ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានជួបពិភាក្សាការងារជាមួយលោក Qin Yizhi អនុរដ្ឋមន្ត្រីក្រសួងរដ្ឋបាល និងបទបញ្ញាតិទីផ្សារនៃប្រទេសចិន នៅថ្ងៃអង្គារទី២៣ ខែមេសា ឆ្នាំ២០១៩នេះ។
លោក Qin Yizhi បានជម្រាបជូន សម្តេចតេជោ អំពីទំនាក់ទំនងរវាងប្រទេសយើងទាំងពីរ កម្ពុជា-ចិន គឺមានតាំងពីជាង២០០០ឆ្នាំ មកហើយ ដែលបានស្ថាបនាឡើងដោយបុព្វបុរសនៃប្រទេសទាំងពីរបន្សល់ទុកឲ្យយើងមកដល់សព្វថ្ងៃ។ លើសពីនេះ ប្រទេសទាំងពីរកំពុងតែសប្បាយរីករាយ និងទទួលបានផ្លែផ្កាយ៉ាងល្អប្រសើរអំពីទំនាក់នងដូចជាបងប្អូន ដែលកំពុងរីកចម្រើនដុះដាលពីមួយឆ្នាំទៅមួយឆ្នាំ។
លោក Qin បានបញ្ជាក់ថា ជាភ័ព្វសំណាងណាស់ដែលប្រទេសយើងទាំងពីរ កម្ពុជា-ចិន បានដាក់ចេញនូវនយោបាយយ៉ាងត្រឹមត្រូវដែលនាំឲ្យសេដ្ឋកិច្ចកម្ពុជាមានការអភិវឌ្ឍន៍ ស្របជាមួយនឹងវិស័យផ្សេងៗទៀតយ៉ាងល្អប្រសើរ។ តាមរយៈទំនាក់ទំនងដ៏ល្អ និងគោលនយោបាយត្រឹមត្រូវនេះ បានធ្វើឲ្យកម្ពុជាទទួលនូវផលប្រយោជន៍យ៉ាងច្រើនពីកិច្ចសហប្រតិបត្តិការ ដែលក្នុងនោះមានវិស័យកសិកម្ម វិស័យថាមពល និងហេដ្ឋារចនាសម្ព័ន្ធជាដើម។ ទន្ទឹមនឹងនេះ លោក Qin នឹងជម្រុញកិច្ចសហប្រតិបត្តិការលើវិស័យកសិកម្ម ក្នុងការនាំចូលដំណាំកសិផលផ្សេងៗទៅកាន់ប្រទេសចិនឲ្យបានកាន់តែច្រើន។
សម្តេចតេជោ ហ៊ុន សែន នាយករដ្ឋមន្ត្រីបានថ្លែងអំណរគុណយ៉ាងជ្រាលជ្រៅ ចំពោះ លោក Qin Yizhi ដែលបានលើកឡើងពីទំនាក់ទំនងយ៉ាងល្អរវាងប្រទេសយើងទាំងពីរ ដែលជាកត្តាសំខាន់ក្នុងការជំរុញការអភិវឌ្ឍនៅកម្ពុជា។ ទន្ទឹមនឹងនេះដែរ សម្តេចតេជោ បានស្នើសុំឲ្យលោក Qui បន្តសហការល្អជាមួយភាគីកម្ពុជាដើម្បីជួយត្រួតពិនិត្យធ្វើយ៉ាងណាឲ្យកសិផលកម្ពុជាអាចនាំចេញទៅប្រទេសចិនបានកាន់តែច្រើន ជាពិសេសតាមរយៈពង្រឹងការពិនិត្យចត្តាឡីសក្តិ និងភូតគាអនាម័យលើដំណាំកសិផលរបស់កម្ពុជា ។
ជាងនេះទៅទៀតសម្តចតេជោនាយករដ្ឋមន្ត្រី បានមានប្រសាសន៍គាំទ្រយ៉ាងខ្លាំដល់ក្រសួងនៃប្រទេសយើងទាំងពីរបានធ្វើការជាមួយគ្នាកន្លងមក ជាពិសេសក្នុងការអភិវឌ្ឍធនធានមនុស្ស។ ទន្ទឹមនឹងនេះ សម្តេចតេជោនាយករដ្ឋមន្ត្រី បានលើកទឹកចិត្តឲ្យបន្តកិច្ចសហប្រតិបត្តិការវាងក្រសួងនៃប្រទេសទាំងពីរឲ្យកាន់តែល្អរឹងមាំថែមទៀត។
សម្តេចតេជោ ហ៊ុន សែន បានមានប្រសាសន៍គាំទ្រ និងលើកទឹកចិត្តដល់វិនិយោគគិនចិនឲ្យបន្តការវិនិយោគជាមួយនឹងជំនឿទុកចិត្តខ្ពស់មកលើការដឹកនាំរបស់ សម្តេចផ្ទាល់ និងការគាំទ្រនិងចង្អុលបង្ហាញរបស់លោកប្រធានាធិបតីចិន ស៊ី ជីនពីង ដែលបានចាត់ទុកគ្នាជាដៃគូយុទ្ឋសាស្ត្រគ្រប់ជ្រុងជ្រោយ និងជាមិត្តដែកថែបដែលស្ថិតស្ថេររឹងមាំជាដរាប។
សម្តេចតេជោនាយករដ្ឋមន្ត្រីជម្រាបជូន លោក Qin ផងដែរអំពីគម្រោងអញ្ជើញទៅចូលរួមកិច្ចប្រជុំផ្លូវ១ខ្សែក្រវ៉ាត់មួយនៅទីក្រុងប៉េកាំង ចាប់ពីថ្ងៃទី ២៥ ដល់ ២៩ មេសា ខាងមុខនេះ ដែលសម្តេចតេជោ គ្រោងនឹងអញ្ជើញជួប លោកប្រធានាធិបតីចិន ស៊ីជីន ពីង និងលោកនាយករដ្ឋមន្ត្រីចិន លី ឃឺជាំង ផងដែរ៕
