(រាជធានីភ្នំពេញ)៖ លោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយក នៃអគ្គនាយកដ្ឋាន ក.ប.ប. ជាសមាជិក និងជាប្រធានលេខាធិការដ្ឋាននៃ គ.ប.ក. នៅព្រឹកថ្ងៃទី៨ ខែកុម្ភៈ ឆ្នាំ២០២៣នេះបានអញ្ជើញចូលរួមក្នុងកិច្ចប្រជុំលើកទី៣ របស់គណៈកម្មាធិការប្រកួតប្រជែងកម្ពុជា ក្រោមអធិបតីភាព លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងជាប្រធានគណៈកម្មាធិការប្រកួតប្រជែងកម្ពុជា «គ.ប.ក.» នៅទីស្ដីការក្រសួងពាណិជ្ជកម្ម។
ក្នុងកិច្ចប្រជុំនេះ មានការអញ្ជើញចូលរួមពី លោក អនុប្រធានអចិន្ត្រៃយ៍ ឯកឧត្ដម លោកជំទាវ អនុប្រធាន និងសមាជិក គ.ប.ក. ព្រមទាំងសហការី នៃអគ្គនាយកដ្ឋាន ក.ប.ប. ផងដែរ។
ក្នុងអង្គប្រជុំនេះបានពិនិត្យ ពិភាក្សា ផ្ដល់ធាតុចូល និអនុម័តលើបទប្បញ្ញត្តិក្រោមច្បាប់ស្តីពីការប្រកួតប្រជែង ចំនួន៣ ដើម្បីធានាឱ្យមានលក្ខណៈគ្រប់ជ្រុងជ្រោយនិងសមស្របតាមលិខិតបទដ្ឋានគតិយុត្តជាធរមាន ដែលរួមមាន៖
(១) សេចក្តីព្រាងប្រកាសស្តីពីបែបបទនិងនីតិវិធីនៃការចេញវិធានការផ្អាកជាបណ្តោះអាសន្ន និង/ឬសេចក្តីសម្រេចរបស់ គ.ប.ក.។
(២) សេចក្តីព្រាងសេចក្តីសម្រេចស្តីពីបែបបទនិងនីតិវិធីនៃការគណនាប្រាក់ផាកពិន័យ។
(៣) សេចក្តីព្រាងសេចក្តីសម្រេចស្តីពីកម្រិតកំណត់នៃការជូនដំណឹងជាមុនអំពីការរួមបញ្ចូលគ្នានៃធុរកិច្ច។
