លោកស្រី ហ៊ុន ស៊ីណាត ប្អូនស្រី សម្តេចនាយករដ្ឋមន្ត្រី បានមានប្រសាសន៍ប្រាប់ លោក មាស សុផាត ជាយោធិនពិការ ថា សូមប្អូនប្រុសកុំអាលអស់សង្ឃឹមបើតាមខ្ញុំមើលក្នុងដីកាបញ្ជូនចេញពីខុទ្ទកាល័យរបស់សម្តេចទៅក្រសួងយុត្តិធម៌នេះ ។
លោកស្រីមានប្រសាសន៍ទៀតថា”ខ្ញុំមិនចង់និយាយទេរឿងដីធ្លីតែឃើញរឿងដីប្អូន មាស សុផាត ជាយោធិនពិការរស់នៅយូរហើយហេតុអ្វីបានជាលោក កើត សាវ៉េត គាត់ធ្វើប្លង់យកអញ្ចឹង ណ៌!ឮថាគាត់ជាមន្ត្រីជាន់ខ្ពស់នៅក្រសួងរៀបចំដែនដី នគរូបនីយកម្ម និងសំណង់” ។
ប្អូនស្រីសម្តេចនាយករដ្ឋមន្ត្រីបន្ដែមថា សូមឯកឧត្តម ជា សុផារ៉ា មេត្តាជួយរកយុត្តិធម៌ឲ្យរាស្រ្តផង។ក្នុងបច្ចុប្បន្ននេះបើតាមខ្ញុំមើលឃើញរឿងដីធ្លីភាគច្រើន ទឹកទន្លេបំពានទឹកអងច្រើនណាស់ វាតិច តួចណាស់ដែលទឹកអងបំពានទឹកទន្លេនោះ។
មន្ត្រីសាលារាជធានីភ្នំពេញធ្លាប់បានអះអាងថា នឹងសម្របសម្រួលករណីវិវាទដីធ្លីរ៉ាំរ៉ៃ រវាងលោក កើត សារ៉េត អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ និងអតីតយោធិនពិការម្នាក់រស់នៅក្នុងខណ្ឌព្រែកព្នៅ រាជធានីភ្នំពេញ ដើម្បីបញ្ចៀសការអនុវត្តន៍ ដោយបង្ខំនូវសាលដីការបស់តុលាការ ដែលបង្កឲ្យមានអំពើហិង្សា។
ទាក់ទងករណីនេះ លោក មាស សុផាត បានស្នើសុំឲ្យមានការអន្តរាគមន៍ពី លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់ ដែលជាចៅហ្វាយនាយរបស់លោក កើត សារ៉េត ។
លោកបានមានប្រសាសន៍ថា «ខ្ញុំបាទ សុំទទូចអង្វរដល់នឯកឧត្តម ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងដែនដី នគរូបនីយកម្ម និងសំណង់ មេត្តាអាណិតអាសូរដល់រូបខ្ញ៉ំបាទផង។ សូមឯកឧត្តម មេត្តាជួយដោះស្រាយបញ្ចប់រឿងក្តីមួយនេះ ដើម្បីកូនចៅបានធូរស្រាលផ្លូវចិត្ត មានពេលវេលាព្យាបាលជំងឺ ឈឺរាំរៃ លើសឈាម ទឹកនោមផ្អែម រហូតដល់ថ្ងៃស្លាប់ក្រោមម្លប់សុខសន្តិភាព»។
ចំណែកតំណាងភាគី លោក កើត សារ៉េត ពេលនេះ មិនអាចសុំការពន្យល់បានទេ ប៉ុន្តែមកទល់ពេលនេះលោកហាក់ដូចជារក្សា ជំហនៅដដែល ដោយលើកហេតុផលថា ខ្លួនជាអ្នកឈ្នះក្តី។
ដោយសារការប៉ុនប៉ងអនុវត្តន៍ដោយបង្ខំនូវជាច្រើន ដងនូវសាលដីការបស់តុលាការកំពូល ផ្លូវចូលទៅផ្ទះយោធិនពិការ ក្នុងខណ្ឌព្រែកព្នៅ រាជធានីភ្នំពេញលែងមានទៀត ហើយសូម្បីតែទំនប់ស្រះចិញ្ចឹមត្រីនៅខាងជើងផទះក៏ត្រូវផ្តាច់អស់ដែរគឺ មិនអាចូលទៅដល់ផ្ទះឈើដ៏ចាស់រខេករខាកនេះបានឡយ។
អ្នកជិតខាងបាននិយាយថា ក្រុមគ្រួសារលោក មាស សុផាត ជាយោធិនពិការនៅក្នុងសមរភូមិបានកាយផ្តាច់ផ្លូវមុខផ្ទះ កាលពីកន្លងមកនេះ ដើម្បីការពារដីរបស់គាត់មិនឲ្យតុលាការចូលទៅរឹបអូសយកឲ្យទៅលោក កើត សារ៉េត អនុរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តាមអំណាចសាលដីការបស់លោក ឌិត មន្ទីរ ប្រធានតុលារកំពូល។
យោងតាមដីកាបញ្ជូនរបស់លេខ៦២៨ ចុះថ្ងៃទី ២៣ ខែមេសា ឆ្នាំ២០១៩ របស់ លោក ហូ សិទ្ធី ប្រធានខុទ្ទកាល័យសម្តេចតេជោនាយករដ្ឋមន្រ្តី បានរំលឹកថា ការស្នើសុំឲ្យរដ្ឋមន្ត្រីក្រសួងយុត្តិធម៌ផ្អាកការអនុវត្តដោយបង្ខំ ធ្វើឡើងបន្ទាប់ពីលោក មាស សុផាត អាយុ៦០ឆ្នាំ អតីតទាហានពិការជើងម្ខាង និងមានមុខរបរជាកសិករចិញ្ចឹមត្រី រស់នៅភូមិដួង សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ បានប្តឹងសុំអន្តរាគមមន៍ពីសម្តេចតេជោ ហ៊ុន សែន ជួយស្វែងរកយុត្តិធម៌ដែលចោទប្រកាន់លោក កើត សារ៉េត ថាបានបំពានយកដីរបស់ខ្លួនកំពុងរស់នៅតាំងពីឆ្នាំ១៩៩២ ដែលគិតមកដល់ពេលនេះ គឺមានរយៈ២៦ឆ្នាំហើយ។
លោក មាស សុផាត បានលើកឡើងថា នៅក្នុងឆ្នាំ១៩៩៤ លោកបានសុំដីបឹងនេះពីរដ្ឋអំណាយមូលដ្ឋាន ដើម្បីដាំឈូក ហើយរហូតដល់ឆ្នាំ១៩៩៥លោកបានសុំការអនុញ្ញាតពីមន្ត្រីក្នុងមូកដ្ឋានដដែលនេះដើម្បីជីកធ្វើស្រះចិញ្ចឹមត្រីវិញម្តង ហើយជីកបានចំនួន ២ស្រះ ដើម្បីធ្វើឲ្យជីវភាពបានធូរធារជាងមុន។
លោក មាស សុផាត បានចោទលោក កើត សារ៉េត ថា «គាត់អាងអំណាចជាអនុរដ្ឋលេខាធិការក្រសួងរៀបចំដែនដី នគររូបនីយកម្ម និងសំណង់ លួចធ្វើប្លង់យកដីខ្ញុំបាទ»។
