ដីកាកោះហៅ ដាច់ដោយឡែកពីគ្នាទាំងនោះ ត្រូវបានតំណាងអយ្យការអមសាលាដំបូង ខេត្តបាត់ដំបង បានតម្រូវឲ្យអតីតសកម្មជនអតីតគណបក្សសង្គ្រោះជាតិ ចូលឆ្លើយបំភ្លឺនៅតុលាការ ពីដំណើររឿង ប្រឆាំងនឹងសាលដីការបស់តុលាការកំពូល ចុះថ្ងៃទី១៦ ខែវិច្ឆិកា ឆ្នាំ២០១៧។ នោះគឺតុលាការកំពូល បានសម្រេចរំលាយគណបក្សសង្គ្រោះជាតិ និងបានសម្រេច ហាមឃាត់មិនឲ្យអតីតថ្នាក់ដឹកនាំអតីតគណបក្សសង្គ្រោះជាតិ ១១៨នាក់ មិនឲ្យធ្វើនយោបាយ ក្នុងរយៈពេល ៥ឆ្នាំ។
គួររំឮកថា កាលពីថ្ងៃទី១៦ ខែវិច្ឆិកា ឆ្នាំ២០១៧ តុលាការកំពូលបានប្រកាសសាលដីកាសម្រេចរំលាយចោល គណបក្សសង្គ្រោះជាតិ និងហាមឃាត់មិនឲ្យមន្ត្រីរបស់គណបក្សនេះ ចំនួន ១១៨នាក់ មិនឲ្យធ្វើនយោបាយរយៈពេល ០៥ឆ្នាំ តាមបណ្តឹងរបស់ក្រសួងមហាផ្ទៃ។
អតីតសកម្មជនអតីតគណបក្សសង្គ្រោះជាតិ នៅខេត្តបាត់ដំបង ដែលតុលាការកោះហៅទៅសាកសួរ នាពេលនេះ គឺជាអតីតចៅសង្កាត់ មេឃុំ អតីតសមាជិកក្រុមប្រឹក្សាឃុំសង្កាត់ និងអតីតសមាជិកក្រុមប្រឹក្សាខេត្តក្រុងស្រុកខណ្ឌ។ អ្នកទាំងនេះ ត្រូវបានស្នងការដ្ឋាននគរបាលខេត្តបាត់ដំបង ចាត់ទុកថា ជាក្រុមប្រឆាំងក្រៅច្បាប់ ដែលមានតួនាទី និងមានសកម្មភាពសកម្ម នៅក្នុងមូលដ្ឋាន៕
