(ភ្នំពេញ)៖ នៅថ្ងៃទី១៩ ខែមករា ឆ្នាំ២០២០ កងអាវុធហត្ថលើផ្ទៃប្រទេស ក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា បានសម្រេចបញ្ជូនខ្លួន មេបញ្ជាការរងកងរាជអាវុធហត្ថខេត្តបន្ទាយមានជ័យ២នាក់ ឲ្យលាការចាត់ការតាមផ្លូវច្បាប់ ករណីធ្វើទារុណកម្មអ្នកតវ៉ាដីធ្លីម្នាក់រហូតដល់ស្លាប់ ក្នុងពេលឃុំខ្លួនបណ្តោះអាសន្ន។
សេចក្តីប្រកាសព័ត៌មាន របស់កងរាជអាវុធហត្ថលើផ្ទៃប្រទេស បានឲ្យដឹងថា លោកវរសេនីយឯក ស ប៊ុនសឿង ជាមេបញ្ជារងកងរាជអាវុធហត្ថខេត្ត និងលោកអនុសេនីយទោ ឆយ រដ្ឋនា ជាជំនួយការការិយាល័យគ្រឿងញៀន ត្រូវក្រុមសើបអង្កេតពិសេសរកឃើញថា មានជាប់ពាក់ព័ន្ធការធ្វើទារុណកម្មបុរស ឈ្មោះ ទុយ ស្រស់ រហូតដល់ស្លាប់។
សូមរំឭក លោក ទុយ ស្រស់ គឺជាតំណាងពលរដ្ឋមានទំនាស់ដីធ្លីនៅភូមិជ្រៃ ឃុំចង្ហា ស្រុកអូរជ្រៅ ខេត្តបន្ទាយ បានស្លាប់កាលពីថ្ងៃទី០១ ខែមករា ឆ្នាំ២០២០ គឺក្រោយពេលមន្ត្រីកងរាជអាវុធហត្ថខេត្តបន្ទាយមានជ័យចាប់ខ្លួនជាមួយប្រជាពលរដ្ឋ៣នាក់ទៀត រួចយកទៅដាក់ក្នុងកន្លែងឃុំឃាំងរបស់ទីបញ្ជាការកងរាជអាវុធហត្ថខេត្ត ចាប់ពីថ្ងៃទី២៨ ដល់ថ្ងៃទី៣១ ខែធ្នូ ឆ្នាំ២០១៩ ក្រោយមកត្រូវបានបញ្ជូនបន្តទៅដាក់គុកក្នុងពន្ធនាគារខេត្ត ជាទីដែលលោកបានស្លាប់។
វិធានការផ្លូវច្បាប់នេះ ក្រោយពីសម្តេចតេជោ ហ៊ុន សែន នាយករដ្ឋមន្ត្រី កាលពីយប់ថ្ងៃទី១៤ ខែមករា ឆ្នាំ២០២០ក្នុងពិធីជួបសំណេះសំណាលជាមួយអ្នកសារព័ត៌មានជិត៦ពាន់នាក់ បានចេញបទបញ្ជាឲ្យគណៈកម្មការសិទ្ធិមនុស្សកម្ពុជា សហការជាមួយកងរាជអាវុធហត្ថលើផ្ទៃប្រទេស បើកការស្រាវជ្រាវករណីមានមនុស្សស្លាប់ ក្នុងពន្ធនាគារ ដោយសារការធ្វើទារុណកម្ម នៅខេត្តបន្ទាយមានជ័យ៕
