ភ្នំពេញ៖ ក្រសួងពាណិជ្ជកម្ម នៅព្រឹកថ្ងៃទី២១ ខែមីនានេះ បានរៀបចំសិក្ខាសាលា ស្តីពីការផ្សព្វផ្សាយភាពអនុគ្រោះពន្ធលើមុខទំនិញ ដែលកម្ពុជាទទួលបានពីសហភាពសេដ្ឋកិច្ចអឺរ៉ុប-អាស៊ី ហៅកាត់ EAEU។ សិក្ខាសាលាថ្ងៃនេះ មានគោលបំណង ផ្សព្វផ្សាយអំពីព័ត៌មានបច្ចុប្បន្នភាព ដែលទាក់ទងនឹងភាពអនុគ្រោះពន្ធរបស់សហភាពសេដ្ឋកិច្ចអឺរ៉ុប-អាស៊ី មកលើទំនិញកម្ពុជាមួយចំនួន។
ថ្លែងប្រាប់ក្រុមអ្នកសារព័ត៌មានក្នុងសិក្ខាសាលាផ្សព្វផ្សាយភាពអនុគ្រោះពន្ធលើមុខទំនិញ ដែលកម្ពុជាទទួលបានពីសហភាពសេដ្ឋកិច្ចអឺរ៉ុប-អាស៊ី លោកជំទាវ តឹករ៉េត កំរង រដ្ឋលេខាធិការក្រសួង ពាណិជ្ជកម្ម បានឱ្យដឹងថា កម្ពុជាទទួលបានភាពអនុគ្រោះពន្ធថ្មីនេះប្រមាណ ៣ឆ្នាំមកហើយ ហើយបាននិងកំពុងនាំចេញទំនិញមួយចំនួនដែរ។ ក្នុងនោះ មានមុខទំនិញរហូតទៅដល់ជាង ៤០មុខឯណោះ ដែលត្រូវបានលើកលែងពន្ធ។
បើតាមលោកជំទាវ តឹករ៉េត កំរង ប្រទេសដែលជាសមាជិកក្នុងសហភាពសេដ្ឋកិច្ចអឺរ៉ុប-អាស៊ីមាន០៥ ប្រទេស រួមមាន៖ សហព័ន្ធរុស្ស៊ី សាធារណរដ្ឋបេឡារុស សាធារណរដ្ឋកាហ្សាក់ស្ថាន សាធារណរដ្ឋអាមេនី និងសាធារណរដ្ឋកៀហ្ស៊ីស៊ីស្ថាន។
លោកជំទាវឲ្យដឹងទៀតថា ទំនិញដែលកម្ពុជានាំចេញទៅកាន់ទីផ្សារសហភាពសេដ្ឋកិច្ចអឺរ៉ុប-អាស៊ី មានដូចជា វត្ថុធាតុវាយនភណ្ឌ សំលៀកបំពាក់ ខ្សែក្រវ៉ាត់ កប្បាស អង្ករកិនហើយទាំងស្រុង ឬពាក់កណ្តាល ចុងអង្ករ ភួយនិងកម្រាលធ្វើពីកប្បាសជាដើម។ល។ រីឯទំនិញដែលកម្ពុជានាំចូលពីសហភាពសេដ្ឋកិច្ចអឺរ៉ុប-អាស៊ី រួមមាន៖ កង់យានយន្ត រថយន្តគ្រប់ប្រភេទ គ្រឿងបង្គុំអគ្គិសនី កាមេរ៉ា គ្រឿងចក្រ គ្រឿងម៉ាស៊ីនកសិកម្ម ក្រណាត់បោសធូលី និងក្រណាត់ជូតសម្អាត ជី សម្ភារផ្សព្វផ្សាយពាណិជ្ជកម្ម ក្រដាសសម្រាប់បោះពុម្ពកាសែត និងបំណែកនៃអាកាសយាន ឬឧទ្ធម្ភាគចក្រជាដើម។
លោកជំទាវរដ្ឋលេខាធិការក្រសួងពាណិជ្ជកម្ម បានគូសបញ្ជាក់ដែរថា ប្រទេសកម្ពុជាបាននាំចេញទំនិញទៅកាន់សហព័ន្ធរុស្សីច្រើនជាងគេ ក្នុងចំណោមបណ្តាសមាជិករបស់សហភាពសេដ្ឋកិច្ចអឺរ៉ុប-អាស៊ី។ តាមរយៈការនាំចេញទំនិញកម្ពុជា ក្នុងអំឡុងពេល០៣ឆ្នាំចុងក្រោយ ចាប់ពីឆ្នាំ២០១៦ រហូតដល់ឆ្នាំ២០១៨ ឃើញថាទំហំពាណិជ្ជកម្មរវាងកម្ពុជា និងសហភាពសេដ្ឋកិច្ចអឺរ៉ុប-អាស៊ី មានកំណើនឡើងវិញផងដែរ៕
