បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្រ្តី រដ្ឋមន្រ្តីក្រសួងអប់រំ យុវជន និងកីឡា បានថ្លែងពាក់ព័ន្ធនឹងសាលាគោលដៅតេស្ត PISA ចំនួន១៨៦ ដោយនឹងផ្តល់ជាអាទិភាពទី១ ដើម្បីឈានទៅសម្រេចគោលដៅទទួលបានសាលារៀនគំរូ ព្រមគ្នានឹងក្នុងឆ្នាំ២០២៥នេះដែរ សាលារៀនចំនួន២៤៤នឹងត្រូវកំណត់ជ្រើសរើសជាសាលារៀនគំរូ។ឯកឧត្តមឧបនាយករដ្ឋមន្រ្តីបានថ្លែងបែបនេះក្នុងកិច្ចប្រជុំស្តីពីការពិនិត្យវឌ្ឍនភាព និងការកំណត់សាលារៀនគោលដៅឆ្នាំ២០២៥ កាលពីចុងសប្ដាហ៍កន្លងទៅ។
តើអ្វីទៅតេស្ត PISA? តេស្ត PISA គឺជាកម្មវិធីវាយតម្លៃអន្តរជាតិដែលរៀបចំឡើងដោយអង្គការសហប្រតិបត្តិការ និងការអភិវឌ្ឍសេដ្ឋកិច្ច (OECD)។ កម្មវិធីនេះត្រូវបានរៀបចំឡើងជារៀងរាល់៣ឆ្នាំម្តង ដើម្បីវាយតម្លៃចំណេះដឹង និងជំនាញរបស់សិស្សអាយុ១៥ឆ្នាំ ក្នុងវិស័យគណិតវិទ្យា វិទ្យាសាស្ត្រ និងការអាន។គោលបំណងចម្បងរបស់ PISA គឺដើម្បីវាយតម្លៃ និងកែលម្អប្រព័ន្ធអប់រំទូទាំងពិភពលោកដោយផ្តោតលើការធានាថា សិស្សទាំងអស់មានសមត្ថភាពគ្រប់គ្រាន់ក្នុងការចូលរួមយ៉ាងមានប្រសិទ្ធភាពក្នុងសង្គម និងសេដ្ឋកិច្ច។
លោកបណ្ឌិត សុខ សូត្រ ព្រឹទ្ធបុរសមហាវិទ្យាល័យអប់រំ នៃសាកលវិទ្យាល័យភូមិន្ទភ្នំពេញ ក្រសួងអប់រំ យុវជន និងកីឡា បានឱ្យដឹងថា កម្មវិធីតេស្តអន្តរជាតិ PISA បានអនុវត្តចំនួន២ដងរួចមកហើយក្នុងរយៈពេលបន្តបន្ទាប់គ្នា ។លើកទី១ នៅឆ្នាំ២០១៨ (PISA-D) ជាការសាកល្បង និងលើកទី២ PISA ក្នុងឆ្នាំ២០២២។ចំណែកលើកទី៣ គឺក្នុងឆ្នាំ២០២៥នេះ។
លោកបណ្ឌិតបន្ថែមថា តាមរយៈលទ្ធផលតេស្ត PISA ឃើញថា លទ្ធផលសិក្សារបស់សិស្សមានការប្រែប្រួលច្រើនរវាងលទ្ធផលតេស្តឆ្នាំ២០១៨ និងឆ្នាំ២០២២ ប៉ុន្តែស្ថិតក្នុងកម្រិតយឺតបើធៀបនឹងបណ្ដាប្រទេសអាស៊ាន និងប្រទេសអភិវឌ្ឍ។
យោងតាមទិន្នន័យពីអង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍ (OECD) ពិន្ទុមធ្យមរបស់ប្រទេសសមាជិកអាស៊ាន (ASEAN) លើមុខវិជ្ជាអំណាន ៤០៤ពិន្ទុ គណិតវិទ្យា ៤១៨ពិន្ទុ និងវិទ្យាសាស្រ្ត ៤២៤ពិន្ទុ។ ចំណែក ពិន្ទុមធ្យមរបស់ប្រទេសអភិវឌ្ឍ (OECD) លើមុខវិជ្ជាអំណាន ៤៧៦ពិន្ទុ គណិតវិទ្យា ៤៧២ពិន្ទុ និងវិទ្យាសាស្រ្ត ៤៨៥ពិន្ទុ។
សម្រាប់លទ្ធផលតេស្ត PISA-D របស់កម្ពុជានៅឆ្នាំ២០១៨ លើមុខវិជ្ជាអំណាន ៣២១ពិន្ទុ គណិតវិទ្យា ៣២៥ពិន្ទុ និងវិទ្យាសាស្រ្ត ៣៣០ពិន្ទុ ហើយនៅឆ្នាំ២០២២ លទ្ធផលតេស្ត PISA លើមុខវិជ្ជាអំណាន ៣២៩ពិន្ទុ គណិតវិទ្យា ៣៣៦ពិន្ទុ និងវិទ្យាសាស្រ្ត ៣៤៧ពិន្ទុ។
នៅក្នុងកិច្ចប្រជុំស្តីពីការពិនិត្យវឌ្ឍនភាព និងការកំណត់សាលារៀនគោលដៅឆ្នាំ២០២៥នោះ បណ្ឌិតសភាចារ្យ ហង់ជួន ណារ៉ុន បានណែនាំដល់ក្រុមការងារ ឱ្យបន្តចុះជួយគាំទ្រការរៀនបំប៉នតេស្តអន្តរជាតិ (PISA) នៅតាមសាលារៀនគោលដៅបន្ថែម ដោយមានការរៀបចំបញ្ជីឈ្មោះអ្នកឯកទេសលើផ្នែកអំណាន គណិតវិទ្យា និងវិទ្យាសាស្ត្រ ស្របតាមកម្រិតសមត្ថភាពសកល និងជាពិសេសមានក្រុមការងារជំនាញទទួលបន្ទុកក្នុងការរៀបចំស្តង់ដាចម្លើយគំរូ ដើម្បីជួយគាំទ្របន្ថែមសំដៅត្រៀមខ្លួនសម្រាប់ការធ្វើតេស្តកម្រិតអន្តរជាតិ PISA នៅក្នុងខែមិថុនា ខាងមុខនេះ។
ម៉្យាងទៀតដើម្បីឱ្យការងារប្រព្រឹត្តទៅកាន់តែមានប្រសិទ្ធភាព បណ្ឌិតសភាចារ្យ ហង់ជួន ណារ៉ុន បានផ្ដល់អនុសាសន៍ និងទិសដៅបន្តដល់ក្រុមការងារមួយចំនួនទៀត រួមមាន ៖ រៀបចំផែនការសកម្មភាពច្បាស់លាស់ ចុះជួយសាលារៀនគោលដៅ ក្នុងក្របខណ្ឌរួមទាំងគម្រោងនានា និងការគាំទ្រផ្សេងៗ, បន្តចុះគាំទ្រ និងជំរុញការអនុវត្តស្តង់ដាសាលារៀនគំរូ ជាពិសេសចុះបង្វឹកការធ្វើតេស្តស្តង់ដាតាមលំនាំសំណួរតេស្តអន្តរជាតិ PISA ដ៏ដូចជាជំរុញសាលារៀនឱ្យអនុវត្តវិធីសាស្ត្របង្រៀនថ្មីដែលបានអនុវត្តនៅសាលារៀនជំនាន់ថ្មី ដូចជា ការបង្រៀនតាមបែបគម្រោង ការប្រើប្រាស់បច្ចេកវិទ្យាក្នុងការបង្រៀនជាដើម។
ក្នុងនោះរដ្ឋមន្រ្តីក្រសួងអប់រំ ក៏បានណែនាំឱ្យមានការបញ្ជ្រាបការប្រើប្រាស់បញ្ញាសិប្បនិម្មិត (AI) ក្នុងបង្រៀននិងរៀន ក៏ដូចជារៀបចំពិព័រណ៍ស្នាដៃសិស្ស ដើម្បីលើកទឹកចិត្ត និងជួយសិស្សឱ្យចេះស្រមើស្រមៃ និងមានចំណេះដឹងទូលំទូលាយ។ ទន្ទឹមគ្នានេះ ក៏ត្រូវពង្រឹងសមត្ថភាពមន្ត្រីចុះជួយគាំទ្រសាលា តាមតម្រូវការជាក់ស្តែង ជាពិសេសមន្ត្រីទទួលបន្ទុកតាមខេត្តនីមួយៗ ហើយបន្តការគាំទ្រដល់សាលាគោលដៅ ដោយរូបភាពផ្ទាល់ និងតាមអនឡាញ។ អនុវត្តសាលាជួយសាលា ដើម្បីធានាបាននូវនិរន្តភាព តាមរូបភាពផ្សេងៗដូចជា សហការ និងសម្របសម្រួលជាមួយសាលារៀនគំរូបច្ចុប្បន្ន ឱ្យជួយសាលារៀនផ្សេងៗទៀត ៕
