ឧត្ដរមានជ័យ ៖ មានការបែកធ្លាយរឿងលោក អាន់ សំអាត ប្រធានការិយាល័យច្រកចេញចូលតែមួយសាលាខេត្តឧត្ដរមានជ័យ គាបសង្កត់ធ្វើបាប ប្រជាពលរដ្ឋក្រីក្ររាប់ពាន់នាក់ក្នុងមួយៗខែ និងប្រមូលប្រាក់បានរាប់ម៉ឺនដុល្លារ តាមរយៈការផ្ដល់សៀវភៅឆ្លងដែន។ការបែកធ្លាយព័ត៌មាននេះបានកើតឡើងនៅថ្ងៃទី២៦ ខែមិថុនា ឆ្នាំ២០១៩ នេះ ។
ប្រភពបានបន្តថា លោកអាន់ សំអាត បានផ្គើននឹងអនុក្រឹត្យរបស់ក្រសួងមហាផ្ទៃ ក្នុងការផ្ដល់ប័ណ្ណព្រំដែន គឺយកថ្លៃសេវា ចាប់ពី១៤ម៉ឺនរៀល និង១៥ម៉ឺនរៀល ក្នុងសៀវភៅឆ្លងដែនមួយក្បាល ដែលសៀវភៅបន្ទុកក្រសួងមហាផ្ទៃតម្រូវកំណត់ប័ណ្ណព្រំដែនមួយក្បាលតែពីម៉ឺនរៀល។ មិនតែប៉ុណ្ណោះលោកអាន់ សំអាត បានយកលំនៅដ្ឋានរបស់ខ្លួន ធ្វើជាកន្លែងច្រកចេញចូលតែមួយសម្រាប់ធ្វើប័ណ្ណឆ្លងដែន និងបំពេញបែបបទផ្សេងៗដោយមិនបានឆ្លងកាត់ការត្រួតពិនិត្យឯកសារផ្សេងៗពីរដ្ឋបាលសាលាខេត្ត។ គ្រាន់តែមានហត្ថលេខា លោកលឹម សុខតូ អភិបាលរងខេត្តម្នាក់គ្រប់គ្រាន់ ដោយមិនគោរពទៅតាមបទដ្ឋានគតិយុត្តិរបស់ក្រសួងមហាផ្ទៃ ដាក់ចេញដើម្បីឲ្យអនុវត្ត។
សូមបញ្ជាក់ថា ការបំពេញបែបបទសៀវភៅឆ្លងដែនរបស់ច្រកចេញចូលតែមួយសាលាខេត្តឧត្ដរមានជ័យមានតែហត្ថលេខា លោកលឹម សុខតូ អភិបាលរងខេត្តឧត្ដរមានជ័យ តែម្នាក់ ដោយមិនមានការត្រួតពិនិត្យរាល់ឯកសារផ្សេងៗឆ្លងកាត់រដ្ឋបាលខេត្តនោះទេ។
ដោយមានការដាក់ការសង្ស័យថា មានការឃុបឃិតនិយមបក្សពួក ក្រុមការងារនៅក្នុងសាលាខេត្តឧត្ដរមានជ័យ ទើបមិនបានបំពេញតាមលក្ខខណ្ឌរបស់ក្រសួងបានដាក់ជូន។ ពោលគឺ លោក អាន់ សំអាត ប្រធានការិយាល័យច្រកចេញចូលតែមួយ មិនបានគោរពទៅតាមបទដ្ឋានគតិយុត្តិរបស់ក្រសួងមហាផ្ទៃ នោះទេ បែរជាយកផ្ទះខ្លួនឯងធ្វើកន្លែងធ្វើការងារ តម្រូវឲ្យពលរដ្ឋបង់សេវាលើសសៀវភៅបន្ទុក សម្រុកប្រមូលប្រាក់រាប់ម៉ឺនដុល្លារ ពីរាស្ត្រក្រីក្ររាប់ពាន់នាក់ចាញ់បោករៀងរាល់ថ្ងៃដោយមិនដឹងខ្លួន។
ពាក់ព័ន្ធនឹងកាចោទប្រកាន់របស់ប្រជាពលរដ្ឋនេះ លោក អាន់ សំអាត បានប្រាប់កាសែតក្នុងថា លោកធ្វើគោរពតាមសេចក្ដីណែនាំរបស់ក្រសួងទាំងអស់ បើប្រជាពលរដ្ឋណាម្នាក់មិនមានឯកសារគ្រប់គ្រាន់ ឬសាច់ញាតិខ្លួនយកមកទេ គឺលោកមិនទទួលឡើយ ព្រោះគ្មានបុគ្គលណាម្នាក់កាន់ឯកសារ៤ ទៅ៥ច្បាប់មកធ្វើបានទេ។
ចំណែកលោក លឹម សុខ តូ អភិបាលរងខេត្ត បានបញ្ជាក់ឲ្យដឹងដែរថា លោកខិតខំបម្រើប្រជាពលរដ្ឋ ហើយការចុះហត្ថលេខាលើប័ណ្ណព្រំដែន មានឯកសារត្រឹមត្រូវតាមច្បាប់ ហើយរូបខ្ញុំមិនពាក់ព័ន្ធរឿងទារលុយសេវាប័ណ្ណព្រំដែនលើសកំណត់នោះទេ៕
