ភ្នំពេញ៖និស្សិតកម្ពុជាចំនួន១០រូប រួមទាំងនិស្សិតមកពីប្រទេសពីរផ្សេងទៀត ក្នុងតំបន់អាស៊ានគឺប្រ៊ុយណេ និងម៉ាឡេស៉ី ត្រូវជួបសម្ដែងការគួរសម និងសំណេះសំណាលជាមួយលោកជំទាវទី១ គីម ជុងស៊ុក (Kim Jung-sook) ភរិយារបស់ប្រធានាធិបតីកូរ៉េខាងត្បូង មូន ចេអ៊ីន (Moon Jae-in នៅវិមានប្រធានាធិបតី កាលពីថ្ងៃទី៦ ខែមីនា ឆ្នាំ២០១៩។
យោងតាមការផ្សាយរបស់ស្ថានឯកអគ្គរាជទូតកម្ពុជា ប្រចាំប្រទេសកូរ៉េខាងត្បូង និងសមាគមនិស្សិតខ្មែរ ដែលកំពុងរៀននៅទីនោះ បានឲ្យដឹងថា ក្រុមនិស្សិតទាំងនេះ ត្រូវបានលោកជំទាវទី១ ទទួលស្វាគមន៍យ៉ាងកក់ក្តៅ និងពិភាក្សាការងារ នៅមុនដំណើរទស្សកិច្ចផ្លូវរដ្ឋ មកកាន់ព្រះរាជាណាចក្រកម្ពុជា នៅពាក់កណ្តាលខែមីនានេះ។
ក្រុមនិស្សិតកម្ពុជា បានមានប្រសាសន៍លើកឡើងអំពីជំនួបនេះថា «យើងទាំងអស់គ្នា ពិតជាទទួលបាននូវពេលវេលាដ៏អស្ចារ្យ ជាមួយនឹងការសំណេះសំណាលប្រកបដោយភាពស្និទ្ធស្នាល។ សូមអរគុណ ចំពោះមជ្ឈមណ្ឌលអាស៊ានប្រចាំប្រទេសកូរ៉េ និងបណ្តាញយុវជនអាស៊ាននៅកូរ៉េ ដែលបានផ្ដល់ឱកាសដ៏ពិសេសនេះជូនដល់និស្សិតទាំងអស់គ្នា។ ជាពិសេស សូមថ្លែងអំណរគុណយ៉ាងជ្រាលជ្រៅបំផុត ចំពោះលោកជំទាវទី១នៃសាធារណរដ្ឋកូរ៉េ ដែលបានចំណាយពេលដ៏មានតម្លៃសម្រាប់ពួកយើង»។
ក្រុមនិស្សិត បានបញ្ជាក់ទៀតថា លោកជំទាវទី១ បានសំណេះសំណាល និងពិភាក្សាជាមួយក្រុមនិស្សិត អំពីប្រធានបទផ្សេងៗគ្នា ដូចជាមូលហេតុដែលជំរុញពួកគេមកសិក្សានៅប្រទេសកូរ៉េ ជីវិតរស់នៅ និងបទពិសោធន៍សិក្សានៅកូរ៉េ និងអំពីប្រព័ន្ធអប់រំនៅកូរ៉េ ព្រមទាំងការចូលរួមចំណែករបស់ពួកគេសម្រាប់ការអភិវឌ្ឍប្រទេស ក្រោយពេលបញ្ចប់ការសិក្សា។
សូមបញ្ជាក់ថា ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានប្រកាសថា តបតាមការអញ្ជើញរបស់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា លោក មូន ចេអ៊ីន ប្រធានាធិបតីនៃសាធារណរដ្ឋកូរ៉េ នឹងអញ្ជើញមកបំពេញទស្សនកិច្ចផ្លូវរដ្ឋ នៅព្រះរាជាណាចក្រកម្ពុជា ចាប់ពីថ្ងៃទី១៤ ដល់ថ្ងៃទី១៦ ខែមីនា ឆ្នាំ២០១៩។
សេចក្តីប្រកាសព័ត៌មាន ចុះថ្ងៃទី០៤ ខែមីនា ឆ្នាំ២០១៩ បង្ហាញថា ក្នុងអំឡុងពេលទស្សនកិច្ចនេះ លោក មូន ចេអ៊ីន នឹងចូលគាល់ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា នៅព្រះបរមរាជវាំង ហើយនិងជួបជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
សេចក្តីប្រកាស លើកឡើងទៀតថា លោកប្រធានាធិបតី មូន ចេអ៊ីន និងសម្តេចតេជោនាយករដ្ឋមន្រី្ត ហ៊ុន សែន នឹងពិភាក្សាអំពីការជម្រុញទំនាក់ទំនងទ្វេភាគី និងការពង្រីកកិច្ចសហប្រតិបត្តិការលើវិស័យនានាបន្ថែមទៀត ហើយក៏ផ្លាស់ប្តូរយោបល់គ្នាផងដែរ លើបញ្ហាតំបន់ និងអន្តរជាតិ ដែលជាកង្វល់ និងផលប្រយោជន៍រួម។ បន្ទាប់ពីបញ្ចប់ជំនួប ថ្នាក់ដឹកនាំទាំងពីរ នឹងអញ្ជើញធ្វើជាសាក្សីក្នុងពិធីចុះហត្ថលេខាលើកិច្ចព្រមព្រៀងមួយចំនួន និងធ្វើសេចកី្តប្រកាសព័ត៌មានរួមគ្នា។
ក្រសួងការបរទេស បន្តថា លោកប្រធានាធិបតី មូន ចេអ៊ីន និងសម្តេចតេជោនាយករដ្ឋមន្ត្រី ហ៊ុន សែន ក៏រំពឹងថា នឹងអញ្ជើញថ្លែងសុន្ទរកថាក្នុងវេទិកាធុរកិច្ចកម្ពុជា-សាធារណរដ្ឋកូរ៉េ ដើម្បីលើកទឹកចិត្តឲ្យមានការវិនិយោគ ការផ្លាស់ប្តូរសេដ្ឋកិច្ច និងពាណិជ្ជកម្មកាន់តែច្រើនឡើង រវាងប្រទេសទាំងពីរ។
សេចក្តីប្រកាស បន្ថែមថា ទស្សនកិច្ចលើកដំបូង មកកាន់កម្ពុជារបស់លោកប្រធានាធិបតីមូន ចេអ៊ីន គឺជាព្រឹតិ្តការណ៍ដ៏សំខាន់ក្នុងទំនាក់ទំនងកម្ពុជា-សាធារណរដ្ឋកូរ៉េ ដែលនឹងពង្រឹងមិត្តភាព ហើយនឹងធ្វើឲ្យកិច្ចសហប្រតិបត្តិការរវាងប្រទេសទាំងពីរកាន់តែមានវិសាលភាពទូលំទូលាយ និងស៊ីជម្រៅ។
.ប្រវត្តិរូបសង្ខេបរបស់លោក មូន ចេអិន៖
កើតនៅថ្ងៃទី២៤ ខែមេសា ឆ្នាំ១៩៥៣ លោក មូន ចេអិន បានចូលកាន់តំណែងជាប្រធានាធិបតី ទី១៩ របស់កូរ៉េខាងត្បូង កាលពីថ្ងៃទី១០ ខែឧសភា ឆ្នាំ២០១៧ បន្តពីលោកស្រី ផាក ឃុនហេ។
ជាអតីតសកម្មជននិស្សិត ជាមេធាវីផ្នែកសិទ្ធិមនុស្ស និងធ្លាប់ជានាយកខុទ្ទកាល័យរបស់លោកប្រធានាធិបតី រូ មូយុន កាលពីឆ្នាំ២០០៧-២០០៨ លោក មូន ចេអិន ជាអតីតប្រធានគណបក្សប្រជាធិបតេយ្យ Democratic Party នៅឆ្នាំ២០១៥-២០១៦។ លោកមូនចេអិន ក៏ជាសមាជិកទី១៩ នៃរដ្ឋសភាកូរ៉េ កាលពីឆ្នាំ២០១២-២០១៦។
លោក មូន ចេអិន ជាបេក្ខជនប្រធានាធិបតីកូរ៉េ នៅអតីតគណបក្ស Democratic United Party នៅក្នុងការបោះឆ្នោតប្រធានាធិបតី កាលពីឆ្នាំ២០១២។ តែកាលណោះ លោក មូន ចេអិន ចាញ់ឆ្នោតលោកស្រី ផាក ឃុនហេ។
ក្នុងតំណែងជាប្រធានាធិបតីកូរ៉េខាងត្បូង លោក មូន ចេអិន បានជួបចរចា ៣លើក ជាមួយលោកប្រធានាធិបតីកូរ៉េខាងជើង គីម ជុងអុន គឺនៅខែមេសា ឆ្នាំ២០១៨ នៅខែឧសភា ឆ្នាំ២០១៨ និងនៅខែកញ្ញា ឆ្នាំ២០១៨៕
