ហាណូយ៖ ទីភ្នាក់ងារសារព័ត៌មានផ្លូវការរបស់វៀតណាម បានចេញផ្សាយ១ថា ប្រធានាធិបតីវៀតណាម លោក ង្វៀង សួនហ្វុក (Nguyen Xuan Phuc) បានដាក់ពាក្យលាលែងពីតំណែង បន្ទាប់ពីបក្សកុម្មុយនិស្ត ដែលកំពុងកាន់អំណាចបានរកឃើញថា លោកជាអ្នកទទួលខុសត្រូវចំពោះការបំពានច្បាប់ និងកំហុសរបស់មន្ត្រីនៅក្រោមបង្គាប់។
លោក ង្វៀង សួនហ្វុក អាយុ៦៨ឆ្នាំ បានកាន់តំណែងកំពូលនេះក្នុងរយៈពេលប្រហែលពីរឆ្នាំ ហើយពេលនេះមិនទាន់ច្បាស់ថា នរណានឹងឡើងជំនួសលោកនោះទេ។
ទីភ្នាក់ងារសារព័ត៌មានវៀតណាម បានរាយការណ៍កាលពីថ្ងៃអង្គារដោយដកស្រង់គណៈកម្មាធិការមជ្ឈិមដ៏មានអំណាចរបស់បក្សថា «ដោយដឹងច្បាស់អំពីការទទួលខុសត្រូវចំពោះមុខបក្ស និងប្រជាជន លោកបានដាក់ពាក្យសុំលាលែងពីមុខតំណែង លាឈប់ពីការងារ ហើយសុំចូលនិវត្តន៍»។
ការលាលែងពីតំណែងរបស់ប្រធានាធិបតីវៀតណាម បានកើតឡើងបន្ទាប់ពីការបណ្តេញឧបនាយករដ្ឋមន្ត្រីពីររូប នៅក្នុងខែមករានេះ តាមរយៈយុទ្ធនាការបោសសម្អាតអំពើពុករលួយ ដែលនាំទៅដល់ការចាប់ខ្លួនមន្ត្រីជាន់ខ្ពស់រាប់សិបនាក់។
ការបណ្តេញលោក ផាម ប៊ិញមិញ (Pham Binh Minh) និងលោក វ៉ូ ដុកដាំ (Vu Duc Dam) បណកើតឡើងចំពេលប្រទេស ដែលគ្រប់គ្រងដោយកុម្មុយនិស្តកំពុងបង្កើនការប្រយុទ្ធប្រឆាំងនឹងអំពើពុករលួយ ធ្វើឲ្យមានការព្រួយបារម្ភថាយុទ្ធនាការនេះកំពុងធ្វើឲ្យមន្ត្រីខ្លះមានការជាប់ពាក់ព័ន្ធ អាចប្រឈមមុខក្នុងការសាកសួរ។
កាលពីខែមុន គណបក្សកុម្មុយនិស្ត៍ បានដាក់វិន័យរដ្ឋមន្ត្រីក្រសួងការបរទេស គឺលោក ប៊ុយ ថាញ់សិន (Bui Thanh Son) ជុំវិញការចោទប្រកាន់ថា មានជាប់ពាក់ព័ន្ធនឹងមន្ត្រីក្រសួងការបរទេស និងមន្ត្រីការទូតមួយចំនួន ក្នុងរឿងអាស្រូវពុករលួយ។
វៀតណាម គឺជាប្រទេសគ្រប់គ្រងដោយឯកបក្ស ហើយការផ្លាស់ប្តូរនយោបាយណាមួយត្រូវ បានធ្វើឡើងយ៉ាងប្រុងប្រយ័ត្នបំផុត ដើម្បីរក្សាស្ថិរភាពនយោបាយ និងនិរន្តរភាពក្នុងកាតដឹកនាំប្រទេស។ ដូច្នេះអ្នកវិភាគនិយាយថា នេះជារឿងមិនធម្មតាទេ ហើយអ្នកខ្លះនិយាយថា នេះជាការប្រើអំណាចរបស់អគ្គលេខាធិការបក្សកុម្មុយនិស្តវៀយណាម គឺលោក ង្វៀង ភូជុង (Nguyen Phu Trong)។
ឥឡូវនេះអាណត្តិរបស់លោក ង្វៀង ភូជុង នឹងផុតកំណត់នៅឆ្នាំ២០២៦ ហើយប្រធានាធិបតីដែលទើបតែលាលែងពីតំណែង គឺជាបេក្ខជននាំមុខគេដើម្បីជំនួសលោក ក្នុងតំណែងអគ្គលេខាបក្ស។ ប៉ុន្តែ គេមិនទាន់ដឹងច្បាស់ថា ប្រធានាធិបតីថ្មីនឹងជានរណានោះទេ ប៉ុន្តែមានការរំពឹងទុកថា រដ្ឋមន្ត្រីក្រសួងសន្តិសុខសាធារណៈ គឺលោក តូ ឡាំ (To Lam) អាចនឹងឡើងជំនួសតំណែងកំពូលនេះ។
អ្នកវិភាគបាននិយាយថា ប្រសិនបើលោក តូ ឡាំ ពិតជាក្លាយជាប្រធានាធិបតីមែន នោះមានន័យថា ទាំងនាយករដ្ឋមន្ត្រី និងប្រធានាធិបតី នឹងក្លាយជាអតីតមន្ត្រីមកពីក្រសួងសន្តិសុខសាធារណៈ។ ហើយវាអាចបង្ហាញពីជំហររឹងរូសកាន់តែខខ្លាំងនៅពេលខាងមុខក្នុងប្រទេសវៀតណាម។ ចំណុចនេះអាចមានន័យថា មានការបង្រ្កាបកាន់តែខ្លាំងលើលក្រុមប្រឆាំង។
តាមច្បាប់វៀតណាម ដើម្បីឲ្យមានប្រសិទ្ធភាព ការលាលែងរបស់លោក ង្វៀង សួនហ្វុក តម្រូវឲ្យមានការអនុម័តយល់ព្រមពីរដ្ឋសភា។ កាលពីថ្ងៃចន្ទ ទីភ្នាក់ងារសារព័ត៌មានបរទេសបានរាយការណ៍ថា សភានឹងរៀបចំកិច្ចប្រជុំវិសាមញ្ញមួយ នៅក្នុងសប្តាហ៍នេះ។
លោក ង្វៀង សួនហ្វុក បានកាន់តំណែងនាយករដ្ឋមន្ត្រីចន្លោះឆ្នាំ២០១៦ និង២០២១ មុនពេលកាន់តួនាទីជាប្រធានាធិបតី។
ប្រទេសវៀតណាមដឹកនាំជាផ្លូវការដោយសសរស្តម្ភចំនួនបួន គឺលេខាបក្ស ប្រធានាធិបតី នាយករដ្ឋមន្ត្រី និងប្រធានរដ្ឋសភា៕
