(ភ្នំពេញ)៖ ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន នៅព្រឹកថ្ងៃទី២៨ ខែមករា ឆ្នាំ២០១៩នេះ បានព្រមានប្រធានស្ថានីយថ្លឹងរថយន្តនានា ឲ្យឈប់យកលុយសូកប៉ាន់ពីរថយន្តផ្ទុកលើសទម្ងន់ ដើម្បីជាថ្នូរមិនឲ្យរថយន្តលើ្មសច្បាប់ឡើងលើជញ្ជីង។
លោកទេសរដ្ឋមន្ត្រី បានមានប្រសាសន៍ទៀតថា មន្ត្រីបម្រើការនៅតាមស្ថានីយថ្លឹងជញ្ជីង ត្រូវធ្វើការឱ្យបានម៉ត់ចត់ ដោយឲ្យឡានឡើងថ្លឹងឱ្យបានពិតប្រាកដ ហើយបើរកឃើញថា ផ្ទុកលើសទម្ងន់ ត្រូវតែផាកពិន័យ មិនអាចឱ្យគេឆ្លងកាត់ ដោយមិនថ្លឹង ឬថ្លឹងហើយយកលុយគេឡើយ។
លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រី ក្រសួងសាធារណការ និងដឹកជញ្ជូន បានថ្លែងបែបនេះ ក្រោយពីពិធីចុះហត្ថលេខាលើកិច្ចព្រមព្រៀងគម្រោងធ្វើឲ្យប្រសើរឡើងវិញ នូវកំណាត់ផ្លូវជាតិលេខ៥ ត្រង់ចំណុចធ្លាម្អម-បាត់ដំបង និងសិរីសោភ័ណ-ប៉ោយប៉ែត ដែលជាគម្រោង ឥណទានសម្បទានពីរដ្ឋាភិបាលជប៉ុន នៅរសៀលថ្ងៃទី២៨ ខែមករា ឆ្នាំ ២០១៩ នៅទីស្តីការក្រសួសាធារណការ និងដឹកជញ្ជូន។
លោក ស៊ុន ចាន់ថុល មានប្រសាសន៍សង្កត់ធ្ងន់ថា «រឿងជញ្ជីងនេះគឺថាសុទ្ធតែរឿងឈឺក្បាល។ ធ្វើឱ្យមុខមាត់ប្រទេសជាតិ, រាជរដ្ឋាភិបាល ក៏មិនល្អដែរ ដោយសារតែកន្លែងជញ្ជីងយើងមានបញ្ហា… យើងមានព័ត៌មាន ថាកន្លែងជញ្ជីងខ្លះ ឡានមិនចូលថ្លឹងផង ឱ្យទៅបាត់ ឱ្យទៅបង់លុយ. យើងខ្ញុំបានព័ត៌មាន គេបញ្ជូនឱ្យយើងខ្ញុំ យើងខ្ញុំមានព័ត៌មាន កន្លែងណាកន្លែងណា ម៉ោងប៉ុន្មាន គេថតឡានឱ្យទៀតផង»។
លោកបានបញ្ជាក់ថា កាលពីម្សិលមិញ លោកបានដកតំណែងប្រធានជញ្ជីង៣កន្លែង បន្ទាប់ពីរកឃើញថា មន្ត្រីទាំងនេះមានកំហុសយកលុយខុសច្បាប់ពីរថយន្តផ្ទុកលើសទម្ងន់ ដើម្បីជាថ្នូរឲ្យធ្វើដំណើរតាមដងផ្លូវ ដោយមិនបាច់ថ្លឹងទម្ងន់ ដែលជាហេតុនាំឲ្យខូចផ្លូវរបស់ជាតិ។
លោកទេសរដ្ឋមន្ត្រីបានបន្ថែមថា កន្លងមក លោកបានដកតំណែងប្រធានស្ថានីយ១៥កន្លែង ដោយសារពួកគេបានប្រព្រឹត្តកំហុសយកលុយពីរថយន្តដឹកលើសទម្ងន់ ដោយមិនបាច់ឡើងថ្លឹងជញ្ជីង ហើយសំណុរឿងរបស់ពួកគេត្រូវបានបញ្ជូនតុលាការថែមទៀតផង។
លោក ស៊ុន ចាន់ថុល បានព្រមានចាត់វិធានចំពោះប្រធានជញ្ជីងទើបតែងតាំងថ្មី ប្រសិនបើរកឃើញកំហុសដូចអ្នកមុន «ឯកសារនៅតុលារនៅឡើយទេ។ បើដាក់អ្នកថ្មីមកប៉ុន្មានកន្លែងនៅមានបញ្ហាដូចដើមទៀត។ ល្មមរៀងហើយ ល្មមរៀងចាលហើយ។ អញ្ចឹងខ្ញុំយកពេល ផ្តាំផ្ញើឱ្យហើយទៅមន្ត្រីយើងខ្ញុំទាំងអស់ឱ្យឈប់»។
សូមបញ្ជាក់ថា គម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ភាគកណ្តាលសរុបប្រវែង ១៤៦.០៤ គ.មដោយចាប់ពី ធ្លាម្អម-បាត់ដំបង មានប្រវែង ១១០.៩០ គ.ម និងរួមបញ្ជូលផ្នែកចុងក្រោយ សិរីសោភ័ណ-ប៉ោយប៉ែត មានប្រវែង ៣៥.១៤ គ.ម។
ក្រុមហ៊ុនដែលទទួលបានសិទ្ធិម៉ៅការសាងសង់គម្រោងនេះសម្រាប់កញ្ចប់ទី១ កញ្ចប់ទី២ និងកញ្ចប់ទី៣ រួមមាន៖១. ក្រុមហ៊ុន ILSUNG-CIENCO1 Joint Venture ២. ក្រុមហ៊ុន OBAYASHI Corporation និង៣.ក្រុមហ៊ុន TEKKEN-IKEE Joint Venture ៕
