ភ្នំពេញ៖ លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេសការបរទេស និងសហប្រតិបត្តិការអន្តរជាតិ នឹងដឹកនាំគណៈប្រតិភូអញ្ជើញចូលរួមកិច្ចប្រជុំជាន់ខ្ពស់ លើកទី៤០ នៃក្រុមប្រឹក្សាសិទ្ធិមនុស្សអង្គការ សហប្រជាជាតិ (High Level Segment of the 40th Session of the Human Rights Council) ពីថ្ងៃទី២៤ ដល់ថ្ងៃទី២៦ ខែកុម្ភៈ ឆ្នាំ២០១៩ នៅទីក្រុងហ្សឺណែវ ប្រទេសស្វីស។
សេចក្តីប្រកាសព័ត៌មានរបស់ក្រសួងការបរទេស លើកឡើងថា ក្នុងកិច្ចប្រជុំជាន់ខ្ពស់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ លោកឧបនាយករដ្ឋមន្ត្រី ប្រាក់ សុខុននឹងអញ្ជើញថ្លែងសុន្ទរកថា ដោយផ្តោតជាសំខាន់ទៅលើវឌ្ឍនភាពសេដ្ឋកិច្ច-សង្គម ដែលកម្ពុជាសម្រេចបាន ក៏ដូចជាវិធានការដើម្បីពង្រឹងលំហនយោបាយ និងសង្គមស៊ីវិល លើកកម្ពស់សិទ្ធិការងារ និងការពង្រឹងការអនុវត្តច្បាប់។
សេចក្តីប្រកាសពត៌មានបន្តថា ក្នុងអំឡុងពេលស្នាក់នៅទីក្រុងហ្សឺណែវ លោកឧបនាយករដ្ឋមន្ត្រី ប្រាក់ សុខុន នឹងមានជំនួបទ្វេភាគី ជាមួយរដ្ឋមន្ត្រីការបរទេស និងប្រធានគណៈប្រតិភូ នៃប្រទេសមួយចំនួនផងដែរ។
សេចក្តីប្រកាសពត៌មាន បញ្ជាក់ថា តាមទម្លាប់ កិច្ចប្រជុំជាន់ខ្ពស់នេះ តែងមានការអញ្ជើញចូលរួមពីប្រមុខរដ្ឋ/រដ្ឋាភិបាល មកពីបណ្តាប្រទេសផ្សេងៗ ដើម្បីបង្ហាញជូនដល់សហគមន៍អន្តរជាតិ នូវសមិទ្ធិផលសេដ្ឋកិច្ច-សង្គម ស្ថានការនយោបាយ សិទ្ធិមនុស្ស និងលិទ្ធិប្រជាធិបតេយ្យ ដែលប្រទេសនីមួយៗសម្រេចបាន៕
