ភ្នំពេញ៖ «សុខសប្បាយជាទេ បងប្អូនជនរួមជាតិ?។ នៅពេលនេះ ខ្ញុំកំពុងដឹកនាំគណៈប្រតិភូជាន់ខ្ពស់កម្ពុជាចាកចេញពីប្រទេសចិនជាមិត្ត វិលត្រឡប់មកកម្ពុជាវិញហើយ បន្ទាប់ពីបានចូលរួមក្នុងវេទិកាផ្លូវ១ និងខ្សែក្រវាត់១ លើកទី២ កាលពីថ្ងៃទី ២៥-២៩ មេសា ២០១៩»។ នេះជាការបញ្ជាក់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។
សម្តេចតេជោ ហ៊ុន សែន បានមានប្រសាសន៍ ក្នុងដំណើរទស្សនកិច្ចនៅចិននេះ ក៏មានជំនួបទ្វេភាគីជាមួយ លោកប្រធានាធិបតីចិន ស៊ី ជិនពីង និង លោកនាយករដ្ឋមន្ត្រីចិន លី គឺឈៀង ដែលប្រទេសទាំងពីរបានចុះកិច្ចព្រមព្រៀង ៦ ថែមទៀត ដើម្បីជំរុញទំនាក់ទំនង កម្ពុជា-ចិន ឲ្យឡើងដល់កម្រិតកំពូល។
សម្តេចតេជោ ហ៊ុន សែន បានបញ្ជាក់ថា «ក្នុងនាមជាប្រទេសដៃគូយុទ្ឋសាស្ត្រគ្រប់ជ្រុងជ្រោយ និងជាមិត្តដែកថែប គឺយើងជាបងប្អូនដែលចែករំលែកនូវផលប្រយោជន៍នៃអនាគត់តែ១»។
«ខ្ញុំ សូមអរគុណមិត្តចិន ដែលតែងតែយកចិត្តទុកដាក់ជួយដល់កម្ពុជារហូតមានការរីកចម្រើនមកដល់សព្វថ្ងៃនេះ។ ហើយនៅថ្ងៃនេះផងដែរ សូមអរគុណមិត្តចិនដែលផ្តល់ជំនួយជាង ៦០០ លានយ័ន ដើម្បីពង្រឹងវិស័យការពារជាតិកម្ពុជាអោយកាន់តែរឹងមាំ»៕
