ក្នុងជំនួបវាងលោករដ្ឋមន្ត្រី វេង សាខុន ជាមួយលោក Tahamoana Macpherson ឯកអគ្គរដ្ឋ​ទូត​នៃប្រទេសញ៉ូវេលហ្សេឡង់ប្រចាំកម្ពុជា ថៃ និងឡាវ នៅថ្ងៃទី១៣ ខែមិថុនានេះ បានពិភាក្សាការងារ ក្នុងគោលបំណងពង្រឹង និងពង្រីក កិច្ចសហប្រតិបត្តិការក្នុងវិស័យកសិកម្មរវាងប្រទេស​ទាំងពីរ។

លោក វេង សាខុន បានបញ្ជាក់ថា ក្រៅពីគម្រោងបន្លែ ផ្លែឈើ ប្រទេសទាំងពីរ (កម្ពុជា-ញ៉ូវេល​ហ្សេឡង់) នឹងពង្រឹង និងពង្រីកថែមមួយកម្រិតទៀត ជាពិសេសលើការងារផលិតកម្មសត្វ ដើម្បី​ចូល​រួមជួយរាជរដ្ឋាភិបាលកម្ពុជាសម្រេចបាននូវចក្ខុវិស័យក្នុងការប្រែក្លាយប្រទេសទៅជាប្រទេសដែលមានចំណូលមធ្យមកម្រិតខ្ពស់នាឆ្នាំ២០៣០។

លោកឯកអគ្គរដ្ឋទូតបានជម្រាបជូនពីវឌ្ឍនភាពនៃការអនុវត្តគម្រោងដំណាំ​សាកវប្បកម្ម ដែលមានឈ្មោះថា “Cambodia Quality Horticulture Initiative” ដែលគម្រោងនេះផ្តោតជាសំខាន់ទៅលើការលើកកម្ពស់គុណភាព និងសុវត្ថិភាពបន្លែនិងផ្លែឈើ តាមរយៈការអនុវត្តកសិកម្មល្អ (Good Agricultural Practices, GAP) ក្នុងការបំពេញខ្សែច្រវាក់ផលិតកម្មកសិកម្ម និងតម្លៃបន្ថែម រួមជាមួយការកសាង សមត្ថភាព និងទំនាក់ទំនងទីផ្សារ ដែលភាគីញ៉ូវេលហ្សេឡង់មានបំណងពង្រីកសកម្មភាពថែមទៀត។

លោក វេង សាខុន ថានឹងចុះពិនិត្យផ្ទាល់ពីគម្រោងនេះ នាថ្ងៃស្អែក ត្រូវនឹងថ្ងៃទី១៤ ខែមិថុនា នៅខេត្តសៀមរាប។ ជាមួយគ្នានេះ ដើម្បីឲ្យគម្រោងទទួលបានជោគជ័យបន្ថែមទៀត ឯក​ឧត្តមបានណែនាំដល់ក្រុមការងាររៀបចំចងក្រងជាឯកសារ ដើម្បីធ្វើការផ្សព្វផ្សាយ និងបង្កើនការបណ្ដុះបណ្ដាលទាំងបច្ចេកទេស ជំនាញ និងការអនុវត្តដល់ប្រជាកសិករ ធ្វើយ៉ាងណាជួយលើកកម្ពស់ជីវភាពរបស់គាត់ឆ្លើយតបទៅនឹងបរិបទនៃកំណើនសេដ្ឋកិច្ច៕