ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ និងជាប្រធានកិច្ចប្រជុំឧត្តមមន្ត្រីសេដ្ឋកិច្ចអាស៊ាន

ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ និងជាប្រធានកិច្ចប្រជុំឧត្តមមន្ត្រីសេដ្ឋកិច្ចអាស៊ាន ដឹកនាំកិច្ចប្រជុំលើកទី៣ នៃឧត្តមមន្ត្រីសេដ្ឋកិច្ចអាស៊ាន សម្រាប់កិច្ចប្រជុំរដ្ឋមន្ត្រីសេដ្ឋកិច្ចអាស៊ានលើទី៥៣ និងកិច្ចប្រជុំពាក់ព័ន្ធ

…

(សៀមរាប)៖ កាលពីថ្ងៃទី៣១ ខែកក្កដា ដល់ថ្ងៃទី៧ ខែសីហា ឆ្នាំ២០២២ នៅសណ្ឋាគារសុខាសៀមរាប ឯកឧត្តម រដ្ឋ សារ៉ាវុធ អគ្គនាយកពាណិជ្ជកម្មអន្តរជាតិ ក្នុងនាមជាប្រធានកិច្ចប្រជុំឧត្តមមន្ត្រីសេដ្ឋកិច្ចអាស៊ាន (SEOM Chair) បានអញ្ជើញដឹកនាំកិច្ចប្រជុំលើកទី៣ នៃឧត្តមមន្ត្រីសេដ្ឋកិច្ចអាស៊ាន សម្រាប់កិច្ចប្រជុំរដ្ឋមន្រ្តីសេដ្ឋកិច្ចអាស៊ានលើកទី៥៣ (The Third Meeting of the ASEAN Senior Economic Officials for the Fifty-Third Meeting of the ASEAN Economic Ministers (SEOM 3/53) and Related Meetings) នៅខេត្តសៀមរាប។ កិច្ចប្រជុំនេះ មានការចូលរួមដោយអគ្គលេខាធិការរងអាស៊ានទទួលបន្ទុកសសរស្តម្ភសហគមន៍សេដ្ឋកិច្ចអាស៊ាន ឧត្តមមន្ត្រីសេដ្ឋកិច្ចអាស៊ាននៃប្រទេសសមាជិកអាស៊ានទាំងអស់ និងប្រទេសដៃគូរបស់អាស៊ាន និងគណៈប្រតិភូនៃប្រទេសនីមួយៗ ព្រមទាំងមន្ត្រីលេខាធិការដ្ឋានអាស៊ានផងដែរ។

ជាកិច្ចចាប់ផ្តើម ឯកឧត្តមប្រធានអង្គប្រជុំ បានសម្តែងមតិស្វាគមន៍យ៉ាងកក់ក្តៅ និងបានថ្លែងអំណរគុណចំពោះសមាជិកអង្គប្រជុំទាំងអស់ ដែលតែងតែផ្តល់នូវការគាំទ្រយ៉ាងសកម្ម ក្នុងការចូលរួមផ្លាស់ប្តូរមតិយោបល់លើបញ្ហាដែលមានក្នុងរបៀបវារៈនីមួយៗ យ៉ាងផុសផុល និងផ្តល់នូវការឆ្លើយតបចំពោះបញ្ហានានាប្រកបដោយភាពទន់ភ្លន់ និងស្មារតីទទួលខុសត្រូវខ្ពស់។

ឯកឧត្តមអគ្គនាយក បញ្ជាក់ថា អង្គប្រជុំបានកត់សម្គាល់ និងពិភាក្សាលើរបៀបវារៈសំខាន់ៗ រួមមាន៖ (១) ការតាមដានសកម្មភាពពីសេចក្តីសម្រេចដែលបានធ្វើឡើងកាលពីកិច្ចប្រជុំលើកទី១ នៃឧត្តមមន្ត្រីសេដ្ឋកិច្ចអាស៊ាន (SEOM 2/53), (២) វឌ្ឍនភាពសមិទ្ធផលអាទិភាពសេដ្ឋកិច្ច (Priority Economic Deliverables – PEDs) របស់កម្ពុជាសម្រាប់ភាពជាប្រធានអាស៊ានឆ្នាំ២០២២ (៣) កិច្ចព្រមព្រៀងសេដ្ឋកិច្ចអាស៊ាន, (៤) ការត្រៀមរៀបចំកិច្ចប្រជុំលើកទី៥៤ ថ្នាក់រដ្ឋមន្ត្រីសេដ្ឋកិច្ចអាស៊ាន កិច្ចប្រជុំលើកទី២១នៃក្រុមប្រឹក្សាសសរស្តម្ភសេដ្ឋកិច្ចអាស៊ាន និងការត្រៀមរៀបចំឯកសារសំខាន់ៗដាក់ជូនកិច្ចប្រជុំកំពូលអាស៊ានលើកទី៤០ និងលើកទី៤១, (៥) វឌ្ឍនភាពនៃការចរចាដំឡើងកម្រិតនៃកិច្ចព្រមព្រៀងពាណិជ្ជកម្មទំនិញអាស៊ាន (ATIGA Upgrade), (៦) ការស្នើសុំចូលជាសមាជិកអាស៊ានរបស់ទីម័រខាងកើត (៧)អនុស្សរណៈយោគយល់ស្តីពីការអនុវត្តវិធានការមិនមែនពន្ធគយលើមុខទំនិញចាំបាច់ និងការពង្រីកបញ្ជីទំនិញចាំបាច់, (៨) គំនិតផ្តួចផ្តើមលើគម្រោងមូលដ្ឋានអាស៊ាន, (៩) កិច្ចព្រមព្រៀងអាស៊ានស្តីពីចលនារបស់បុគ្គល (៩) កម្មវិធីការងាររបស់ឧត្តមមន្ត្រីសេដ្ឋកិច្ចអាស៊ាន ប្រចាំឆ្នាំ២០២២, (១០) កិច្ចពិភាក្សាផ្ទៃក្នុងត្រៀមសម្រាប់ការជួបប្រជុំពិគ្រោះយោបល់ជាមួយដៃគូសន្ទនាសំខាន់ៗ និងបញ្ហាផ្សេងៗទៀត។