ភ្នំពេញ៖ បញ្ហាដីធ្លី នៅតែជាបញ្ហាក្តៅគគុក និងកើតមានឡើងជាបន្តបន្ទាប់តាំងពីអតីត មកដល់បច្ចុប្បន្ន ព្រោះតែអាជ្ញាធរ ដោះស្រាយមិនប្រកបដោយយុត្តិធម៌ ដែលពលរដ្ឋមិនអាចទទួលយកបាន។ ជាក់ស្តែងតាមប្រភពព័ត៌មានច្បាស់ការដែលទទួលបាន គឺ អភិបាលខណ្ឌពោធិ៍សែនជ័យ បានចេញសេចក្តីជូនដំណឹងមួយ ដោយបានប្រកាសពីការចុះបញ្ជីដីធ្លី ដោយចុះវាស់វែងនៅថ្ងៃទី២៨ ខែមីនា ឆ្នាំ២០១៩ស្អែកនេះ លើដីទំហំ១៨ហិកតា ដែលកំពុងមានទំនាស់ រវាងប្រជាពលរដ្ឋ៥៦គ្រួសារ និងតំណាងសមាគមចិន ហើយមិនទាន់ដោះស្រាយចប់នៅឡើយ។
បើយោងតាមលិខិតលេខ០៧៤ ចុះថ្ងៃទី២៦ ខែកុម្ភៈ ឆ្នាំ២០១៨ លោក ហែម ដារិទ្ធិ អភិបាលខណ្ឌពោធិ៍សែនជ័យ ធ្លាប់បានជំរាបជូនប្រធានការិយាល៏យរៀបចំដែនដី នគរូបនីកម្មនិងសំណង់ថា ប្រជាពលរដ្ឋទាំង៥៦គ្រួសារ តាមរយៈតំណាងរបស់ខ្លួន បានដាក់ពាក្យស្នើសុំធ្វើប័ណ្ណកាន់កាប់លើដីខាងលើនោះដែរ តែត្រូវបានលោកបដិសេធ ដោយអះអាងថា ដើម្បីរក្សាផលប្រចោជន៍ជូនគូរទំនាស់ គឺសុំឲ្យរក្សារក្សាស្ថានភាពដើមនៃដីទំនាស់ ទំហំ១៨៣.០០០ម៉ែត្រការ៉េ ដើម្បីរង់ចាំការដោះស្រាយបន្ត។
តែតាមសេចក្តីជូនដំណឹងដែលចុះហត្ថលេខាដោយលោក ហែម ដារិទ្ធិ អភិបាលខណ្ឌពោធិ៍សែនជ័យ ចុះថ្ងៃទី២២ ខែមីនា ឆ្នាំ២០១៩ បែជាប្រកាសឲ្យសាធារណៈជនដឹងថា យោងតាមពាក្យស្នើសុំចុះបញ្ជីដីធ្លី របស់ឈ្មោះ សេង ស៊ីហេង (គូទំនាស់ជាមួយពលរដ្ឋ៥៦គ្រួសារ) បែរជាឲ្យចុះវាស់វែងដីទំនាស់ ស្ថិតនៅភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ នៅថ្ងៃទី២៨ ខែមីនា ឆ្នាំ២០១៩ វេលាម៉ោង៩ព្រឹកទៅវិញ។
ជាមួយគ្នានេះដែរតាមលិខិតលេខ១០៩ ចុះថ្ងៃទី២១ ខែកុម្ភៈ ឆ្នាំ២០១៨ ដែលចុះហត្ថលេខាដោយលោក ឃួង ស្រេង ក៏ប្រកាសឲ្យផ្អាកមិនធ្វើអ្វីទាំងអស់ពាក់ព័ន្ធនឹងដីទំនាស់ខាងលើ ដើម្បីរង់ចាំការដោះស្រាយជាបន្តសិន។ ដូចគ្នានេះដែរ បើយោងលើលិខិតរបស់របស់ខុទ្ធការល័យសម្តេចតេអគ្គមហាសេនាបតីតេជោ ហ៊ុន សែន លេខ៣០ចុះថ្ងៃទី០៨ ខែឧសភា ឆ្នាំ២០១៨ ក៏បានប្រគល់តួនាទី និងភារកិច្ចដោះស្រាយលើដីទំនាស់ខាងលើនេះ ទៅលោក ជា សុផារ៉ា ជាអ្នកទទួលបន្ទុកក្នុងការដោះស្រាយ។
សូមរំឭកថាកាលពីថ្ងៃទី២៤ ខែកញ្ញា ឆ្នាំ២០១៨ ប្រជាពលរដ្ឋចំនួន៥៦គ្រួសារ បានប្រមូលផ្ដុំគ្នាដើម្បីតវ៉ា និងទាមទារយកដីទំហំជាង១៨ហិចតា ដែលមានទីតាំងស្ថិតនៅក្នុងភូមិព្រៃដូនអុក សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ហើយក៏បានចោទប្រកាន់ថា សមាគមចិន ហុកគៀន បានលួចធ្វើឯកសារ ដើម្បីសុំសិទ្ធិគ្រប់គ្រងលើដីរបស់ពួកគាត់។
តាមការបកស្រាយរបស់ប្រជាពលរដ្ឋបានឲ្យថា ដីនោះ គឺសមាគមចិន ហុក គៀន គ្រាន់តែសុំជួសជុលម៉ុងខ្មោចចាស់ៗ តែប៉ុណ្នោះ កាលឆ្នាំ១៩៨៧ ហើយបានសន្យានឹងប្រគល់ជូនប្រជាពលរដ្ឋវិញនៅពេលណាដែលត្រូវការ ឬនៅពេលដែលដែលគេរកដីថ្មី ដើម្បីដាក់ម៉ុងទាំងនោះជំនួសវិញ។
ពលរដ្ឋបន្តថា ក្នុងឆ្នាំ២០១៥ ដល់ពេលរើម៉ុងចេញអស់ ប្រជាពលរដ្ឋបានដឹង និងបានទាមទារយកដីមកគ្រប់គ្រងវិញ ស្រាប់តែសមាគមចិននេះ មិនព្រមប្រគល់ឲ្យ មិនតែប៉ុណ្ណោះបានរំលោភយកដីនោះធ្វើជាកម្មសិទ្ធិខ្លួនឯងទៀត ហើយក៏បាននាំគ្នាទៅតវ៉ាដល់ក្រសួងដែនដីនគរូបនីយកម្ម និងសំណង់ សាលារាជធានីភ្នំពេញ លោកទេសរដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរូបនីយកម្ម និងសំណង់ និងខុទ្ទកាល័យសម្ដេចអគ្គមហាសេនាបតីតេជោហ៊ុន សែន ទៀតផង។
ប្រជាពលរដ្ឋបានលើកឡើងថា យុត្តិធម៌សង្គម គឺពឹងលើមន្រ្តីយុត្តិធម៌ ហើយបើមន្រ្តីពិតជាមានយុត្តិធម៌ អាចធ្វើការស្ទង់មតិបាន តើប្រជាជនប៉ុន្មានភាគរយមានជំនឿ និងទំនុកចិត្តលើមន្រ្តីរាជការ? បើមន្រ្តី(បុគ្គល)ពិតជាយុត្តិធម៌ និងមានប្រសិទ្ធភាព បញ្ហាខ្លះនឹងមិនលំបាកដល់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនោះទេ៕
