ភ្នំពេញ៖ ក្រសួងធនធានទឹក និងឧតុនិយម បានប្រកាសឲ្យដឹងថា ចាប់ពីថ្ងៃទី១៦ ដល់ថ្ងៃទី២២ ខែកក្កដា ឆ្នាំ២០១៩ ខ្យល់មូសុងនិរតី បាន និងកំពុងបង្កើនឥទ្ធិពល មកលើតំបន់មាត់សមុទ្រ គួបផ្សំនឹងវិសម្ពាធមួយ ដែលស្ថិតនៅក្នុងសមុទ្រប៉ាស៊ីហ្វិក ភាគខាងលិច។ វិសម្ពាធ នឹងបំប្លែងខ្លួន ទៅជាព្យុះទី៥ ឈ្មោះ ដាណាស់ ( Danas ) នាថ្ងៃស្អែក មានទិសដៅ ឆ្ពោះទៅកាន់ប្រទេសចិន ភាគខាងកើត។ កម្ពុជាយើង បានត្រឹមទទួលនូវឥទ្ធិពលតែប៉ុណ្ណោះ។
សេចក្តីជូនដំណឹងរបស់ក្រសួងធនធានទឹក និងឧតុនិយម បង្ហាញថា លក្ខណៈបែបនេះ នឹងធ្វើឲ្យ៖
១-បណ្តាខេត្តនៅមាត់សមុទ្រ នឹងមានភ្លៀងក្នុងកម្រិតពីមធ្យម ទៅច្រើន ខ្យល់ខ្លាំង បង្កើតទៅជារលកធំ និងខ្ពស់ៗ។
២-បណ្តាខេត្ត និងរាជធានី នៅតំបន់ទំនាបកណ្តាល ភាគខាងត្បូង ភាគកណ្តាល និងភាគខាងកើត ដែលមានព្រំប្រទល់ជាប់វៀតណាម នឹងអាចមានភ្លៀង ក្នុងកម្រិតពីមធ្យមទៅបង្គួរ។ ទន្ទឹមនោះ ក៏អាចមានភ្លៀងខ្លាំង ដោយកន្លែងផងដែរ។
៣-បណ្តាខេត្តនៅភាគពាយ័ព្យ និងខ្ពង់រាប នឹងអាចមានភ្លៀង ក្នុងកម្រិតពីតិច ទៅបង្គួរ។ ទន្ទឹមនោះ ក៏អាចមានកន្លែងខ្លះ ភ្លៀងខ្លាំងផងដែរ។
ក្រសួងធនធានទឹក និងឧតុនិយម ក៏បានអំពាវនាវដល់សាធារណជន ឲ្យបង្កើនការប្រុងប្រយ័ត្នខ្ពស់ ពិសេសបងប្អូនប្រជានេសាទ និងភ្ញៀវទេសចរ តាមតំបន់ឆ្នេរ និងកោះ៕
