បទចោទប្រកាន់ទាំងពីរនេះ ត្រូវផ្តន្ទាទោសតាមមាត្រា៣០៥ និងមាត្រា៤៩៥ នៃក្រមព្រហ្មទណ្ឌ។ មាត្រា៣០៥ នៃក្រមព្រហ្មទណ្ឌ បានចែងពីបទ បរិហារកេរ្តិ៍ជាសាធារណៈ ដែលបានកំណត់ពីការពិន័យជាប្រាក់ ពី១សែនរៀល ទៅ១០លានរៀល។ ដោយឡែក មាត្រា៤៩៥ នៃក្រមព្រហ្មទណ្ឌ បានចែងពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍ ដែលត្រូវផ្តន្ទាទោសដាក់ពន្ធនាគារ ចន្លោះពី៦ខែ ទៅ២ឆ្នាំ។
ក្នុងពាក្យបណ្តឹង ដាក់ទៅកាន់តុលាការ កាលពីថ្ងៃទី០១ ខែមេសា ឆ្នាំ២០១៩ លោកមេធាវី គី តិច បានលើកឡើងថា បុគ្គល ផែង វណ្ណៈ បានផ្សាយតាមហ្វេសប៊ុក ដោយប្រៀបប្រដូចករណីរូបលោក ផែង វណ្ណៈធ្វើជាតំណាងឲ្យក្រុមជនល្មើស បើកឡានបុកគេស្លាប់ យកលុយ ៥០០០ ដុល្លារ ទៅចូលបុណ្យសពជនរងគ្រោះ និងនាយកប្រតិបត្តិ អង្គភាព Fresh News ដែលធ្វើជាតំណាងសម្តេចតេជោ ហ៊ុន សែន យកលុយ ៥ម៉ឺនដុល្លារ ចូលបុណ្យ ធ្វើចេតិយសពលោក កែម ឡី។
លោក គី តិច មេធាវីតំណាងសម្តេចតេជោ ហ៊ុនសែន បានស្នើសុំឲ្យតុលាការ ពិនិត្យ សម្រេច ចោទប្រកាន់ និងផ្តន្ទាទោស ឲ្យបានធ្ងន់ធ្ងរបំផុត លើឈ្មោះ ផែង វណ្ណៈ តាមបញ្ញត្តិមាត្រា ក្រមព្រហ្មទណ្ឌ នៃព្រះរាជាណាចក្រកម្ពុជា ព្រមទាំងសុំឲ្យធ្វើការពិនិត្យ សម្រេច ឃាត់ខ្លួន ឬចាប់ខ្លួន និងឃុំខ្លួន ឈ្មោះ ផែង វណ្ណៈ ជាបន្ទាន់ ដើម្បីទប់ស្កាត់ ការប្រព្រឹត្តអំពើល្មើសជាបន្តបន្ទាប់ ដែលអាចនាំឲ្យមានភាពវឹកវរធ្ងន់ធ្ងរដល់សន្តិសុខសង្គម។
សូមបញ្ជាក់ថា ក្រៅពីបណ្តឹងរបស់មេធាវីលោកនាយករដ្ឋមន្ត្រី ហ៊ុន សែន លោក ផែង វណ្ណៈ ក៏កំពុងជាប់បណ្តឹងរបស់លោកពេជ្រស្រស់ នៅអង្គភាពប្រឆាំងអំពើពុករលួយ និងបណ្តឹង ២ទៀត នៅតុលាការសាលាដំបូងរាជធានីភ្នំពេញ គឺបណ្តឹងមួយ របស់អង្គភាព Fresh News ប្តឹងទារសំណង ៥០ម៉ឺនដុល្លារ និងបណ្តឹងមួយទៀត របស់លោក ខាន់សុវណ្ណ ប្តឹងលោកផែងវណ្ណៈ ទាមទារសំណង ១លាន ២១ម៉ឺនដុល្លារ។
លោក ផែង វណ្ណៈ ជាមន្ត្រីយោធាក្នុងក្រសួងការពារជាតិ និងជាម្ចាស់ហ្វេសប៊ុក ឈ្មោះ Pheng Vannak News ត្រូវបានប៉េអឹម ចាប់ខ្លួន កាលពីព្រឹកថ្ងៃទី០២ ខែមេសា។ ការចាប់ខ្លួនលោក ផែង វណ្ណៈ បន្ទាប់ពីតំណាងអយ្យការអមសាលាដំបូងរាជធានីភ្នំពេញ ទទួលបានពាក្យបណ្តឹងរបស់លោក គី តិច មេធាវីតំណាងដោយអាណត្តិរបស់សម្តេច ហ៊ុន សែន។ នៅរសៀលថ្ងៃទី០២ ខែមេសា ឆ្នាំ២០១៩ ប៉េអឹម បានបញ្ជូនលោក ផែង វណ្ណៈ ទៅកាន់តុលាការសាលាដំបូងរាជធានីភ្នំពេញ។ ក្រោយការសាកសួរ តំណាងអយ្យការ បានបញ្ជូនផែងវណ្ណៈ ទៅឃុំឃាំងនៅប៉េអឹម ហើយនៅព្រឹកថ្ងៃទី០៣ ខែមេសា ឆ្នាំ២០១៩ ទើបប៉េអឹម នាំផែងវណ្ណៈ មកកាន់តុលាការសាលាដំបូងរាជធានីភ្នំពេញ ដើម្បីបន្តនីតិវិធី៕
