ការថតរូបទេសភាពអាចថាជារឿងងាយស្រួលព្រោះវាមានភាពទូលាយ, ពន្លឺគ្រប់គ្រាន់ក្នុងការថត។ ចុះការថតរូបភាពចំណីអាហារវិញ ដើម្បីធ្វើឲ្យបានល្អតើយើងត្រូវដឹងចំណុចអ្វីខ្លះ? ថ្ងៃនេះ Sabay បង្ហាញ ៥ តិចនិកងាយៗដល់អ្នកកំពុងមាន iPhone ក្នុងដៃ អាចសាកល្បងថតចំណីអាហាររបស់អ្នកបានយ៉ាងស្រស់ស្អាត។
១.ចាំបាច់ត្រូវថតដោយប្រើពន្លឺធម្មជាតិ
ការថតក្រោមពន្លឺភ្លើងអំពូលធម្មតាក្នុងផ្ទះបាយ នោះជារឿងមិនត្រឹមត្រូវឡើយ។ អ្នកជំនាញបានបង្ហើបឲ្យប្ដូរទម្លាប់មកថតដោយប្រើពន្លឺធម្មតា ឧបមាទាញយកចំណីអាហារនោះមកដាក់នៅលើតុមួយក្បែរមាត់បង្អួច ហើយបើកឲ្យមានពន្លឺចេញចូលមុននឹងព្រះអាទិត្យលិច (ជៀសវាងកុំប្រើ Flash)។
២.រៀបចំអាហារ
ក្រៅពីរសជាតិដ៏ឈ្ងុយឆ្ងាញ់ អាហារក៏ត្រូវរៀបរយដើម្បីឲ្យភ្នែកដទៃមើលមកឃើញថាស្រស់ស្អាត គួរឲ្យចង់បរិភោគ។ ដំបូងគួរប្រើនូវចានដាក់អាហារដែលមានពណ៌ចែងចាំង ជៀសវាងការប្រឡាក់ឬប្រេះស្រាំចំណុចណាមួយ។ ទៀតសោតត្រូវរៀបអាហាររបស់អ្នក ដាក់តាមប្រភេទនៃពណ៌ធ្វើបែបម៉េចឲ្យមើលទៅឃើញថាលេចធ្លោបំផុត។
៣.រើសនូវមុំល្អបំផុតក្នុងការថត
មិនប្រាកដថាថតមួយជំហរពេញ គឺស្រស់ស្អាតនោះទេ វាផ្អែកទៅតាមម្ហូបអាហារដែរ។ ពេលខ្លះយើងអាចប្រើច្បាប់ ¾ ក្នុងការថត ដោយមានន័យថាថតយកតែ ៧៥ ភាគរយនៃអាហារប៉ុណ្ណោះ ហើយត្រូវចាប់នូវជ្រុងឬមុំណាមួយ ដែលថតទៅឃើញនូវគ្រឿងផ្សំពីលើអាហាររបស់យើង។
៤.រក្សាការថតឲ្យជិត/ហាម Zoom
កាមេរ៉ា iPhone អាចថតនៅទីតាំងជិតបានយ៉ាងល្អបំផុត ដែលយើងគួរផ្លាស់ប្ដូរទីតាំងទៅតាមនោះដែរ ដោយត្រូវជៀសវាងការ Zoom ជាចាំបាច់ ព្រោះវានឹងធ្វើឲ្យបាត់បង់គុណភាពរូបភាព។
៥.កែច្នៃរូបភាព
មានកម្មវិធីជាច្រើននៅលើ App Store ដែលជួយជំរុញពន្លឺ, កែច្នៃ Effect និងបន្ថែមបន្ថយគុណភាពជាច្រើនទៀត ទៅលើរូបភាពដែលបានថតចេញពីកាមេរ៉ាធម្មតា។ Sabay ណែនាំឲ្យស្គាល់កម្មវិធី ២ ដោយ SnapSeed ដាក់ឲ្យទាញយក Free និង Big Lens លក់ក្នុងតម្លៃ ០,៩៩ ដុល្លារ។