ឯកអគ្គរដ្ឋទូតចិន ដែលទើបតែងតាំងថ្មី ប្រចាំកម្ពុជា បានមានប្រសាសន៍ថា ចំណងមិត្តភាព និងកិច្ចសហប្រតិបត្តិការ រវាងកម្ពុជា និងចិន កាន់តែត្រូវបានពង្រឹង និងពង្រីកឥតឈប់ឈរ ព្រមទាំងឈានដល់ដំណាក់ល្អ បំផុត ហើយចិននៅតែបន្តជួយដល់កម្ពុជាលើគ្រប់វិស័យ ពិសេសវិស័យសេដ្ឋកិច្ច ពាណិជ្ជកម្ម កសិកម្ម ហេដ្ឋារចនាសម្ព័ន្ធ និងវប្បធម៌។
នៅក្នុងជំនួបសម្តែងការគួរសម និងពិភាក្សាការងារជាមួយ លោក ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ នៅថ្ងៃទី២៨ ខែធ្នូ នេះ នាទីស្តីការគណៈរដ្ឋ មន្ត្រី លោក វ៉ាង វិនធាន ឯកអគ្គរដ្ឋទូតចិន បានថ្លែងថា រដ្ឋាភិបាល និងប្រជាជនចិន តែងចាត់ទុក ប្រជាជនកម្ពុជាជាមិត្តដែកថែប ហើយចិននៅតែបន្តគាំទ្រដល់ការដឹកនាំរបស់រាជរដ្ឋាភិបាលបច្ចុប្បន្ន ដែលធ្វើឲ្យប្រទេសជាតិមានការអភិវឌ្ឍរីកចម្រើនលើគ្រប់វិស័យ។
លោកបានលើកឡើងថា ចិននឹងបន្តជំរុញកិច្ចសហប្រតិបត្តិការលើគ្រប់វិស័យជាមួយកម្ពុជា ពិសេស វិស័យកសិកម្ម និងការអភិវឌ្ឍជនបទ។ រដ្ឋាភិបាលចិន ក៏ដូចជារាជរដ្ឋាភិបាលកម្ពុជា តែងចាត់ទុក វិស័យ កសិកម្ម ជាវិស័យសំខាន់ចំពោះសេដ្ឋកិច្ចជាតិ។
មានអ្នកវិនិយោគ និងអ្នកជំនាញកសិកម្មចិនជាច្រើន បាន ចាប់អារម្មណ៍ដល់ការវិនិយោគវិស័យកសិកម្មនៅកម្ពុជា ដោយប្រតិបត្តិការតាំងពីការបណ្តុះពូជ រហូតដល់ ការកែច្នៃដោយប្រើបច្ចេកវិទ្យាខ្ពស់ សម្រាប់នាំចេញទៅទីផ្សារពិភពលោក និងប្រទេសចិន។
លោក ឧបនាយករដ្ឋមន្ត្រី យឹម ឆៃលី បានមានប្រសាសន៍ថា ទំនាក់ទំនងរវាងចិន និងកម្ពុជា មានតាំង ពីយូរលង់ណាស់មកហើយ ព្រមទាំងមានប្រពៃណី និងវប្បធម៌ប្រហាក់ប្រហែលគ្នា។
សម្តេចតេជោ ហ៊ុន សែន នាយករដ្ឋមន្ត្រី តែងណែនាំដល់មន្ត្រីរបស់រាជរដ្ឋាភិបាលកម្ពុជាទាំងអស់ ឲ្យយកចិត្តទុកដាក់ខ្ពស់ ដល់ការពង្រឹង និងពង្រីកកិច្ចសហប្រតិបត្តិការជាមួយសាធារណរដ្ឋប្រជាមានិតចិន និងត្រូវជួយសម្រួល ដល់ការវិនិយោគនានារបស់វិនិយោគិនចិននៅកម្ពុជា ពិសេស ត្រូវផ្តោតការសំខាន់ទៅលើយុទ្ធសាស្ត្រផ្លូវ សូត្រ និងគោលនយោបាយយុទ្ធសាស្ត្រខ្សែក្រវ៉ាត់១ ផ្លូវ១ របស់ចិន ព្រោះវាមានទំនាក់ទំនង និងផ្សារភ្ជាប់ ជាមួយយុទ្ឋសាស្ត្រចតុកោណរបស់រាជរដ្ឋាភិបាលកម្ពុជា។
