Author: daily-khmer

សមាជិកសភាចំនួន៩រូបរបស់ចក្រភពអង់គ្លេស បានចេញផ្សាយរបាយការណ៍មួយ ដែលបង្ហាញពីផលប៉ះពាល់នានាក្នុងចក្រភពមួយនេះ ក្រោយពីចាកចេញពីសមាជិកភាពនៃសហភាពអឺរ៉ុប ដោយមិនមានកិច្ចព្រមព្រៀង (No deal Brexit) ។ របាយការណ៍បានបង្ហាញថា ផលប៉ះពាល់ធ្ងន់ធ្ងរជាងគេដែលអង់គ្លេសនឹងទទួលរងនៅពេលខាងមុខ គឺវិបត្តិខ្វះស្បៀងអាហារ និងថ្នាំពេទ្យ រួមទាំងបរិក្ខាពេទ្យផងដែរ ប្រសិនបើចក្រភពមួយនេះចាកចេញពីអឺរ៉ុប ដោយមិនមានកិច្ចព្រមព្រៀង ដែលនេះមិនរាប់បញ្ចូលទាំងវិបត្តិសន្តិសុខផង ។ របាយការណ៍ដដែលបានបញ្ជាក់ថា វិបត្តិធ្ងន់ធ្ងរនឹងកើតឡើងនៅអង់គ្លេស ក្រោយអង់គ្លេសចាកចេញពីអឺរ៉ុបដោយគ្មានកិច្ចព្រមព្រៀង គឺដោយសារការផ្គត់ផ្គង់ផ្នែកស្បៀងអាហារ និងថ្នាំពេទ្យ រវាងអឺរ៉ុប និងអង់គ្លេស នឹងត្រូវផ្អាកមួយរយៈដើម្បីរៀបចំឡើងវិញ ៕  ...

លោកស្រី Kang Kyung-wha រដ្ឋមន្ត្រីការបរទេសកូរ៉េខាងត្បូង បានបង្ហាញប្រតិកម្មយ៉ាងខ្លាំងចំពោះសេចក្តីសម្រេចរបស់គណៈរដ្ឋមន្ត្រីជប៉ុន ដែលបានអនុម័តនៅថ្ងៃសុក្រ ទី០២ ខែសីហានេះ លើគម្រោងដកកូរ៉េខាងត្បូងចេញពីបញ្ជីស ឫបញ្ជីនៃបណ្តាប្រទេសដែលត្រូវអនុគ្រោះផ្នែកពាណិជ្ជកម្មជាមួយជប៉ុន ដែលនេះបើតាមការចុះផ្សាយរបស់ប្រព័ន្ធផ្សព្វផ្សាយ Fox Business News ។ លោកស្រី Kang Kyung-wha បានព្រមានថា កិច្ចសហប្រតិបត្តិការផ្នែកសន្តិសុខរវាងកូរ៉េខាងត្បូង និងប្រទេសជប៉ុនអាចនឹងទទួលរងផលប៉ះពាល់ ប្រសិនបើជប៉ុនមិនដកសេចក្តីសម្រេចរបស់ខ្លួនចេញនៅពេលខាងមុខ ។ កាលពីដំបូង ជម្លោះពាណិជ្ជកម្មរវាងជប៉ុន និងកូរ៉េខាងត្បូង បានកើតឡើងដោយសារពីជប៉ុនបានរឹតត្បិតការនាំចេញវត្ថុធាតុសំខាន់៣យ៉ាងសម្រាប់ផលិតបន្ទះឈីប និងអេក្រង់ទូរស័ព្ទទៅកូរ៉េខាងត្បូង ដែលជាការសងសឹកកូរ៉េខាងត្បូង ដែលបានសម្រេចអោយក្រុមហ៊ុនជប៉ុនសងជម្ងឺចិត្តលើការបង្ខំពលករកូរ៉េខាងត្បូងអោយធ្វើការលើសកម្លាំងក...

រដ្ឋមន្ត្រីការបរទេសរបស់សហរដ្ឋអាមេរិក លោក Mike Pompeo បានផ្តល់កិច្ចសម្ភាសន៍មួយក្នុងកម្មវិធី The Sean Hannity Show តាមវិទ្យុ ដោយបានបង្ហាញជំនឿយ៉ាងមុតមាំលើលទ្ធផលវិជ្ជមាននៃកិច្ចចរចាជាមួយកូរ៉េខាងជើង ក្នុងការបង្កើតកិច្ចព្រមព្រៀងស្តីពីការរំសាយកម្មវិធីនុយក្លេអ៊ែរ និងបច្ចេកវិទ្យាមីស៊ីលរបស់កូរ៉េខាងជើង ដែលនេះបើតាមការចុះផ្សាយរបស់ Reuters ។ ក្នុងកិច្ចសម្ភាសន៍នោះ លោក Mike Pompeo បាននិយាយថា ក្រុមតំណាងរបស់សហរដ្ឋអាមេរិក និងកូរ៉េខាងជើង នឹងចាប់ផ្តើមកិច្ចចរចាសាជាថ្មីនៅពេលដ៏ខាងមុខនេះ ក្នុងកិច្ចខិតខំប្រឹងប្រែងទម្លុះទម្លាយភាពទ័លច្រក ។ ទោះបីជាបង្ហាញជំហរបែបនេះក៏ដោយ ក៏លោក Mike Pompeo មិនបានបង្ហើបអោយបានច្បាស់លាស់អំពីកាលបរិច្ឆេទដែលភាគីទាំងពីរនឹងបើកកិច្ចចរចាក្នុងការស្វែងរកកិច្ចព្រមព្រៀងស្តីពីការរំសាយកម្មវិធីនុយក្លេអ៊ែរ និងបច្ចេកវិទ្យាមីស៊ីលរបស់កូរ៉េខាងជើងនោះទេ ៕...

  ខ្មាន់បំផ្ទុះគ្រាប់បែក និងខ្មាន់កាំភ្លើងមួយក្រុម បានបើកការវាយប្រហារភេរវកម្មទៅលើសណ្ឋាគារដ៏ល្បីឈ្មោះមួយ នៅទីក្រុងកំពង់ផែ Kismayo ប្រទេសសុម៉ាលី កាលពីថ្ងៃសុក្រ ទី១២ ខែកក្កដានេះ ដោយបំផ្ទុះគ្រាប់បែកអត្តឃាត និងបាញ់ប្រហារបន្ថែម ។ សាក្សីឃើញហេតុការណ៍ផ្ទាល់ភ្នែក បាននិយាយថា ខ្មាន់បំផ្ទុះគ្រាប់បែកអត្តឃាត បានបើកបររថយន្តដែលផ្ទុកដោយគ្រឿងផ្ទុះដ៏មានឥទ្ធិពល សម្រុកចូលទៅកាន់សណ្ឋាគារ អមដោយខ្មាន់កាំភ្លើងជាច្រើននាក់ និងបើកការវាយប្រហារក្នុងពេលតែមួយ ។ មន្ត្រីសន្តិសុខរបស់ប្រទេសសុម៉ាលី លោក Mohamed Abdiweli បាននិយាយថា មនុស្សចំនួន២៦នាក់បានបាត់បង់ជីវិត និងជាង៣០នាក់ផ្សេងទៀតបានរងរបួស ក្នុងការវាយប្រហារភេរវកម្មនេះ ហើយក្រុមអ៊ីស្លាមជ្រុលនិយម Al-Shabaab ដែលមានទំនាក់ទំនងជាមួយក្រុមរដ្ឋអ៊ីស្លាម ISIS បានប្រកាសទទួលខុសត្រូវចំពោះអំពើភេរវកម្មនេះ ៕...

  លោក Geng Shuang អ្នកនាំពាក្យក្រសួងការបរទេសចិន បាននិយាយនៅថ្ងៃចន្ទ ទី០៨ ខែកក្កដានេះថា ចិនគាំទ្រឲ្យមានការដោះស្រាយបញ្ហានុយក្លេអ៊ែរអ៊ីរ៉ង់ផ្នែកការទូត មិនមែនការប្រឈមមុខដាក់គ្នាខាងកងកម្លាំងយោធានោះទេ ។ លោក Geng Shuang បានបន្ថែមថា ចិនបានបង្ហាញនូវការសោកស្តាយចំពោះមេដឹកនាំអ៊ីរ៉ង់ ដែលបានសម្រេចចិត្តចម្រើនសារធាតុអ៊ុយរ៉ានីញ៉ូមដោយបំពានលើកិច្ចព្រមព្រៀងនុយក្លេអ៊ែរជាប្រវត្តិសាស្ត្រកាលពីឆ្នាំ២០១៥កន្លងទៅ ។ សូមបញ្ជាក់ថា សេចក្តីប្រកាសជំរុញរបស់ចិន ត្រូវបានធ្វើឡើងក្រោយពីលោក ហាសាន រ៉ូហានី ប្រធានាធិបតីអ៊ីរ៉ង់ បានប្រកាសថា អ៊ីរ៉ង់នឹងចាប់ចម្រើនសារធាតុអ៊ុយរ៉ានីញ៉ូម ក្នុងអត្រា៥% និងមានបរិមាណលើ៣០០គីឡូក្រាបលើសពីកិច្ចព្រមព្រៀងបានកំណត់ ៕  ...

  ប្រធានាធិបតីរបស់សហរដ្ឋអាមេរិក លោក ដូណាល់ ត្រាំ បានគម្រាមដំឡើងពន្ធនាំចូលពីប្រទេសវៀតណាមនៅពេលខាងមុខ ប្រសិនបើប្រទេសនេះ មិនបើកទីផ្សារឲ្យទូលំទូលាយសម្រាប់ការនាំចូលពីសហរដ្ឋអាមេរិក ។ លោក ត្រាំ បានគម្រាមថា វៀតណាមគឺជាប្រទេសបន្ទាប់ ដែលសហរដ្ឋអាមេរិកត្រូវដំឡើងពន្ធនាំចូល ក្រោយពីសហរដ្ឋអាមេរិកបានដំឡើងតម្លៃពន្ធនាំចូលពីបណ្តាប្រទេសនៅតំបន់អាស៊ីខាងត្បូង មានប្រទេសឥណ្ឌាជាដើម ។ សូមបញ្ជាក់ថា មុនពេលនៃការគម្រាមពីប្រធានាធិបតីអាមេរិករូបនេះ វៀតណាមបានចុះកិច្ចព្រមព្រៀងពាណិជ្ជកម្មសេរីជាមួយសហភាពអឺរ៉ុប ក្នុងតម្លៃទឹកប្រាក់ជិត១០០លានដុល្លារអាមេរិកក្នុងមួយឆ្នាំ ដោយមិនយកពន្ធនាំចូលនោះទេ ៕...

  ថ្នាក់ដឹកនាំ និងប្រមុខរដ្ឋាភិបាលរបស់បណ្តាប្រទេសក្នុងតំបន់អាមេរិកឡាទីន ដែលជាសមាជិកនៃប្លុកពាណិជ្ជកម្មសម្ព័ន្ធមិត្តប៉ាស៊ិហ្វិក Pacific Alliance trade bloc នឹងបើកកិច្ចប្រជុំមួយនៅថ្ងៃសៅរ៍ ទី០៦ ខែកក្កដានេះ នៅប្រទេសប៉េរូ ។ លោក Carlos Oliva រដ្ឋមន្ត្រីក្រសួងសេដ្ឋកិច្ចរបស់ប្រទេសប៉េរូ បានអោយដឹងថា ប្លុកពាណិជ្ជកម្មសម្ព័ន្ធមិត្តប៉ាស៊ិហ្វិក Pacific Alliance trade bloc ត្រូវបានបង្កើតឡើងក្នុងគោលដៅរុញច្រានកំណើនសេដ្ឋកិច្ចរួមគ្នាក្នុងតំបន់ និងនៅតាមប្រទេសជាសមាជិក ។ លោក Carlos Oliva បានបន្ថែមថា ប្លុកពាណិជ្ជកម្មសម្ព័ន្ធមិត្តប៉ាស៊ិហ្វិក នឹងជំរុញការអភិវឌ្ឍន៍ ការប្រកួតប្រជែង និងកិច្ចសហប្រតិបត្តិការក្នុងតំបន់ ដែលនឹងនាំមកនូវភាពរីចម្រើនផ្នែកសេដ្ឋកិច្ចនៅពេលខាងមុខ ៕...

  អ្នកនាំពាក្យកងទ័ពជាតិលីប៊ី Libyan National Army ដែលហៅកាត់ថា LNA បានប្រកាសកាលពីថ្ងៃសុក្រ ទី២៨ ខែមិថុនានេះថា កងទ័ពជាតិលីប៊ី នឹងវាយប្រហារលើនាវាចម្បាំងរបស់ប្រទេសទួរគី នៅលើដែនទឹករបស់ប្រទេសលីប៊ីនៅពេលខាងមុខ ។ អ្នកនាំពាក្យរូបនេះ បានបន្ថែមថា ឧត្តមសេនីយ៍ Khalifa Hifter ដែលជាអគ្គមេបញ្ជាការកងទ័ពជាតិលីប៊ី LNA បានចោទប្រកាន់ទួរគី ពីបទចូលរួមជាមួយកងទ័ពលោក ខាលិច មានអាមេរិកជាដើម ក្នុងការវាយប្រហារផ្តួលរំលំរបបដឹកនាំរបស់អតីតប្រធានាធិបតិលីប៊ី លោក Moamar Gadhafi កាលពីឆ្នាំ២០១១កន្លងទៅ ។ សូមបញ្ជាក់ថា កាលពីឆ្នាំ២០១១កន្លងទៅ កងទ័ពលោកខាលិច មានអាមេរិកជាដើម បានវាយប្រហារផ្តួលរំលំរបបដឹកនាំរបស់អតីតប្រធានាធិបតិលីប៊ី លោក Moamar Gadhafi និងបានបន្សល់ទុកសង្គ្រាមស៊ីវិលអោយប្រទេសលីប៊ីរហូតដល់ពេលបច្ចុប្បន្ននេះ ៕  ...

ទីភ្នាក់ងារព័ត៌មានរុស្ស៊ី Russia News Agency បានចុះផ្សាយថា នាវាចម្បាំងរបស់សហរដ្ឋអាមេរិក USS Chancellorsville បានធ្វើដំណើរទៅជិត និងស្ទើរតែបុកជាមួយនឹងនាវាពិឃាត Admiral Vinogradov នៅថ្ងៃសុក្រនេះ នៅសមុទ្រចិនខាងកើត ។ នាវាចម្បាំង USS Chancellorsville គឺជាប្រភេទនាវាចម្បាំងដែលត្រូវបានបំពាក់ដោយមីស៊ីលបាញ់តម្រង់គោលដៅ Guided missile cruise និងនាវាពិឃាត Admiral Vinogradov ត្រូវបានបំពាក់ដោយប្រព័ន្ធមីស៊ីលដ៏ទំនើប ។ នាយទាហានជើងទឹករុស្ស៊ី បាននិយាយថស ទង្វើរបស់នាវាចម្បាំងអាមេរិកថាជាឥរិយាបថដ៏គ្រោះថ្នាក់ និងមិនមានវិជ្ជាជីវៈជានាវាចម្បាំង ដែលធ្វើដំណើរតាមផ្លូវទឹកអន្តរជាតិ ៕...

តុលាការរបស់ប្រទេសចិន បានកាត់ទោសប្រហារជីវិតជនជាតិកាណាដាម្នាក់ នៅថ្ងៃ អង្គារ ទី៣០ ខែមេសា ឆ្នាំ២០១៩នេះ ដោយចោទប្រកាន់ជនជាប់ចោទពីបទផលិត និងចរាចរ ថ្នាំញៀនប្រភេទ មេតាំហ្វេតាមីន (methamphetamine) ។ ឈ្មោះ Fan Wei គឺជាជនជាតិកាណាដាទី២ហើយ ដែលត្រូវបាន តុលាការចិនកាត់ទោសប្រហារជីវិតពីបទជួញដូរថ្នាំញៀន ចាប់តាំងពីទំនាក់ទំនងការទូតរវាង ចិន និងកាណាដា មានភាពតានតឹងក្រោយពីកាណាដាបានចាប់ខ្លួនប្រធានគ្រប់គ្រងហិរញ្ញវត្ថុ របស់ក្រុមហ៊ុន Huawei ចិន ។ ទណ្ឌិតជនជាតិកាណាដា ដែលត្រូវកាត់ទោសប្រហារជីវិត ឈ្មោះ Fan Wei ដែល មេខ្លោងផលិត និងចរាចរគ្រឿងញៀន ជាមួយគូកនម្នាក់ទៀត ឈ្មោះ Wu Ziping ដែលតុលាការចិនបានកាត់ទោសប្រហារជីវិតដែរ ប៉ុន្តែតុលាការមិនបានបញ្ហាញសញ្ជាតិ Wu Ziping នោះទេ ៕...