ភ្នំពេញ៖ លោកថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃទី២៣ ខែសីហានេះបានចេញសារាចរណែនាំ ស្តីពីការរៀបចំពង្រឹងគុណភាពផលិតផលទេសចរណ៍ ក្នុងឱកាសបុណ្យភ្ជុំបិណ្ឌប្រពៃណីជាតិ នាថ្ងៃទី ២៧-២៨-២៩ ខែកញ្ញា ឆ្នាំ២០១៩ ខាងមុខនេះ។
ក្រសួងទេសចរណ៍ បានធ្វើការណែនាំដល់មន្ទីរទេសចរណ៍រាជធានី ខេត្ត ទាំងអស់ ត្រូវសហការជាមួយអាជ្ញាធរដែនដី ជួសជុល និងកែលំអផ្លូវទៅកាន់គោលដៅទេសចរណ៍សំខាន់ៗ ឲ្យបានល្អប្រសើរ ពិសេសរៀបចំវត្តអារាមដែលមានសក្តានុពលសម្រាប់ភ្ញៀវទេសចរអន្តរជាតិ អាចស្វែងយល់ពីប្រវត្តិ និងទំនៀមទំលាប់នៃពិធីបុណ្យភ្ជុំបិណ្ឌប្របៃណីជាតិ។
រដ្ឋមន្ត្រីក្រសួងទេសចរណ៍ បានឲ្យមន្ទីរទេសចរណ៍រាជធានី ខេត្ត ត្រូវធ្វើរបាយការណ៍ប្រចាំថ្ងៃ និងបូកសរុបស្ថិតិភ្ញៀវទេសចរនៅតាមរមណីយដ្ឋានទេសចរណ៍ ក្នុងឱកាសបុណ្យភ្ជុំបិណ្ឌទាំងបីថ្ងៃ រួចផ្ញើមកក្រសួងដើម្បីធ្វើការបូកសរុបជូនរាជរដ្ឋាភិបាល៕
