រាជធានីភ្នំពេញ ៖ ស្ត្រីម្នាក់បានប្រើល្បិចធ្វើជាទៅរកទិញគ្រឿងអលង្ការមាស នៅតូបលក់មាសមួយកន្លែង ស្ថិតនៅក្នុងផ្សារពោធិ៍ចិនតុង ដោយពេលទៅដល់បានសុំអ្នកលក់ឲ្យយកចិញ្ចៀន១វង់ យកមកមើល ពេលនោះអ្នកលក់ក៏បានយកឲ្យមើល ហើយខណៈពេលអ្នកលក់រវល់លក់ឲ្យអ្នកផ្សេងៗទៀត ភ្លេចខ្លួន ស្រាប់តែស្ត្រីដែលជាជនសង្ស័យខាងលើ ធ្វើសកម្មភាពលួចយកចិញ្ចៀនមាស១វង់នោះពាក់ជាប់ដៃ រួចបានព្យាយាមរត់គេចខ្លួន ប៉ុន្តែត្រូវអ្នកលក់ឃើញទាន់ ក៏បានចាប់ខ្លួននាំទៅប្រគល់ជូននគរបាលចាត់ការតាមច្បាប់តែម្ដង ។
ហេតុការណ៏នោះ បានកើតឡើង កាលពីវេលាម៉ោង០៥និង៥០នាទីល្ងាច ថ្ងៃទី២៧ ខែសីហា ឆ្នាំ២០១៧ នៅចំណុចតូបលក់មាសលេខ១០០A ក្នុងផ្សារពោធិ៍ចិនតុង ស្ថិតនៅក្នុងភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ។
ស្ត្រីដែលជាជនសង្ស័យខាងលើនោះឈ្មោះ ទូច ស្រីម៉ៅ អាយុ២៥ឆ្នាំ ស្នាក់នៅម្តុំសំណង់១២ សង្កាត់ទឹកល្អក់៣ ខណ្ឌទួលគោក ។ ចំណែកម្ចាស់តូបលក់មាសឈ្មោះ សួង ដាវី ភេទស្រី អាយុ៣២ឆ្នាំ ស្នាក់នៅក្នុងភូមិដីថ្មី សង្កាត់ភ្នំពេញថ្មី ខណ្ឌសែនសុខ ។ ឬឯចិញ្ចៀនមាសដែលត្រូវស្ត្រីខាងលើលួចនោះ មានទម្ងន់២ជី និងត្រូវរឹបអូសយកបានមកវិញភ្លាមៗដែរ មិនបានបាត់បង់ឡើយ ។
នគរបាលបានឲ្យដឹងថា នៅមុនពេលកើតហេតុ ខណៈពេលដែលស្ត្រីជាម្ចាស់តូប កំពុងអង្គុយលក់គ្រឿងអលង្ការមាស នៅក្នុងតូបរបស់ខ្លួនក្នុងផ្សារពោធិ៍ចិនតុង ស្រាប់តែលេចមុខជនសង្ស័យចូលទៅដល់ ហើយបានសួររកទិញចិញ្ចៀនមាស១វង់ និងបានឲ្យអ្នកលក់យកចិញ្ចៀនឲ្យខ្លួនមើល ពេលនោះជនរងគ្រោះ ក៏បានយកចិញ្ចៀន១វង់ឲ្យមើល ។ ស្របពេលនោះដែរ ក៏មានអ្នកផ្សេងទៅរកទិញគ្រឿងអលង្ការនៅតូបនោះដែរ ដែលបានធ្វើឲ្យស្ត្រីដែលជាអ្នកលក់រវល់មិនបានមើលស្ត្រីដែលជាជនសង្ស័យនោះឡើយ បន្ទាប់ពីបានឃើញឱកាសល្អមកដល់ ស្ត្រីដៃឆើតរូបនោះ ក៏បានលួចយកចិញ្ចៀន១វង់នោះពាក់ជាប់ដៃ រួចបានដើរគេចខ្លួនយ៉ាងប្រញាប់ប្រញាល់តែម្ដង ។
ប្រភពដដែលបានបន្តទៀតថា ខណៈនោះត្រូវបានស្ត្រីជាអាជីវករបានក្រឡេកឃើញទាន់ ក៏បានស្រែកថាចោរៗ បង្កឲ្យមានការភ្ញាក់ ផ្អើលពេញក្នុងផ្សារ ហើយស្ត្រីជើងល្អរូបនោះ ត្រូវបានឃាត់ខ្លួនភ្លាមៗ ប៉ុន្តែមិនមាននរណាវាយដំនោះឡើយ ដោយសារតែឃើញស្ត្រីនោះ ទើបសម្រាលកូនផង បន្ទាប់មកអាជីវករលក់មាសបាននាំស្ត្រីសង្ស័យខាងលើ ទៅប្រគល់ជូននគរបាលប៉ុស្ដិ៍កាកាប ដើម្បីសាកសួរ និងកសាងសំណុំរឿងចាត់ការតាមច្បាប់ ។
ហើយតាមការសាកសួរ និងឆែកមើលកាមេរ៉ាសុវត្ថិភាព ស្ត្រីខាងលើនេះ គឺជាមុខសញ្ញាបន្លំលួចគ្រឿងអលង្ការយ៉ាងសកម្មម្នាក់ ដែលបានធ្វើសកម្មភាពជាបន្តបន្ទាប់ ក្នុងពេលកន្លងមក ប៉ុន្តែតែងមានសំណាងបានគេចខ្លួនរួចរហូត ទើបតែពេលនេះត្រូវចាប់ខ្លួនបាន ហើយក្រោយសួរនាំនៅប៉ុស្ដិ៍កាកាប មួយជំហ៊ានរួចមក ជននោះត្រូវបានបញ្ជូនបន្តទៅកាន់ផ្នែកនគរបាលព្រហ្មទណ្ឌខណ្ឌពោធិ៍សែនជ័យ ដើម្បីចាត់ការបន្ត ៕