ភ្នំពេញ: ក្រោមការបញ្ជាដោយផ្ទាល់ពី លោក តាន់ ផាន់ណារ៉ា ប្រតិភូរាជរដ្ឋាភិបាលទទួលអគ្គនាយកនៃអគ្គនាយកដ្ឋានសុខភាពសត្វ និងផលិតកម្មសត្វនៅវេលម៉ោង០៣និង៣០នាទីទៀបភ្លឺ នាថ្ងៃទី១៩ ខែកុម្ភៈ ឆ្នាំ២០២៣ បានឲ្យក្រុមការងារអន្តរាគមន៍បង្ក្រាបបទល្មើសចលនាសត្វ នៃអគ្គនាយកដ្ឋានសុខភាពសត្វ និងផលិតកម្មសត្វ ចុះស្ទាក់ចាប់រថយន្ត០១គ្រឿង ម៉ាកKia ពណ៌ ខៀវ ។
រថយន្តនោះ ជាប្រភេទរថយន្តដឹកទំនិញចំណុះ១, ៥តោន ពាក់ស្លាកលេខភ្នំពេញ២AL-៧២៥២ ដឹកសត្វមាន់រស់ចំនួន៥០ស្រកា ស្មើនឹង៥៥០ក្បាល នាំចូលមកពីប្រទេសវៀតណាម តាមច្រកបន្ទាយចក្រី ស្រុកព្រះស្ដេច ខេត្តព្រៃវែង ឆ្ពោះទៅលក់ ចែកចាយនៅរាជធានីភ្នំពេញ(តាមការឆ្លើយបញ្ជា ក់ពីម្ចាស់ដឹកមាន់ ) ដោយគ្មានលិខិតអនុញ្ញាតអ្វីទាំងអស់។
ក្រុមការងារបានឃាត់នៅភូមិស្វាយតាអ៊ុក សង្កាត់ វាលស្បូវ ខណ្ឌច្បារអំពៅ រាជធានីភ្នំពេញ។
ក្រុមការងារបាននាំយកបទល្មើស និងវត្ថុតាងទាំងនោះទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋានសុខភាពសត្វ និងផលិតកម្មសត្វ ដើម្បីចាត់ការទៅតាមនីតិវិធីច្បាប់។
