលតូចថ្មើជើងលេខ៥១ ស្រុកព្រះនេត្រព្រះ។ លោកឧត្តមសេនីយ៍ត្រី សេង ធារិន បានបញ្ជក់ថា ក្រោយពេលឃាត់ជនសង្ស័យ និងវត្ថុតាងត្រូវបញ្ជូនឲ្យបញ្ជាការកងរាជអវុធហត្ថខេត្តបន្ទាយមានជ័យ ដើម្បីចាត់ការតាមច្បាប់៕