ក្រសួងទេសចរណ៍បានជូនដំណឹងជាផ្លូវការថា ដោយទទួលបានការអនុញ្ញាតដ៏ខ្ពង់ខ្ពស់ពីរាជរដ្ឋាភិបាលកម្ពុជា ក្រសួងទេសចរណ៍ រួមសហការជាមួយនឹងក្រសួងវប្បធម៌ និងវិចិត្រសិល្បៈ ក្រសួង ពាណិជ្ជកម្ម រដ្ឋបាលខេត្តកំពត គណៈកម្មាធិការជាតិអូឡាំពិកកម្ពុជា សភាពាណិជ្ជកម្មខេត្តកំពត ក្រសួង ស្ថាប័នពាក់ព័ន្ធ និង ផ្នែកឯកជន នឹងរៀបចំពិធីបុណ្យសមុទ្រលើកទី១១ ជុំទី៣ ក្រោមប្រធានបទ “អបអរបេតិកភណ្ឌ និងចីរភាពនៃតំបន់ឆ្នេរ” ដែលនឹងប្រព្រឹត្តទៅចាប់ពីថ្ងៃសុក្រ ១៣កើត ដល់ថ្ងៃអាទិត្យ ១៥កើត ខែមិគសិរ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៣ ដល់ ថ្ងៃទី១៥ ខែធ្នូ ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃ ព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នៅខេត្តកំពត ។
ខណៈនេះរដ្ឋបាលខេត្តកំពតជាម្ចាស់ផ្ទះក៏បានត្រៀមរួចជាស្រេចដែរ តាមរយៈសកម្មភាពជាក់ស្តែង និងសេចក្តីណែនាំតាំងពី ថ្ងៃទី១ ខែវិច្ឆិកា ឆ្នាំ២០២៤។បញ្ជាក់ដោយក្រសួងទេសចរណ៍ព្រឹត្តិការណ៍ដ៏អធិកអធមនេះត្រូវបានរៀបចំឡើងក្នុងគោលបំណងជំរុញការលើកតម្លៃផលិតផល និងផ្សព្វផ្សាយសក្តានុពលទេសចរណ៍ ពិសេសការអបអរបេតិកភណ្ឌ និង អេកូទេសចរណ៍ និងនៅតំបន់ឆ្នេរសមុទ្រកម្ពុជា។
សម្រាប់ពិធីបុណ្យសមុទ្រលើកទី១១ ជុំទី៣ ឆ្នាំ២០២៤ គណៈកម្មការអន្តរក្រសួងគ្រោងរៀបចំសកម្មភាព និងព្រឹត្តិការណ៍សំខាន់ៗមួយចំនួន។ក្នុងនោះ ១. ការផ្សាយផ្ទាល់នូវការសម្តែងទស្សនីយភាពសិល្បៈ ការប្រគំតន្ត្រី ដោយមានការចូលរួមពីសំណាក់ក្រុមសិល្បករ សិល្បការិនី ជាតិនិងអន្តរជាតិ តារាចម្រៀងល្បីៗប្រចាំព្រះរាជាណាចក្រកម្ពុជា ព្រមទាំងការអុជកាំជ្រួចអបអរសាទរពិធីបុណ្យ សមុទ្រលើកទី១១ ជុំទី៣ ឆ្នាំ២០២៤។២. មហោស្រពម្ហូបអាហារ និងភេសជ្ជៈ ព្រមទាំងការបង្ហាញផលិតផល និងគម្រោងអភិវឌ្ឍន៍ទេសចរណ៍របស់ខេត្តតាម តំបន់ឆ្នេរ ព្រមទាំងការតាំងពិព័រណ៍ផលិតផលកសិទេសចរណ៍ និងផលិតផលក្នុងស្រុក និង៣. សកម្មភាពកីឡាលើទឹក និងកីឡាលើឆ្នេរខ្សាច់ មានការចូលរួមពីសំណាក់ក្រុមកីឡាករ កីឡាការិនីជាតិ និងអន្តរជាតិ។
សូមរំលឹកថា ពិធីបុណ្យសមុទ្រលើកទី១០ ជុំទី៣ បានប្រព្រឹត្តធ្វើចាប់ពីថ្ងៃទី១ ដល់ថ្ងៃទី៣ ខែធ្នូ ឆ្នាំ២០២៣នៅខេត្តកែប។
គប្បីជម្រាបជូនថា បុណ្យសមុទ្រលើកទី១ បានរៀបចំនៅខេត្តព្រះសីហនុឆ្នាំ២០១១ ក្នុងឱកាសបុណ្យឆ្លងឆ្នាំសកលចូលឆ្នាំ២០១២តែម្តង។រាជរដ្ឋាភិបាលបានសម្រេចធ្វើពិធីបុណ្យសមុទ្រជារៀងរាល់ឆ្នាំបន្ទាប់ពីកម្ពុជា បានទទួលវិញ្ញាបនបត្របញ្ជាក់ ពីឆ្នេរខ្សាច់ស្អាតលំដាប់ពិភពលោកកាលពីថ្ងៃទី២៥ ខែឧសភា ២០១១ នៅប្រទេសសេណេហ្គាល់ ក្នុងមហាសន្និបាត លើកទី៧ របស់ក្លឹបឆ្នេរខ្សាច់ ដែលមានសមាជិក២៦ប្រទេស។
បុណ្យសមុទ្ររៀបចំឡើងដោយឈរលើគោលការណ៍នៃការឆ្លាស់វេនគ្នានៅខេត្តតំបន់ឆ្នេរទាំង៤ (ព្រះសីហនុ កោះកុង កំពត កែប ) ។ គោលបំណងនៃពិធីបុណ្យសមុទ្រ គឺដើម្បីរួមគ្នាអភិរក្សការពារធនធានធម្មជាតិសមុទ្រ និងថែរក្សាបរិស្ថាន ឆ្នេរឱ្យបានស្អាត ដើម្បីបម្រើដល់ការអភិវឌ្ឍទេសចរណ៍ប្រកបដោយចិរភាព និងការទទួលខុសត្រូវ ព្រមទាំងលើក តម្កើងការផ្សព្វផ្សាយគោលដៅទេសចរណ៍តំបន់ឆ្នេរកម្ពុជាឱ្យកាន់តែទូលំទូលាយ ទាក់ទាញទេសចរជាតិ និងអន្តរជាតិមកទស្សនាកាន់តែច្រើន។
ជាការកត់សម្គាល់ បុណ្យសមុទ្រត្រូវបានខកខានមិនបានធ្វើអស់រយៈពេលពីរឆ្នាំ គឺឆ្នាំ២០២០ និង២០២១ ដោយសារតែការរាតត្បាតនៃជំងឺកូវីដ១៩ ។បុណ្យនេះបានរៀបចំឡើងវិញនៅឆ្នាំ២០២២ ក្នុងខេត្តព្រះសីហនុ បន្ទាប់ពីរាជរដ្ឋាភិបាលបានយកឈ្នះលើការរាតត្បាតជំងឺកូវីដ១៩៕
