លោកឧកញ៉ា លឹម ហេង អនុប្រធានសភាពាណិជ្ជ បានរំលឹកពីបេសកកម្មធុរកិច្ចលើកទីមួយរបស់រុស្ស៊ីមកកម្ពុជា ក្នុងនោះលោក ថា អ្នកឧកញ៉ា គិត ម៉េង ប្រធានសភាពាណិជ្ជកកម្មកម្ពុជា បានអញ្ជើញចូលរួម និងថ្លែងសន្ទរកថាអំពី “កាលានុវត្តភាពវិនិយោគនៅកម្ពុជា” ក្នុងឱកាសនៃបេសកកម្មធុរកិច្ចលើកទីមួយរបស់រុស្ស៊ី មកកម្ពុជា តាមប្រព័ន្ធអនឡាញ កាលថ្ងៃសុក្រថ្ងៃទី៣០ ខែកក្កដា ឆ្នាំ២០២១។
កម្មវិធីនេះ ប្រព្រឹត្តទៅក្រោមអធីបតីភាពរបស់ លោក បណ្ឌិត ញឹម ខេមរា រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ តំណាងដ៏ខ្ពង់ខ្ពស់របស់លោក ឧបនាយករដ្ឋមន្រ្តី ប្រាក់ សុខុន រដ្ឋមន្ត្រី ក្រសួងការបរទេស និង សហប្រតិបត្តិការអន្តរជាតិ។
លោកឧកញ៉ា លឹម ហេង លើកឡើងថា កម្មវិធីនេះ មានការចូលរួមពី ធុរជន និងវិនិយោគិនប្រទេសទាំងពីរ និងតំណាងពីក្រសួង-ស្ថាប័នពាក់ព័ន្ធ ប្រមាណ២៥០នាក់ ។
កម្មវីធីនេះ ប្រព្រឹត្តទៅស្របពេលនឹងការប្រារព្ធខួបលើកទី ៦៥ ឆ្នាំនៃទំនាក់ទំនងការទូតកម្ពុជា-រុស្ស៊ី។ មូលបទនៃកិច្ចពិភាក្សា ផ្តោត លើវិស័យសំខាន់ៗបី គឺ វិស័យបច្ចេកវិទ្យាព័ត៌មាន សុវត្ថិភាពប្រព័ន្ធអ៊ីនធឺណែត បច្ចេកវិទ្យាឌីជីថល វិស័យឧស្សាហកម្ម និងវិស័យថាមពល។
ធុរជនប្រទេសទាំងពីរ នឹងសិក្សាពីលទ្ធភាពក្នុងការធ្វើកិច្ចសហប្រតិបត្តិការ ជំរុញ និង លើកកម្ពស់គម្រោងរួមគ្នារវាងប្រទេសទាំងពីរ។
