យោងតាមហ្វេសប៊ុកផ្លូវការ សម្តេចតេជោ ហ៊ុន សែន បានលើកឡើងកាលពីថ្ងៃអាទិត្យ ទី០៥ ខែឧសភា ឆ្នាំ២០១៩ ថា «ខ្ញុំសូមផ្ញើរនូវក្តីនឹករលឹក និងអរគុណយ៉ាងជ្រាលជ្រៅបំផុតចំពោះបងប្អូនឥស្លាមកម្ពុជា ដែលបានចូលរួមថែរក្សាសុខសន្តិភាព ហើយមានជំនឿជឿជាក់លើការដឹកនាំរបស់ខ្ញុំ និង របស់គណបក្សប្រជាជនកម្ពុជា តាំងពីដើមរៀងមក»។
សម្តេចតេជោ ហ៊ុន សែន បន្ថែមថា «ខ្ញុំសូមបួងសួងសុំអោយបងប្អូនទាំងអស់ទទួល បាននូវសេចក្កីសុខសប្បាយ ក្ដីមេត្តា ករុណា ពីអល់ឡោះគ្រប់ៗគ្នា និង សុំអោយអល់ឡោះ ទទួលយកនូវកុសលផល បុណ្យ ខែបួសរ៉ម៉ាឌន ទាំងអស់ដែល បងប្អូនបានប្រតិបត្តិ សាងឡើងកុំបីអាក់ខានឡើយ»។
សូមរម្លឹកថា ទីស្តីការគណៈរដ្ឋមន្ត្រី ក្នុងលិខិតកាលពីថ្ងៃទី០៩ ខែមេសា ឆ្នាំ២០១៩ បានលើកឡើងថា សម្តេចតេជោ នាយករដ្ឋមន្ត្រី ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន នឹងអញ្ជើញជាអធិបតីដ៏ខ្ពង់ខ្ពស់បំផុត ក្នុងពិធីស្រាយបួសខែរ៉ាម៉ាឌន លើកទី៦ ឆ្នាំ២០១៩ នៅថ្ងៃទី០៧ ខែឧសភា ឆ្នាំ២០១៩ នៅមជ្ឈមណ្ឌលកោះពេជ្រ ក្នុងរាជធានីភ្នំពេញ។
កាលពីថ្ងៃទី២៧ ខែមីនា ឆ្នាំ២០១៩ ឯកឧត្តម អូស្មាន ហាស្សាន់ ទេសរដ្ឋមន្ត្រី ទទួលបន្ទុកបេសកកម្មពិសេស បានសរសេរលិខិត ស្នើសុំអនុញ្ញាតរៀបចំពិធីស្រាយបួសខែរ៉ាម៉ាឌន របស់សាសនិកខ្មែរឥស្លាម លើកទី៦ ឆ្នាំ២០១៩ នៅមជ្ឈមណ្ឌលកោះពេជ្រ និងសូមគោរពអញ្ជើញ សម្តេចតេជោ នាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត ចូលរួមជាអធិបតីដ៏ខ្ពង់ខ្ពស់បំផុត នៅថ្ងៃទី០៧ ខែឧសភា ឆ្នាំ២០១៩។
ចំពោះការស្នើសុំអនុញ្ញាតនេះ ត្រូវបានសម្តេចតេជោ នាយករដ្ឋមន្ត្រី ហ៊ុន សែន បានចារផ្ទាល់ដៃ កាលពីថ្ងៃទី០៨ ខែមេសា ឆ្នាំ២០១៩។
សូមបញ្ជាក់ថា ជារៀងរាល់ឆ្នាំ សម្តេចតេជោ នាយករដ្ឋមន្ត្រី ហ៊ុន សែន តែងតែអញ្ជើញចូលរួម ក្នុងពិធីពិសារអាហារស្រាយបួសរបស់បងប្អូនខ្មែរឥស្លាម ដែលបង្ហាញពីភាពស្និទ្ធស្នាលរវាងប្រមុខថ្នាក់ដឹកនាំប្រទេស ដែលកាន់សាសនាព្រះពុទ្ធ ជាមួយប្រជាពលរដ្ឋ ដែលកាន់សាសនាឥស្លាម ក៏ដូចជា សាសនាផ្សេងៗទៀត ធ្វើឲ្យសាសនិកឥស្លាមនៅកម្ពុជា និងពិភពលោក មើលឃើញកាន់តែច្បាស់ នូវការផ្តល់ភាពសុខដុមយ៉ាងកក់ក្តៅ នៃក្តីស្រឡាញ់ដ៏ជ្រាលជ្រៅ មកលើសាសនិកឥស្លាម ដូចគ្នាទៅនឹងប្រជាពលរដ្ឋកម្ពុជាទាំងមូល។
សូមរម្លឹកថា បងប្អូនសាសនិកឥស្លាមកម្ពុជា ក្នុង និងក្រៅប្រទេស រួមទាំងបងប្អូនសាសនិកឥស្លាម នៅទូទាំងពិភពលោក បានចូលបួសខែរ៉ម៉ាឌន ឬរ៉ម៉ាទន នៅថ្ងៃទី១ ខែរ៉ម៉ាឌន ក្នុងរយៈពេល ១ខែ ដោយសាសនិកឥស្លាម ត្រូវតមមិនបរិភោគអាហារ សូម្បីតែលេបទឹកមាត់ ចាប់ពីថ្ងៃរះ ដល់ថ្ងៃលិច ជាដើម។
មូលនិធិអភិវឌ្ឍន៍មុស្លិមកម្ពុជា បានផ្សព្វផ្សាយនូវគោលបំណង និងអត្ថប្រយោជន៍នៃការបួសក្នុងសាសនាឥស្លាម រ៉ម៉ាទន រួមមាន៖ ជម្រះសម្អាតខ្លួន ហ្វឹកហាត់ខ្លួន ជាអ្នកគោរពយ៉ាងពេញលេញ ទោះបីត្រូវផ្តាច់ពីចំណង់របស់ខ្លួន អប់រំឆន្ទៈ តស៊ូស្មារតី ហាត់អត់ធ្មត់ បដិវត្តន៍ទម្លាប់។ សាសនិកឥស្លាម ដែលបួស នៅខែរ៉ាម៉ាឌន ក៏ទទួលបាននូវសេចក្តីមេត្តាធម៌ ការលើកលែងទោសកំហុស ដែលមាន និងការដោះលែងពីនរក ដោយការប្រោសប្រណីពីអល់ឡោះផងដែរ៕
