កិច្ចប្រជុំដែលធ្វើឡើង នៅទីស្ដីការក្រសួងមហាផ្ទៃ មានការចូលរួមពីអភិបាលរាជធានី-ខេត្ត ស្នងការរាជធានី-ខេត្ត មេបញ្ជាការកងរាជអាវុធហត្ថរាជធានី-ខេត្ត និងមន្រ្តីពាក់ព័ន្ធជាច្រើនរូបទៀត។
យោងតាមរបាយការណ៍ បានលេីកឡេីងនៅក្នុងកិច្ចប្រជុំដកពិសោធន៍ និងពង្រឹងកិច្ចប្រតិបត្តិការបង្ក្រាបបទល្មើសគ្រឿងញៀននៅតាមក្លឹបកំសាន្ត និងកន្លែងសប្បាយ ផ្សេងៗ ដែលមានការជួញដូរ និងប្រើប្រាស់គ្រឿងញៀន បានឲ្យដឹងថារយៈពេល ០៥ខែដើម ឆ្នាំ២០១៩នេះ កងកម្លាំងអនុវត្តច្បាប់បានបង្ក្រាបបទល្មើសគ្រឿងញៀនសរុបចំនួន ៣.៣៣៥ករណី ឃាត់ខ្លួន ៧.០៩៧នាក់ ចាប់យកសារធាតុញៀនគ្រប់ប្រភេទសរុប ៣១០,៩៨គីឡូក្រាម, កញ្ឆាស្រស់៤៧.១០៣ ដើម រួមនឹងមធ្យោបាយសម្ភារៈ វត្ថុតាងមួយចំនួនទៀត។
– ករណីជួញដូរ ២.០៣៩ករណី ឃាត់ខ្លួន ៣.៨៧៣នាក់
– ករណីសំយោគ
-កែច្នៃ ១ករណី
– ករណីដាំដុះ ១៩ករណី ឃាត់ខ្លួន ៤នាក់
– ករណីប្រើប្រាស់ ១.២៧៦ករណី ឃាត់ខ្លួន ៣.២២០នាក់។
ក្នុងនោះកសាងសំណុំរឿងបញ្ជូនទៅតុលាការចំនួន ២៣២នាក់ បញ្ជូនទៅមណ្ឌលព្យាបាល និងស្តារនីតិសម្បទាចំនួន ២.១០៥នាក់ និងអប់រំធ្វើកិច្ចសន្យាប្រគល់ជូនអាណាព្យាបាលដើម្បីយកទៅព្យាបាលបន្សាបនៅតាមសហគមន៍ចំនួន ៨៨៣នាក់។ ដោយឡែកអនុវត្តដីកាបាន ១១០ដីកា ឃាត់ខ្លួន ១០៩នាក់។
សូមបញ្ជាកលថាសមត្ថកិច្ចបង្ក្រាបករណីធំៗ ដែលមានសារធាតុញៀនចាប់ពី ០១គីឡូក្រាមឡើង មានចំនួន២០ករណី ចាប់យកសារធាតុញៀនសរុប ២៨៨,៣៨គីឡូក្រាម និងចាប់បានមេក្លោងចំនួន ១២នាក់ ខ្សែរយៈបណ្តាញចំនួន ៥២នាក់។
ផ្អែកតាមរបាយការណ៍ដែលទទួលបានពីលេខាធិការដ្ឋាន នៃគណៈបញ្ជាការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនលើកទី៤ រាជធានី ខេត្ត បានឲ្យដឹងថា ក្នុងចំណោមគោលដៅអាជីវកម្ម ក្លឹបកំសាន្តទីតាំងសប្បាយដ្ឋានចំនួន ៧.១១៣ទីតាំង ត្រូវបានសមត្ថកិច្ចចុះផ្សព្វផ្សាយអប់រំ ធ្វើកិច្ចសន្យា ដើម្បីស្នើសុំកិច្ចសហការក្នុងការបង្ការ ទប់ស្កាត់ការជួញដូរ និងប្រើប្រាស់គ្រឿងញៀនបានចំនួន ៣.៧៤១កន្លែង ស្មើនឹង៥២% ៕
