(សៀមរាប)៖ ដេប៉ូឈើមួយកន្លែងត្រូវបានគេដឹងថា ទិញឈើអត់ច្បាប់រាប់សិបឆ្នាំមកហើយ ដោយសារតែមានការឃុបឃឹតពីមន្ដ្រីជំនាញរដ្ឋបាលព្រៃឈើ និងមន្ដ្រីបរិស្ថាន ខេត្តសៀមរាប ព្រមទាំងសមត្ថកិច្ចពាក់ព័ន្ធមួយចំនួន ដើរយកលុយ និងបង់ជាប្រចាំខែ ទើបធ្វើអោយឈ្មួញដែលជាថៅកែដេប៉ូឈើ ឈ្មោះ គង់ ចំរើន ជាមនុស្សសំដីឈ្លើយ មានអំនួតអួតក្អេងក្អាង ដែលមានអ្នកធំចាំទ្រពង ពីក្រោយខ្នងជាខ្នងបង្អែក ធ្វើអោយដេប៉ូឈើមួយកន្លែងនេះអាចដំណើរការយ៉ាងរលូនរហូតមកដល់សព្វថ្ងៃ ដេប៉ូមួយកន្លែងនេះ ស្ថិតនៅជិត ភោជនីយដ្ឋាន សប្បាយៗ១២ តាមដងផ្លូវជន្លង់ ក្រុងសៀមរាប។
ពាក់ព័ន្ធនិងរឿងនេះ លោក ឡឹង សុខា មន្ដ្រីខណ្ឌរដ្ឋបាលព្រៃឈើ ក្រុងសៀមរាប អ្នកដើរប្រមូលលុយតាមដេប៉ូ បានអោយដឹងថាដេប៉ូ លោក គង់ ចំរើន ពិតជាមានច្បាប់ត្រឹមត្រូវ ចំណែកឈើក៏មានច្បាប់ត្រឹមត្រូវដូចគ្នាដែរ។ ប្រភពច្បាស់លាស់បានអោយដឹងថាឈើដែលដឹកពីខេត្តព្រះវិហារមកនោះគ្មានច្បាប់នោះទេ បើមិនដូច្នោះទេមិនមែន អ្នកដឹកឈើបង់លុយអោយសមត្ថកិច្ចពាក់ព័ន្ធក្នុងខេត្តស្ទើរតែទាំងអស់នោះទេ។
ចំណែក លោក ម៉ុង ប៊ុនលីម នាយខណ្ឌរដ្ឋព្រៃឈើខេត្តសៀមរាប យើងបានព្យាយាមទំនាក់ទំនងតាមទូស័ព្ទជាច្រើនដង តែលោកមិនលើកទូស័ព្ទទេ ពាក់ព័ន្ធការចោទប្រកាន់ពីពលរដ្ឋនិងមន្ដ្រីមួយចំនួន ថាលោក ជាអ្នកនៅចាំកាងពីក្រោយខ្នង ពាក់ព័ន្ធនិងដេប៉ូ លោក គង់ ចំរើននេះ មិនដឹងថាលោក ជាប់រវល់ ឬមិនហ៊ានលើកទូស័ព្ទ។ ម្ចាស់ដេប៉ូឈើវិញដែលមានលេខទូស័ព្ទ ០៩៥៣១៤៦១១ បានប្រាប់តាមទូស័ព្ទថា ដេប៉ូគាត់មានច្បាប់តែ ចំណែកត្រង់ឈើសួរថាមានច្បាប់ឬអត់? បែរជាម្ចាស់ដេប៉ូប្រាប់ថាអោយទៅជួបនៅដេប៉ូរបស់គាត់ ដោយ យកកាត យកឈ្មោះ និងបង្ហាញខ្លួនអោយគាត់បានឃើញផងទើបគាត់ប្រាប់បាន ៕
