លោកឩកញ៉ា ប៊ុន មុនី ទីប្រឹក្សាសមាគមមីក្រូហិរញ្វត្ថុកម្ពុជា និងជាប្រធានក្រុមប្រឹក្សាភិបាលគ្រឹះស្ថានមីក្រូហិរញ្ញវត្ថុ វិថីហ្វាយណាន់ បានមានប្រសាសន៍ថា វិស័យមីក្រូហិរញ្ញវត្ថុបានបំពេញតួនាទីយ៉ាងល្អប្រសើរនៅក្នុងប្រទេសកម្ពុជា ហើយជាពិសេសបានផ្សារភ្ជាប់ការរស់នៅរបស់ប្រជាពលរដ្ឋមូលដ្ឋាន នឹងជួយជំរុញការអភិវឌ្ឍសេដ្ឋកិច្ចក្នុងស្រុកផងដែរ។
លោកឩកញ៉ាមានប្រសាសន៍ទៀតថា« ក្នុងន័យសេដ្ឋកិច្ចកន្លែងណា ដែលគ្មានគ្រឹះស្ថានហិរញ្ញវត្ថុទីនោះគ្មានការអភិវឌ្ឍទេ ហេតុដូច្នោះបានជាគ្រឹះស្ថានមីក្រូហិរញ្ញវត្ថុបានខិតខំប្រឹងប្រែងនាំយកសេវាកម្មទំាងអស់នេះដល់មូលដ្ឋានប្រជាពលរដ្ឋ ដែលមានជីវភាពខ្វះខាតធ្វើឲ្យពួកគាត់ទទួលបានសេវាកម្មហិរញ្ញវត្ថុដើម្បីយកទៅពង្រីកអាជីវកម្មផ្សេងៗ»។
អ្នកជំនាញខាងលើបញ្ជាក់ថា គោលដៅសំខាន់របស់សេវាកម្មមីក្រូហិរញ្ញវត្ថុចូលរួមចំណែកក្នុងការអភិវឌ្ឍន៍អាជីវកម្ម ហើយបើសិនជាស្ថាប័នហិរញ្ញវត្ថុមានការទទួលស្គាល់ និងចុះបញ្ជីពីធនាគារជាតិនៃកម្ពុជាពិតប្រាកដកនោះ។
សម្រាប់ លោក ចាន់ សុផល នាយកវិទ្យាស្ថានសិក្សាគោលនយោបាយបានអះអាងថា វិស័យមីក្រូហិរញ្ញវត្ថុចូលរួមចំណែកយ៉ាងច្រើន សម្រាប់ប្រជាពលរដ្ឋកម្ពុជានៅពេលដែលពួកគាត់ទទួលបានកម្ចីពីស្ថាប័នហិររញ្ញវត្ថុយកទៅប្រើប្រាស់ ដើម្បីយកទៅពង្រីកអាជីវកម្មនិងទទួលបានចំណូលដល់គ្រួសារ។
លោកបានបន្តទៀតថា បើសិនជាការខ្ចីឥណទានរបស់ប្រជាពលរដ្ឋយកទៅវិនិយោគទិញសម្ភារៈឬគ្រឿងចក្រ ដើម្បីអភិវឌ្ឍន៍ក្នុងតំបន់ និងមូលដ្ឋានអាចជម្រុញដល់សេដ្ឋកិច្ចជាតិ ប៉ុន្តែការវិនិយោគបែបនោះលុះត្រាតែចំទិសដៅពិតប្រាកដ។
លោក ចាន់ សុផល បន្ថែមថា ការរីកចម្រើនវិស័យហិរញ្ញវត្ថុជួយជំរុញផ្នែកសេដ្ឋកិច្ចជាតិតាមរយៈការ ជម្រុញការអភិវឌ្ឍន៍មូលដ្ឋានជាពិសេស ផ្នែកអាជីវកម្មខ្នាតតូច និងមធ្យមដែលពួកគាត់ត្រូវការមូលធន សម្រាប់ពង្រីកអាជីវកម្ម។
វិស័យមីក្រូហិរញ្ញវត្ថុនៅកម្ពុជាបានដើរតួនាទីយ៉ាងសំខាន់ក្នុងការកៀរគរប្រាក់សន្សំរបស់សាធារណជន និងប្រភពទុនផ្សេងៗទៀតក្នុងទីផ្សារអន្តរជាតិ មកចាក់បញ្ចូលទៅក្នុងសេដ្ឋកិច្ចជាតិ តាមរយៈការផ្ដល់ហិរញ្ញប្បទាន និងឥណទានដល់ការវិនិយោគ ជាពិសេសដល់វិស័យផលិតកម្ម សហគ្រាសធុនតូច និងមធ្យម ដើម្បីលើកកម្ពស់ស្ដង់ដាផលិតផល រួមចំណែកបង្កើនប្រសិទ្ធភាពសេដ្ឋកិច្ចជាតិ ៕
