រឿងដែលឈឺក្បាលបំផុតនាពេលបច្ចុប្បន្នសម្រាប់អ្នកប្រើប្រាស់ស្មាតហ្វូន គឺបញ្ហាថ្ម ដែលពេលខ្លះតម្រូវការសាកដល់ទៅ ២ ឬ ៣ ដងក្នុងមួយថ្ងៃ។ ដូចនេះ ដើម្បីស្រាយបញ្ហាមួយកម្រិត Sabay សូមបង្ហាញគន្លឹះមួយចំនួនដែលជួយឲ្យស្មាតហ្វូនអាចប្រើបានយូរម៉ោងជាងមុន។
បើអាច កុំបើកចោល Wi-Fi, Bluetooth និង GPS។ មុខងារទាំងនេះ គឺសម្រួលការងារជាច្រើនប៉ុន្តែប្រសិនបើមិនចាំបាច់ ឬមិនត្រូវប្រើ គឺគួរតែបិទវាចោលតែម្ដង ព្រោះបច្ចេកវិទ្យាទាំងនេះអាចឲ្យស្មាតហ្វូនឆាប់អស់ថ្ម។
បិទមុខងារ Notification។ កម្មវិធីនានារបស់ស្មាតហ្វូន គឺច្រើនតែមានមុខងារ Notification ដែលសម្រាប់បង្ហាញអ្នកប្រើប្រាស់នូវព័ត៌មានថ្មីៗបានយ៉ាងរហ័ស ប៉ុន្តែការដំណើរការមុខងារនេះជាប់ ក៏ប្រៀបបានការប្រើស្មាតហ្វូនជាប់ផងដែរ។
ជ្រើសរើសការផ្ញើសារ ជំនួសឲ្យការហៅចេញ។ វិធីនេះគឺសឹងតែចំណេញថ្មបានដល់ពាក់កណ្ដាល ប៉ុន្តែគ្រាន់មិនសូវមានអ្នកនិយមប្រើប្រាស់ព្រោះវាហាក់មានការស្មុគស្មាញ។
គួរកាត់បន្ថយពេលចុចស្មាតហ្វូន។ សម្រាប់អ្នកមួយចំនួនតែងលើកស្មាតហ្វូនមកចុចបើកជារើយៗ ទោះជាគ្មានការអ្វីក៏ដោយ ខណៈការចុចបើកមើលព័ត៌មាននានានៃស្មាតហ្វូន ក៏អាចធ្វើឲ្យវាឆាប់អស់ថ្មផងដែរ។
កុំបើកពន្លឺអេក្រង់ភ្លឺពេក។ ដែលចំណុចនេះ មិនត្រឹមជួយស្មាតហ្វូនមានថ្មប្រើបានយូរនោះទេ ប៉ុន្តែវាក៏អាចជួយឲ្យភ្នែកអ្នកប្រើប្រាស់មិនមានផលប៉ះពាល់ពីពន្លឺអេក្រង់ស្មាតហ្វូនបានផងដែរ៕