ប្រធានសម្ព័ន្ធសមាគមសហគ្រាសធុនតូចនិងមធ្យកម្ពុជា លោកឧកញ៉ា តែ តាំងប៉ បានមានប្រសាសន៍ចាត់ទុកក្នុងដំណើរទស្សនៈទៅកាន់ប្រទេសជប៉ុនកន្លងទៅនោះថា ពិតជាមានសារៈសំខាន់ណាស់ ជាពិសេសបានបង្ហាញពីលើកទឹកចិត្ត និងការទាក់ទាញវិនិយោគគិន ដោយបានផ្ដល់នូវភាពកក់ក្ដៅដល់វិនិយោគគិនជប៉ុនមានបំណងមកវិនិយោគនៅកម្ពុជា ហើយវិនិយោគពីជប៉ុន នឹងផ្ដល់ផលប្រយោជន៍ជាច្រើនដល់សហគ្រាសធុនតូច និងមធ្យមផងដែរ ជាពិសេស ការផ្ទេសបច្ចេកវិទ្យា ការធ្វើជាដៃគូសហការ និងការពង្រីកទីផ្សារថែមទៀតផង ។
លោកឧកញ៉ាមានប្រសាសន៍បញ្ជាក់ថា«គម្រោងវិនិយោគរបស់ក្រុមហ៊ុនជប៉ុនចំនួន ១៣៧ គម្រោង ក្នុងទុនវិនិយោគសរុបចំនួនប្រមាណ ២,៥ពាន់លានដុល្លារអាមេរិក ដែលផ្ដោតសំខាន់លើផ្នែកផលិតគ្រឿងបង្គុំអគ្គិសនីនិងអេឡិកត្រូនិក គ្រឿងបង្គុំរថយន្ត និងសម្ភារៈបរិក្ខាបច្ចេកទេស កសិ-ឧស្សាហកម្ម អាហារ ទេសចរណ៍សណ្ឋាគារមន្ទីពេទ្យ និងផ្សារទំនើប»។
ក្រុមប្រឹក្សាអភិវឌ្ឍន៍កម្ពុជាបង្ហាញថា បច្ចុប្បន្ននេះ មានសកម្មភាពធុរកិច្ចក្រុមហ៊ុនទាំងតូចនិងធំរបស់ជប៉ុនមានប្រមាណ១.៧០០ ក្រុមហ៊ុនដែលមានសកម្មភាពក្នុងវិស័យជាច្រើនដូចជាវិស័យធនាគារ អាកាសចរណ៍ ភោជនីយដ្ឋាន ហើយរដ្ឋាភិបាលកម្ពុជាក៏បានកំណត់នូវប្រភេទឧស្សាហកម្មអាទិភាពចំនួន៥ រួមមាន ឧស្សាហកម្មឬកម្មន្តសាលថ្មីៗ ដែលមានចរិតជាការបើកច្រកចូលទីផ្សារផ្ដល់តម្លៃបន្ថែមខ្ពស់មានភាពច្នៃប្រឌិត និងភាពប្រកួតប្រជែងខ្ពស់ ។
លើសពីនេះលោកបន្ថែមថា ចំពោះសហគ្រាសធុនតូច និងមធ្យមក្នុងវិស័យអាទិភាពរួមមាន ផលិតកម្ម កសិ-ឧស្សាហកម្មដែលបម្រើឱ្យការនាំចេញ និងទីផ្សារក្នុងស្រុក ប្រភេទឧស្សាហកម្មគាំទ្រពាក់ព័ន្ធនឹងវិស័យកសិកម្ម ទេសចរណ៍ និងកាត់ដេរ ព្រមទាំងឧស្សាហកម្ម បម្រើឱ្យខ្សែចង្វាក់ផលិតកម្មតំបន់ ដែលជាឧស្សាហកម្មតភ្ជាប់ទៅទីផ្សារ ឬខ្សែចង្វាក់តម្លៃសកលហើយមានប្រភេទឧស្សាហកម្មបម្រើឱ្យសែចង្វាក់ផលិតកម្មតំបន់ និងមានចរិតយុទ្ធសាស្ត្រនាពេលអនាគត។
សម្រាប់ការលប់ចោលនូវពន្ធកាត់ទុក១%នេះបានលើកទឹកចិត្តឱ្យក្រុមហ៊ុនជាច្រើនបន្តការវិនិយោគនៅកម្ពុជា ជាពិសេស ក្រុមហ៊ុនចាស់ៗ ដែលផុតការលើកទឹកចិត្តក្រោមគម្រោងវិនិយោគ ហើយនេះក៏ជាការលើកទឹកចិត្តបន្ថែមទៀតចំពោះអ្នកដែលមានបំណងចង់វិនិយោគត្រឹមកម្រិតសហគ្រាសធុនតូច និងមធ្យម ។
ពន្ធកាត់ទុក ១% ឬហៅថាពន្ធរំដោះលើប្រាក់ចំណេញនេះគឺជាបន្ទុករបស់វិស័យឯកជនដែលតម្រូវបង់ជួនរដ្ឋប្រចាំខែ ហើយត្រូវទូទាត់វិញនៅចុងឆ្នាំប្រសិនបើពន្ធលើប្រាក់ចំណេញ ២០% ចុងឆ្នាំតូចជាងពន្ធកាត់ទុក ១% នោះ ពន្ធកាត់ទុកនេះនឹងត្រូវខ្លាយទៅជាពន្ធអប្បបរមាផងដែរ ។
