ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា កាលពីព្រឹកថ្ងៃទី ១១ ខែកុម្ភះ ឆ្នាំ ២០១៩ បានមានប្រសាសន៍ឲ្យដឹងក្នុងពិធីប្រគល់សញ្ញាបត្រដល់និស្សិតនៃ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នៅកោះពេជ្រ សម្តេចតេជោ បានអំពាវនាវដល់បងប្អូនប្រជាពរដ្ឋទូទាំងប្រទេស បន្តចូលរួមសហការធ្វើជំរឿនឲ្យបានគ្រប់ៗគ្នា ព្រោះមកដល់ពេលនេះ គឺនៅសល់តែ៣ថ្ងៃទៀតតែប៉ុណ្ណោះ (រួមទាំងថ្ងៃនេះផងដែរ)។
សម្តេចតេជោ ហ៊ុន សែន បានបញ្ជាក់យ៉ាងច្បាស់បន្ថែមទៀតក្នុងបណ្តាញសង្គមហ្វសេសប៊ុកផ្លូវការដូច្នេះថា «ការចូលរួមជំរឿន គឺមានសារៈសំខាន់ខ្លាំងណាស់ ដើម្បីឲ្យយើងបានដឹងអំពីចំនួនពិតប្រាកដនៃប្រជាពលរដ្ឋទូទាំងប្រទេស ដើម្បីយើងងាយស្រួលរៀបចំគម្រោងយុទ្ឋសាស្រ្តអភិវឌ្ឍប្រទេសជាតិឲ្យបានចំគោលដៅពិតប្រាកដ»។ព្រោះកន្លងមក យើងទទួលបានតួលេខពី៖
១. មន្រ្តីអត្រានុគោលដ្ឋាននៃក្រសួងមហាផ្ទៃ
២. សម្រង់ស្ថិតិពីក្រសួងផែនការ និង
៣. ចំនួនស្ថិតិពីមន្ទីរពេទ្យ ដែលមានអត្រានៃចំនួនទារកកើតជាប្រចាំឆ្នាំ។
«ដូច្នេះឆ្នាំ ២០១៩ នេះ គឺយើងត្រូវការធ្វើជំរឿនជាមួយបងប្អូនប្រជាពលរដ្ឋដោយផ្ទាល់ ដើម្បីទទួលបានព័ត៌មានជាក់លាក់ និងចំនួនពលរដ្ឋពិតប្រាកដ។ សូមអរគុណ ដែលបងប្អូនបានចូលរួមសហការជាមួយមន្រ្តីជំរឿននៅទូទាំងប្រទេស»៕
