សៀមរាប៖ កម្លាំងនគរបាលខេត្តសៀមរាប បានឃាត់ខ្លួនជាជនជាតិប៉េរូ ប្តី និងប្រពន្ធពាក់ព័ន្ធករណីលួចកាបូបស្ពាយរបស់ស្រ្តីជនជាតិចិន កាលពីល្ងាចថ្ងៃទី១៧ ខែតុលា ឆ្នាំ២០១៩ ។

សមត្ថកិច្ចបានឲ្យដឹងថា ជនសង្ស័យឈ្មោះ MENDEZ TINCO EPIFANIO ភេទ ប្រុស អាយុ ៦៥ឆ្នាំ ជាប្តី និងប្រពន្ធឈ្មោះ QUISPE ESPINOZA CARMEN LUZ ភេទស្រី អាយុ ៤៩ឆ្នាំ នៅភូមិសាលាកន្សែង សង្កាត់ស្វាយដង្គំ ក្រុងសៀមរាប ខេត្តសៀមរាប។

បើតាមរបាយការណ៍សមត្ថកិច្ចបានបញ្ជាក់ថា ជនសង្ស័យទាំងពីរនាក់ប្តី ប្រពន្ធ បានធ្វើសកម្មភាពលួចកាបូបស្ពាយ (មានសម្ភារជាច្រើន) របស់ជនរងគ្រោះឈ្មោះ ZHOU LI HUA ភេទស្រី ជាជនជាតិចិន កាលពីព្រឹកថ្ងៃទី១៦ ខែតុលា ឆ្នាំ២០១៩ នៅចំនុចភោជនីយដ្ឋានសមុទ្រធម្មជាតិ ស្ថិតនៅភូមិ សាលាកន្សែង សង្កាត់ ស្វាយដង្គំ ក្រុងសៀមរាបខេត្តសៀមរាប។

ក្រោយឃាត់ខ្លួនសមត្ថកិច្ចជំនាញបានបញ្ជូនក្រុមជនសង្ស័យទៅស្នងការដ្ឋាននគរបាលខេត្តសៀមរាបដើម្បីសាកសួរ និងកសាងសំណុំរឿងបញ្ជូនទៅតុលាការចាត់ការតាមនិតិវិធី៕