ខេត្តពោធិ៍សាត់៖ សម្តេចតេជោ ហ៊ុន សែន បានប្រកាសថា ពេលដែលសម្តេច នៅកាន់តំណែងជានាយករដ្ឋមន្ត្រីសម្តេច នៅតែបន្តដោះស្រាយ បញ្ហាកម្មករកម្មការិនីរោងចក្រកាត់ដេរ។
សម្តេចតេជោបានថ្លែងចំពោះមុខកម្មករកាត់ដេរជាង ១ម៉ឺននាក់ ព្រឹកថ្ងៃទី២០ ខែមីនា ឆ្នាំ២០១៩ នៅខេត្តពោធិ៍សាត់។ សម្តេច បានលើកឡើងថា «បន្ទាប់ពីបង្កើតរាជរដ្ឋាភិបាលហើយ ពូបានធ្វើសកម្មភាពទាំងក្នុងប្រទេស និងទាំងក្រៅប្រទេស ដោះស្រាយគ្រប់បញ្ហាទាំងអស់។
ចំណុចស្នូល ដែលពូនៅបន្ត គឺការបន្តដោះស្រាយបញ្ហាកម្មករកម្មការិនី ដែលស្ថិតនៅក្នុងក្របខណ្ឌនៃគោលនយោបាយឧស្សាហកម្ម ឆ្នាំ២០១៥-ឆ្នាំ២០២៥ ផង និងក៏ដូចជាដោះស្រាយបញ្ហាទូទៅរបស់ប្រទេសផង ព្រោះថា រដ្ឋធម្មនុញ្ញ បានកំណត់ឲ្យនាយករដ្ឋមន្ត្រី ដឹកនាំនយោបាយទាំងក្នុងប្រទេស និងក្រៅប្រទេស។ បានសេចក្តីថា គ្រប់វិស័យទាំងអស់ គ្មានវិស័យណាមួយ ដែលគ្មានការពាក់ព័ន្ធនឹងការទទួលខុសត្រូវរបស់នាយករដ្ឋមន្ត្រីនោះទេ»។
សម្តេចតេជោ ហ៊ុន សែន បានបញ្ជាក់ទៀតថា «មានទៅមានមក បើក្មួយត្រូវការពូ ពូមុខជាមកជួបក្មួយហើយ។ បើក្មួយត្រូវការពូ ពូនឹងដោះស្រាយបញ្ហាឲ្យក្មួយហើយ។ ប៉ុន្តែពេលណាក្មួយលែងត្រូវការពូ រឿងជម្លោះបែបនេះ វាមិនអាចកើតមានបានទេ តម្រូវការដែលក្មួយៗត្រូវការពូឲ្យជួយនោះ ពូក៏ជួយលែងបានដែរ ព្រោះជាតួនាទីរបស់នាយករដ្ឋមន្ត្រីថ្មីទៅហើយ ហើយប្រសិនបើពូជួយបាន ក៏ជួយត្រឹមតែកម្រិតចំណុចណាមួយដែលទាក់ទងជាមួយតួនាទីបុគ្គលរបស់ពូ»៕
