កណ្តាល: ក្រុមការងារអន្តរាគមបង្គ្រាបបទល្មើសចលនាសត្វ និងផលិតផលសត្វ របស់អគ្គនាយកដ្ឋានសុខភាពសត្វ និងផលិតកម្មសត្វ សហការជាមួយការិយាល័យនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តកណ្ដាលកាលពីថ្ងៃទី១៣ ខែមករា ឆ្នាំ២០២៣ឃាត់ចាប់រថយន្តចំនួន០១គ្រឿង ម៉ាក SSANGYONG ISTANA ពណ៌ស។
រថយន្តនោះគឺ ជាប្រភេទរថយន្តដឹកអ្នកដំណើរ១ ៥កៅអី ពាក់ស្លាកលេខភ្នំពេញ២AH -១០៤៧ ដឹកសត្វជ្រូកបង្កកចំនួន ៥កេស ស្មើនឹង ៤៥ក្បាល (ជ្រូកទម្ងន់ចន្លោះ ០៦គីឡូក្រាម ទៅ ១០គីឡូក្រាម) ដោយជ្រូកបង្កកខាងលើនោះគ្មានប្រភពច្បាស់លាស់ដែលឈ្មួញខិលខូលលួចនាំចូល ឆ្ពោះទៅលក់ចែកចាយនៅរាជធានីភ្នំពេញ ឃាត់ចាប់ត្រង់ចំណុចភូមិព្រែកអង្គុញ ឃុំសៀមរាប ស្រុកកណ្ដា លស្ទឹង ខេត្តកណ្ដាល ដោយគ្មានលិខិតអនុញ្ញាតពីក្រសួងកសិកម្ម រុក្ខាប្រមាញ់ និងនេសាទ ។
ដូចនេះក្រុមអន្តរាគមបង្ក្រាបបទល្មើសចលនាសត្វ និងផលិតកម្មសត្វ បាននាំយកវត្ថតាំងដែលមានសត្វជ្រូកបង្កកសរុបចំនួន ៤៥ក្បាល និងរថយន្តចំនួន ០១គ្រឿង ទៅរក្សាទុកនៅចត្តាឡីស័ករបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់វិធានការតាមនីតិវិធីច្បាប់។
