ករណីបាញ់បោះអនាធិបតេយ្យជាង ២០០គ្រាប់ ពិធីជប់លៀងខួបកំណើត! ម្ចាស់ផ្ទះលំហែឧត្ដមសេនីយ៍ទោ គៀង ចាន់តួ និងឈ្មោះ កង ឆាយ ពាក់ស័ក្តិ២ មន្ត្រីនគរបាល ជាអ្នកបាញ់ច្រើនជាងគេ!

ប៉ុន្តែនៅក្នុងសារសំឡេងនៅព្រឹកថ្ងៃទី១៤ ខែវិច្ឆិកា ឆ្នាំ២០២៣នេះ នាយឧត្តមសេនីយ៍ គៀង សាវុធ ដែលជាឪពុក លោក​ឧត្ដមសេនីយ៍​ទោ​ គៀង​ ចាន់​តួ​ អនុប្រធាន​នាយកដ្ឋាន​នគរបាល​ព្រហ្មទណ្ឌ​ ក្រសួង​មហាផ្ទៃ​ បានចេញមុខបញ្ជាក់ថា «ខ្ញុំ នាយឧត្ដមសេនីយ៍ គៀង សាវុធ អគ្គមេបញ្ជាការរងកងយោធពលខេមរភូមិន្ទ សូមអះអាងចំពោះមុខច្បាប់ពីបញ្ហាការបាញ់បោះនៅចំការតែលើភ្នំគិរីរម្យ មិនមានឈ្មោះ គៀង សាវុធ មិនមានឈ្មោះ គៀង ចាន់តួ ទេ សូមមហាជនជ្រាប ហើយបើសិនតាមដានទៅឃើញពិតប្រាកដ​ ខ្ញុំសូមអះអាងចំពោះមុខច្បាប់ថា ទី១ គឺទទួលខុសត្រូវចំពោះមុខច្បាប់ អាចបកស័ក្តិចេញទាំងពីរនាក់ឳកូន។ ទី២ ចាប់ដាក់ពន្ធនាគារទាំងពីរនាក់ឳកូន សូមមហាជនជ្រាប នេះជាពាក្យពិតរបស់យើងខ្ញុំ គៀង សាវុធ»។

សូមជម្រាបថា កាលពីយប់ថ្ងៃទី១១ ខែវិច្ឆិកា ឆ្នាំ២០២៣ នៅចំណុចចំការតែលើភ្នំគិរីរម្យ ស្ថិតក្នុងភូមិថ្មី ឃុំចំបក់ ស្រុកភ្នំស្រួច ខេត្តកំពង់ស្ពឺ គេបានលឺស្នូរគ្រាប់កាំភ្លើងបាញ់រះជាច្រើនគ្រាប់កក្រើកព្រៃ បង្កឲ្យមានការភ័យខ្លាចដល់ប្រជាពលរដ្ឋ និងភ្ញៀវទេសចរណ៍មកស្នាក់នៅទីនោះ ដែលប្រភពមួយចំនួនបង្ហើបថា ក្រុមអ្នកបាញ់បោះសេរីនេះ គឺជាក្រុមកូនក្មួយរបស់អ្នកធំម្នាក់ថ្នាក់នាយឧត្តមសេនីយ៍នៅក្រសួងការពារជាតិ។

បើតាមព័ត៌មានពលរដ្ឋនៅទីនោះបានបញ្ជាក់ថា ឱ្យតែថ្ងៃចុងសប្តាហ៍ពួកគាត់មកកំសាន្តនៅដីចំការលំហែរបស់គាត់ហើយ គឺចាក់ធុងបាស់សំឡេងលឺខ្លាំង ផឹកស៊ីស្រវឹងបាញ់បោះគ្មានខ្លាចញញើតសមត្ថកិច្ចឡើយ។

នៅព្រឹកថ្ងៃទី១៣ ខែវិច្ឆិកា ឆ្នាំ២០២៣ តំណាងព្រះរាជអាជ្ញាអមសាលាដំបូងខេត្តកំពង់ស្ពឺ បានដឹកនាំកម្លាំងសមត្ថកិច្ចចុះពិនិត្យ និងស្រាវជ្រាវកន្លែងកើតហេតុបានរកឃើញសំបកគ្រាប់អាវុធខ្លី និងវែងប្រមាណជាង ២០០គ្រាប់ និងកំពុងបន្តនិតិវិធី។