ប្រព័ន្ធផ្សព្វផ្សាយរដ្ឋកូរ៉េខាងជើង KCNA បានប្រកាសនៅថ្ងៃអាទិត្យ ទី១៧ ខែវិច្ឆិកានេះថា កូរ៉េខាងជើងនឹងមិនពិភាក្សាជាមួយសហរដ្ឋអាមេរិកស្តីអំពីការរំសាយកម្មវិធីនុយក្លេអ៊ែរ និងបច្ចេកវិទ្យាមីស៊ីលរបស់ខ្លួននោះទេ ប្រសិនបើអាមេរិកមិនព្រមបោះបង់ចោលនយោបាយអរិភាព (Hostile policy) របស់ខ្លួនជាមុន ។
នយោបាយអរិភាព (Hostile policy) របស់សហរដ្ឋអាមេរិកលើកូរ៉េខាងជើង ដែលប្រព័ន្ធផ្សព្វផ្សាយរដ្ឋកូរ៉េខាងជើង KCNA បានប្រកាស គឺសំដៅលើសេចក្តីសម្រេចរបស់អង្គការសហប្រជាជាតិក្នុងការរិះគន់កូរ៉េខាងជើង ពាក់ព័ន្ធនឹងការបាញ់សាកល្បងមីស៊ីលបាលីស្ទិក របស់កូរ៉េខាងជើងនៅពេលថ្មីៗនេះ ដោយបំពានលើសេចក្តីសម្រេចរបស់អង្គការនេះ ដែលបានហាមប្រាមប្រទេសនេះ មិនឲ្យបាញ់សាក ល្បង មីស៊ីលបាលីស្ទិកចាប់តាំងពីឆ្នាំ២០០៦កន្លងមក ។
សេចក្តីប្រកាសបែបនេះរបស់ KCNA ត្រូវបានធ្វើឡើងក្រោយពីកូរ៉េខាងជើង និងអាមេរិក មានគម្រោងនឹងជួបចរចាសាជាថ្មីឡើងវិញ នៅដើមខែធ្នូ ចុងឆ្នាំ២០១៩នេះ ស្តីពីការរំសាយកម្មវិធី នុយក្លេអ៊ែរ និងបច្ចេកវិទ្យាមីស៊ីលរបស់កូរ៉េខាងជើង ៕
